就與師母撞到正一事,本刊致電鄭嘉穎求證,他未聽問題已經「 cup」線。 

娛頭

撞見師母掉頭走 戴思聰女怒爆鄭嘉穎:你繼續講大話啦!

Ads by Google

06年,爆出鄭嘉穎早於 93年跟歌唱老師戴思聰簽下一份「終身合約」,師徒二人因為抽佣問題反目成仇。 10年,戴思聰因心臟病離世,當時鄭嘉穎向外表示,對老師只有「恩」沒有「仇」。話雖如此,但這段超過二十年的恩怨根本不曾化解。有指一個月前,鄭嘉穎在銅鑼灣與戴師母狹路相逢,但他竟然招呼唔打,掉轉頭走人。
提到鄭嘉穎無情無禮,戴師母不願再提;戴思聰女兒戴辛尉卻不吐不快,還開腔為亡父討回公道。
「所謂嘅『終身合約』件事曝光前,爹哋喺林文龍婚禮撞到嘉穎,佢藐晒嘴咁對住爹哋,對一個恩人點解可以咁,爹哋好唔舒服,先提醒佢其實仲有一份合約喺度!我講嘅全部真話,佢可以繼續講大話,我心安理得!」戴辛尉振振有詞。

師母拒原諒

戴思聰離世多年,與鄭嘉穎的「終身合約」糾紛,亦隨之長埋黃土。恩師過身,當時未有出席喪禮的鄭嘉穎向外稱對老師只有「恩」沒有「仇」。
但一個月前,有人目睹鄭嘉穎在銅鑼灣時代廣場一間食肆遇上戴師母,當時他不單連招呼都唔打一個,還急急腳掉頭走,事後戴師母曾向友人訴說:「呢世都唔會原諒佢(鄭嘉穎)!」
既然有恩無仇,偏偏鄭嘉穎對師母如此無禮!對此,戴思聰細女戴辛尉揶揄回應:「媽咪有白內障,可能都睇唔到佢!但我想同佢講,唔需要咁驚嘅!」
戴辛尉指母親年事已高,亦不想再回應有關這個人(鄭嘉穎)的事,只想忘記不快,開心生活。但戴辛尉仍忍唔住開腔發炮,為父平反。
「其實之所以有『終身合約』呢件事爆出嚟,係爹哋喺林文龍個婚禮見到鄭嘉穎,當時佢黑口黑面,又藐晒嘴咁對爹哋,點解對一個恩人可以咁樣?當日咁親嘅人,講句 Hello都唔得?爹哋好唔舒服,覺得既然你咁嘅態度,就提醒佢仲有一份合約喺度!如果真係追佢錢,晨早追咗啦!但一提醒佢仲有份約,佢就俾晒反應,動作多多!」


週二( 6/5)中午,戴辛尉陪同母親到時代廣場行街。 

戴辛尉表示,鄭嘉穎多年來只送過那份「不吉祥」的合約,和一對襪給父親。 

在戴思聰喪禮上,學生劉德華、陳曉東扶實戴師母。(《蘋果日報》圖片)

鄭嘉穎出道時跟戴思聰情同父子,家庭環境不好的他,更獲老師免收學費。 

04年,林文龍郭可盈在洲際酒店舉行婚禮,據戴辛尉透露,嘉穎曾在此場合當眾對其父不敬,令戴思聰十分難受。(《蘋果日報》圖片) 

22年恩怨

歌唱老師戴思聰,因為一份「終身合約」與愛徒鄭嘉穎搞到反晒面,從此不相往來。

92年 只有 23歲的鄭嘉穎,以歌手身份簽約戴思聰的「星暉娛樂」,合約為期 5年。

 

93年 戴思聰與鄭嘉穎簽下一份「終身合約」,只要他一日在娛樂圈搵食,收入要被抽 10%。

97年 鄭嘉穎不續約寶麗金,戴思聰安排簽約台灣的「金點唱片公司」,之後更以 30萬連同其經理人合約一併賣
給「金點」。

 

00年 鄭嘉穎拍台劇《絕代雙驕》開始為人認識,有機回流香港發展,以部頭約演出無綫劇《烈火雄心 II》和《翡翠戀曲》。

 

06年 3月 擔演《天幕下的戀人》收視理想,同一時間爆出戴思聰以律師信追討鄭嘉穎履行 13年前簽下的「終身合約」,事件鬧到滿城風雨,一星期後,戴思聰發聲明表示不再追究。

 

10年 7月 戴思聰病危,希望能見鄭嘉穎一面化解恩仇,卻遭他拒絕,父親含恨而終,戴蘊慧發聲明禁鄭嘉穎出席喪禮,翌日細妹戴辛尉表示只是家姐個人意願,她與戴師母均歡迎嘉穎出席喪禮。

 

11年 3月 未有出席喪禮的鄭嘉穎,被發現到戴思聰擺放骨灰的龕堂善緣拜祭,哭墳一小時。

八年冇聯絡

戴思聰離世,戴師母打擊很大,全靠兩個女不停安慰,才度過低潮。
「我都曾經問過媽咪,如果有機會見到唔鍾意嘅人會點?媽咪話會睇情況,我問如果嗰個人行埋嚟打招呼呢?媽咪話咁咪點吓頭,唔會行咗去咁小家!」
由師徒反目到恩師病逝,這八年來,鄭嘉穎再無與戴家聯絡。
「我敢講一句,爹哋媽咪行出街,做任何事,都對得住自己良心,見到任何人,起碼唔會掉頭走,因為佢哋無對唔住任何人!」戴辛尉說。


被無禮對待,戴辛尉安慰媽咪:「你對人好,外界唔知唔緊要,問心無愧就得!」 

戴蘊慧姊妹均已退出娛樂圈,戴辛尉(右)更繼承父業,考獲鋼琴二級 Diploma的她,授徒教唱歌。(《蘋果日報》圖片) 

《天幕下的戀人》為鄭嘉穎事業帶來轉機,與同劇撻着周麗淇五年情玩完,再見更不是朋友。(《忽然 1周》圖片)

戴思聰桃李滿門,圈中不少紅人都是他學生,包括謝霆鋒(左一)及林峯(右一)。 

老公過世,戴師母曾大受打擊,細女戴辛尉定時定候陪媽咪到「善緣」拜老豆。(《忽然 1周》圖片) 

八年換六經理人

鄭嘉穎 01年投無綫後,一直得樂易玲提攜, 06年更憑《天幕下的戀人》榮登視帝;近年他轉戰大陸市場,身價暴漲同時氣焰亦大增,為怕樂大媽要他加簽合約,經常避開對方。去年樂易玲的生日派對,身為「契仔」之一的他未見蹤影。除此之外,鄭嘉穎亦被指經常耍大牌,對劇組人員及身邊經理人諸多投訴,在無綫八年,已六度換經理人,個個都做唔長,相當難服侍。

唔怕對質

當年簽下「終身合約」,鄭嘉穎曾稱是被迫簽約。戴辛尉更氣憤。「佢話爹哋逼佢簽約,一個成年人點逼?用槍?你已經報咗警啦!用刀?你都報警啦!我講嘅全都係事實,我又無做錯事,唔怕同佢對質!佢可以繼續講大話,我就心安理得咁生活!」
鄭嘉穎反面不認人,戴家後人為戴思聰推出回憶錄,亦刻意將有關他的部分全部抽起。
「其實爹哋喺回憶錄寫得最多係鄭嘉穎,但佢已經唔喺度,我哋唔想將件事複雜化,勾起啲唔開心嘅事刺激到媽咪,所以先決定全部抽起晒,只出啲開心事!你問我,想唔想將真相話俾全香港人知,我係想,但點樣去逐一解釋……」


使慣人的鄭嘉穎連表妹王賢詠亦當阿四,做攝影師又做助手。 

事業爆紅,鄭嘉穎對昔日視為「伯樂」的樂易玲,亦變得疏離。(《忽然 1周》圖片) 

鄭嘉穎憑《步步驚心》在內地上位,過去兩年拍五劇,可惜收視麻麻,冇人再搵。 

戴師母仍努力為戴思聰籌備紀念音樂會,希望完成老師遺願。 

快樂好過有錢


在戴思聰回憶錄內刊登的相片,都是記載昔日的開心事。 

○六年,爆出「終身合約」糾紛,鄭嘉穎仍是「霉得得」,博得外界同情,時至今日,他貴為無綫一線小生,在內地年賺半億。
鄭嘉穎的收入幾何級跳,「終身合約」是否依然生效?戴辛尉顯得有點欷歔。「無諗嘞!錢有邊個人唔鍾意,但我寧願要快樂多啲!如果佢真係搵到咁多,我恭喜佢!希望佢可以做吓善事囉!有咁嘅運氣,做番啲嘢回饋社會啦!」

合約有得拗

當年的終身抽佣合約是由鄭嘉穎、戴思聰及戴師母三人共同簽署,據伍家賢律師表示,合約條款需要列明其中一方過身,繼承人仍可得到相關利益,否則,合約會出現爭拗機會,須視乎合約內容由法庭作出判決;而現時的終身合約亦未必有效力,為保障藝人利益,遇到不合理的條款,法庭可作出推翻。


撰文、攝影:娛樂組

全站熱搜

tvb4life 發表在 痞客邦 留言(0) 人氣()