伏明霞梁錦松 拖實買衫去旅行


■梁錦松與伏明霞年紀相距26年,小伏近年發福,同梁錦松越來越相襯。

Ads by Google

【中環擺花街】前財政司司長、62歲嘅梁錦松早前話自己冇計劃選下屆特首,日前就偷得浮生,撇低三個仔女,同比佢年輕26年嘅跳水王后伏明霞去中環拍拖購物。當日下晝4點幾,梁錦松同伏明霞喺擺花街嘅Patagonia戶外用品連鎖店買嘢,佢哋似乎打算去較凍嘅地方旅行,伏明霞問職員有冇腰袋,佢仲話:「有冇啲多兩格?可以放埋passport同銀包。」而梁錦松就不停試衫,一次過攞咗四、五件保暖衣、防水風褸、運動褲等入試身室,老婆一直企係門外,等老公每試完一件行出嚟,即刻畀意見。之後又幫老公揀波鞋,似乎要全身上下置新裝。


■估計梁錦松同伏明霞將去寒冷地方旅行,所以買定啲保暖衣。


■梁錦松一次過揀咗多件保暖衣、運動褲等入試身室。

埋單過萬蚊

佢哋喺店內逗留咗差唔多一個鐘,買咗一大袋貨品,由於貨品價錢唔平,估計埋單逾萬元。離開時,售貨員仲招呼周到,幫佢哋拎袋衫上車,而兩公婆就可以施施然手拖手離開,梁錦松仲大方同記者say hi,反而伏明霞較為怕醜。
採訪、攝影:徐錦池、李志明

 

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()