上周四( 24日), Zoey如常一個人睇舖,冇人幫手,佢只可以捱外賣米線,同打工仔冇分別。 

媽咪姐

岑潔儀做 Sales 中環日企十粒鐘

Ads by Google

當大台嚴格監控旗下藝員嘅同時,政府又趕絕 HKTV,家吓做電視真係搵食艱難,咁啲藝員點算好?咪自力更生搵秘撈囉!

 

2010年同陶喆傳過緋聞、喺大台撈咗六年都冇咩發展嘅岑潔儀 Zoey,前年過檔 HKTV,不過真係唔好彩,面對公司開台無期,只好靠自己。媽咪姐收到風,兩年前 Zoey家姐喺中環士丹頓街開咗間時裝店,為儲錢同儲經驗, Zoey竟然降呢响舖頭做 sales,一日企十粒鐘,抹窗、收錢、攞貨同執舖一腳踢。


06年,岑潔儀喺許冠文主持嘅遊戲節目《一擲千金》做千金小姐,開始多人識,但之後拍戲都係做閒角,無以為繼。 

一腳踢食飽飽, Zoey落手落腳執 display公仔同佢哋扮靚靚。佢間時裝店走中檔路線,幾百蚊有交易。 

啱啱開舖見冇乜客, Zoey仲親自抹玻璃。

 

媽咪姐入舖頭同岑潔儀傾過偈,佢話;「其實我都要為自己打算吓,講真,公司雖然個個月有糧出,但真係停晒工,我都唔好意思白𢭃人工。依家呢個時勢,做生意係長遠計,呢度開咗差不多兩年,已經上咗軌道,每個月都有錢賺。(當初做 sales有壓力嗎?)其實初頭都放唔低個包袱,始終以前俾人影開,依家要服侍人,不過好快適應咗,仲發現啲客認得你會幫襯你,仲叫你同佢襯衫㖭!嚟緊我同家姐計劃開分店,已經睇緊舖,預計每人投資 100萬左右,因為舖租太貴。(唔諗返舊公司?)唔好喇,我哋呢啲好難返去,聽人講要過五關斬六將,咁委屈又何必。」又係嘅,何況 Zoey前年嫁咗俾馬拉商人,有大把路揀。



Zoey最為人知嘅係 2010年被拍得同台灣天王陶喆喺餐廳咀嘴。同埋佢之前鬧爆李思捷醉後抽水。《蘋果日報》圖片 

殺出血路

喺大台搵食艱難,好多藝人離巢後都自己搞生意,謀出生天。

 

譚小環做魚蛋妹
喺大台捱咗 18年嘅譚小環,早排同老公喺銅鑼灣渣甸坊開舖賣魚蛋,日日其門如市,聽聞月賺逾 30萬。

 

李雨陽街市賣雞
入行 11年,後期俾大台局簽 1年 1騷坎坷合約,前年劈炮。舊年同世叔伯合資,喺觀塘街市擺檔賣雞。

 

黃澤鋒餐廳樓面
今個月頭黃澤鋒同友人喺西貢開咗間地中海餐廳,佢仲日日充當樓面做生招牌。

全站熱搜

tvb4life 發表在 痞客邦 留言(0) 人氣()