論名氣,唐澤壽明喺日本成名早過堺雅人,今次揚言要超越對方的好成績,對日劇一哥寶座志在必得。 

電視精

半沢接班人

Ads by Google

舊年大熱的日劇《半沢直樹》,創下收視紀錄,劇集最尾明明已經為續集埋下伏線,點知過咗成年,說好的續集仲未見影,更有傳男主角堺雅人拒絕接拍,計劃隨時胎死腹中。
電視台點會守株待兔?最好的方法係搵個接班人。今季就有兩套日劇,改編《半沢直樹》原著作者池井戶潤的小說,明抽《半沢直樹》水。一套係女版半沢直樹《花咲舞不會沉默》,另一套係社長臨危受命嘅《羅斯福遊戲》,話唔比較就呃你㗎啫。
至於望穿秋水嘅《半沢直樹》續集,下季點都會拍套單元劇頂吓癮先喎。哦,聽住先啦!

女版半沢伸張正義

池井戶潤寫書之前,曾經於銀行任職,所以好多作品都以銀行為主題。《花咲舞不會沉默》改編自小說《不祥事》,講述女主角於銀行擔任前線工作出色,繼而獲提拔到總行,調派入「臨店班」,即係執手尾部門,邊間分行有問題有困難佢就負責去解決。女主角性格直腸直肚,據理力爭,面對上司及強權都唔會屈服,堪稱女版半沢直樹。有別於《半沢直樹》緊張凝重的氣氛,《花咲舞不會沉默》行輕鬆小品路線,加上故事主人翁是女性,相信一眾為工作打拼的女強人及 OL特別有同感。女主角渡邊杏上季主演晨早劇《多謝款待》爆紅,大和撫子形象深受師奶歡迎,今次一改戲路,飾演打工一族,第一集就幫女同事出頭,揭發上司職場欺凌行為,大快人心,錄得 17.2%的收視,暫排本季第一,且看後勁如何。


渡邊杏出身演藝世家,爸爸係成功打入荷李活的渡邊謙,不過佢堅持不靠父蔭,今年終於捱出頭。 

《花咲舞不會沉默》故事背景與《半沢直樹》一樣是銀行,不過笑容滿面的櫃枱姐姐,比起木獨的西裝大叔來得更吸引。 

話明係女版半沢直樹,當然少不了與上司衝突的場面。 

渡邊杏之前於晨早劇《多謝款待》中表現突出,劇中經常以和服示人,成為新一代大和撫子的代表。 

社長絕處求生

眼見其他電視台不停抽水,《半沢直樹》的 TBS電視台並無坐以待斃,集合《半沢直樹》的幕後原班人馬,改編池井戶潤另一部小說《羅斯福遊戲》。故事講述公司面臨破產,男主角因為擁有過人才智,臨危受命成為社長,為公司存亡進行改革,力抗財團收購。同樣的作者和班底,唯一唔同係主角由打工仔變成社長,雖然話奮力保護公司應該幾勵志,不過始終唔及半沢直樹呢種夾心管理層有共鳴。故事的副線加入公司附屬棒球隊的故事,好處係啱晒日本人口味,壞處係間接分薄咗主線的緊湊。孭飛做男主角的唐澤壽明,演技毋庸置疑,對手係江口洋介,兩人上次合作已經係十年前的《白色巨塔》,默契十足,期待再擦出火花。有日本傳媒預測, 4月 27日開播的《羅斯福遊戲》一開始收視會唔錯,不過珠玉在前,難免會有比較,到時就要睇吓台前幕後的功力。


《白色巨塔》堪稱日劇經典,當年收視高達 23.9%,且看唐澤壽明及江口洋介可否再創收視奇跡。 

《半沢直樹》中「十倍奉還」台詞深入民心,《羅斯福遊戲》遊戲入面,一樣有凌厲眼神加一句「反敗為勝」。 

《羅斯福遊戲》中的青島製作所是主要場景,唐澤壽明做機械公司的社長,形神俱似。

春季日劇重點出擊

除咗兩套《半沢直樹》姊妹劇之外,今季日劇甚有睇頭,演員陣容強勁,幾套都頭威頭勢,究竟邊個會跑出?

《愛麗絲之棘》

劇集以醫院作為背景,以為是一般醫療劇,又係講醫療失誤、權力爭鬥?其實主線係女主角的報仇,為查明父親 15年在手術中死亡的真相,而當上醫生深入醫院調查。香港觀眾對上野樹里並不陌生,不過形象仲係停留喺《交響情人夢》的野田妹,今次挑戰亦正亦邪的角色,開拓新戲路,第一集收視唔錯,有 14.2%。喺今季無醫療劇對手的情況下,要留住醫療劇迷應該唔難。

《即使弱小也能取勝》

校園勵志片每季總有一兩套,今季有《即使弱小也能取勝》做代表。人氣偶像組合嵐的成員二宮和也,一向被公認是演技派,第一次飾演老師角色,擔任母校棒球隊的領隊,不過學生們成績高分,運動低能,佢決定徹底改造球隊,取得勝利。二宮和也一向有收視保證,加上拍檔人氣急升的福士蒼汰及有村架純,勵志、棒球、偶像,收視無得輸,第一集有 13.4%,有望繼續攀升。

《 MOZU》

近幾季都有大製作的動作日劇,上季有《 S-最後的警官-》,雖然硬橋硬馬真功夫加槍戰係好精彩,不過劇本薄弱,嘥晒。今季有《 MOZU》,改編自直木賞小說《百舌》系列,由於動作場面及布局繁多精細,曾經被指無可能被拍成電影及電視劇,不過今次由兩個電視台合作,橫跨兩季播出,重視程度屬近年少見。男主角西島秀俊飾演喪妻警察,調查令妻子喪命的恐怖襲擊。第一集播出後大獲好評,除咗媲美荷李活製作的爆破場面,故事鋪排非常精彩,增加追看意欲,第一集有 13.3%。

《 First Class》

澤尻英龍華相隔八年回歸連續劇第一擊《 First Class》,被觀眾選為「今季日劇最期待的女主角」 No.1,平時「我最討厭的藝人」佢就名列前茅,點解今次咁多人想睇呢?原來於劇集中,佢飾演一個鄉下妹,加入時裝雜誌社,被同事欺凌,同現實中佢成日黑面的形象有太大落差,睇嚟觀眾想睇佢俾人恰!


撰文:關錦雯

    全站熱搜

    tvb4life 發表在 痞客邦 留言(0) 人氣()