3萬蚊入門　超欣拎呢啲 Dior

名門淑女，每季梗有幾個新款名牌手袋看門口。

Ads by Google

賭王何鴻燊喻為最靚的四房孻女何超欣，雖然得 15歲，但何家淑女初長成，最近亦加入手袋黨。初熟千金 sell青春，唔似一眾名媛揀過十萬 Hermès，反而玩拼色 Lady Dior手袋高貴得來又不失俏皮。

何超欣　拼色春青

$57,000經典款 Lady Dior可孭上身或手挽，袋款設有拉鏈及暗格，簡單方便。今季推出不少限量設計，想買就要撞手神。

今年 15歲的何超欣，打扮漸見成熟，身上配件愈來愈貴氣。近日她經常孖住家姐超盈出動，手挽度假系列的拼色 Lady Dior手袋，配以白紗裙仔，舒服清新，好有小淑女 feel。

榮文蔚　初春氣息

名媛淑女進出 ball場，最愛出動性感晚裝。回復單身的榮智健姪女榮文蔚，近排轉 look，罕有以粉色裝束去睇騷，孭埋繡花粉紅小手袋，散發初春氣息，即時後生晒！

$47,000

何超瓊　強人貴氣

經常出席慈善活動的大家姐何超瓊，打扮斯文貴氣。不過早前她一反常態，以 sharp醒紅白 Chanel套裝撞黑色繡花手袋。相比四房妹妹超欣的入門版，超瓊手拎的立體花限量版款式，製袋過程繁複，要由 5名工匠人手切割，價錢亦貴 5倍。

$180,000

鄧宣宏雁　潮味撞色

$58,000

名太買手袋，玩完淨色襟興款又愛換色玩新意。周日（ 27日），太子珠寶老闆娘鄧宣宏雁拎住拼色款去馬場。不過手袋顏色過分鮮艷，與她的斯文打扮顯得格格不入。

琦琦　型格取勝

緊貼潮流的琦琦，愛以潮 look示人，造型一向有驚喜。早前她出動超低胸西裝褸，以全黑打扮配上刺繡徽章的黑色小牛皮手袋，型格得來又不失女人味。

$50,000

葉梁美蘭　忠實擁躉

前行會成員葉維義太太葉梁美蘭，唔只晚裝收藏多，手袋數目亦數之不盡。多年前開始用 Lady Dior的她，每季都會入貨，十足代言人咁款。

$24,000

戴妃名袋

《蘋果日報》圖片

法國品牌 Dior的經典款式 Lady Dior手袋，早於 1995年 9月推出，當年成為王妃戴安娜御用手袋。她更多次被拍得手持小手袋出席探訪活動，自此品牌為向王妃致敬，以她重新命名為「 Lady Dior」。
近年品牌在設計師 Raf Simons掌舵下，將簽名式手袋重新包裝，利用密集鑲嵌的閃片、樹脂圓珠呈現繁花世界等，打造摩登新世代。

撰文：名人組　
攝影：攝影組