真人版黑魔后同動畫版 8成相似,劇組特意加重角色顴骨線條,令黑魔后更加惡形惡相。 

歐洋風

Maleficent奸得有道理

以前係懶人多屎尿;依家係大陸人多屎尿至真。
舊時我哋叫人唔好喺度食喺度屙;家下,原來潮興周圍食隨處屙。時代真係變咗,難怪連童話都要改革。
好似經典童話《睡美人》,早前開拍真人版《黑魔后:沉睡魔咒》,主角唔係睡美人,而係黑魔后 Maleficent,當中搵嚟安祖蓮娜醜化演繹,仲會大講呢位奸角嘅心路歷程同血淚史,奸都奸得有道理過人。

Ads by Google

童話中嘅奸角好多時都係陪襯居多。正如《睡美人》入面嘅黑魔后 Maleficent一樣。喺 1959年迪士尼動畫版本,講來講去都係睡美人如何躲避惡咒,瞓足半場,終於被王子營救。但黑魔后點解要落咒?頭上點解生對角?肯定唔係扮型咁簡單囉。


《睡美人》故事流傳超過 400年,直至迪士尼 1959年版本先正式創造黑魔后 Maleficent,家傳戶曉至今。 

如果你係黑魔后 Maleficent,你會對 BB下啲咩咒?我會「咒」佢唔好隨地便溺囉。 

黑魔后成魔之路

《黑魔后:沉睡魔咒》(美國、香港 5月 29日同步上映)就係解釋黑魔后作惡嘅原因。古仔同樣以小公主誕生開首,當時舉國歡騰舉行盛大宴會,點知黑魔后不請自來,更詛咒公主 16歲生日將會被紡車針刺死。國王大驚之下,將公主交由 3位仙女照顧,可惜避唔開惡咒,公主雖然冇死到,但陷入昏睡狀態,最終要等王子深情一吻先甦醒。
劇情萬變不離其宗,但今次電影特別強調黑魔后嘅出身背景同成魔之路。原來黑魔后曾經好 pure,喺森林生活得優哉游哉。有一日軍隊大肆入侵,迫到黑魔后憤起反抗,其間遭到朋友背叛,令佢失去仙子翅膀,最終成為毒到冇朋友嘅黑魔后。


3位小仙子奉命保護公主,免受惡咒所害。 

黑魔后屢次撞到公主,兩人漸漸成為朋友。不過落咗嘅咒猶如潑出去嘅水,係收唔番嘅,搞到黑魔后左右做人難。順帶一提,童年版公主由安祖蓮娜親生女 Vivienne飾演,母女檔首次上陣。 

還看安祖蓮娜

古仔講到呢度仲未完㗎噃。喺下咒後 16年間,黑魔后多次遇到小公主,久而久之仲 friend埋,情與義,究竟揀邊樣好?呢鑊真係頭痕嘞。
今次黑魔后咁大發揮,角色亦搵嚟好戲之人安祖蓮娜祖莉( Angelina Jolie)飾演。安祖蓮娜近年除咗忙於湊 6個小朋友,早兩年切乳防癌後又走去執導,周身唔得閒。細心一數,對上一套幕前作品(唔計聲演),已經係 2010年嘅《機密邂逅》。如今佢回歸大銀幕,今次仲要罕有醜化自己做大奸角,吸睛度、話題性都贏晒啦!


成人版公主由艾麗芬寧飾演,童星出身嘅佢曾拍過《 S8驚世檔案》,演技備受讚賞,絕對係好戲之人。 

公主被紡車針拮到後(左圖),例牌要瞓番陣(右圖)。 

童話有噴火龍是常識吧! 1959年動畫版,巨龍由黑魔后所變。至於今集劇情有冇更改,就要睇電影先知。 

安祖蓮娜對上一套幕前作品,追溯到 4年前同尊尼特普合作嘅《機密邂逅》。 

撰文:娛樂組
攝影:攝影組

    全站熱搜

    tvb4life 發表在 痞客邦 留言(0) 人氣()