媽媽海南雞飯午餐$38連湯及飲品,非常抵。不難吃,但與心目中的海南雞飯差太遠。 

試食王

平版 1968 差到無要求 1968老街市  地址:佐敦佐敦道 31至 37號百誠大廈 1樓 B鋪 電話: 2782 3013

Ads by Google

印尼餐廳 1968由九龍區開到去中環 The L Place,愈走愈高級。最近開分店,又開返九龍區,選址佐敦快餐店集中地百誠大廈。新店名為「 1968老街市」,又改走平民路線。午膳時段幫襯,坐滿人。先要讚一讚裝修,餐廳十足室內大牌檔,營造到親民效果之餘又夠型仔。牆上鐵皮畫好懷舊,靠窗的幾個印尼街頭車仔檔位簡直係影相打卡位。

 

服務唔差,個個阿姐都有笑容,有位風趣幽默的哥哥仔識推介菜式之餘,更同客人有講有笑,可惜只係兼職。午市只有六款「街頭亞洲風味午餐」選擇,媽媽海南雞飯連例湯連飲品,只賣$38,真係平到笑。不過,海南雞一睇切法已知唔對路,果然唔夠滑,飯太乾,無雞油香,只得相信是與中環店同一出品的醬油出色。 1968椰汁喇沙肥牛麵,加上肥牛已詭異,味道完全不像喇沙。芙蓉蛋飯和豬扒飯都一般,唯有當去了大家樂!


印尼炒飯$68用石鍋上,無意思,配料少,飯粒不夠乾身,這真的是印尼炒飯嗎? 

芝麻蝦多士$38蝦膠太薄,多士太油,以為新年又到食煎堆。 

鮮大蝦沙律$38大蝦似雪藏貨,蝦頭很大,都有蝦膏的。但辣千島醬加沙律醬,好奇怪,因為我期待放進口的是印尼加多加多。

 

可能午餐只為以平填飽客人肚,可能廚師在晚膳時間才較為用心,而且大部分菜式都在晚餐餐牌上,決定相約友人晚膳再給餐廳一次機會。晚市$188二人套餐有蝦有雞認真抵,但還是決定散叫。晚市餐牌很多選擇,甚至有清酒煮蜆、賽螃蟹和水煮牛肉等非南洋菜,萬國 feel。圖片中的菜式好靚,憑對圖片的直覺點了印尼炒飯、芝麻蝦多士、鮮大蝦沙律、粟米墨魚脆多士和巴東牛肉等。菜式一上枱又覺中伏,粟米墨魚脆多士最為貨不對辦。墨魚膠和蝦多士的蝦膠都是又少又無味,塊多士仲有大朕油味,加埋芝麻簡直似煎堆。印尼炒飯個石鍋擺明裝飾用,飯是炒好才放進去,做不出飯焦,配料少,沒有圖片中的青瓜,飯太濕,雞肉串又乾又唔夠熱。鮮大蝦沙律一點也不鮮,圖片中的沙律明明像正宗印尼沙律加多加多,但蝦肉配的竟是帶辣的千島醬,另一邊竟是蘋果加木瓜加沙律醬的港式沙律。太失望!點了多款菜式中,只有 1968用來做招牌的巴東牛肉似模似樣,腍身又夠入味。飲品亦是叫人失望透頂,珍多冰似椰糖水,荔枝香茅梳打似冰水,美祿恐龍淡得恐怖。
晚餐五個人埋單六百幾,呢個價錢,莫說 1968品牌,去求其一間印尼餐廳食飯都叫抵。但別要求食到 1968中環店質素。


巴東牛肉$68最出色一味,是 1968水準,看見有客人叫一份巴東牛肉再叫碗飯當一餐,聰明。 

仿印尼街頭車仔檔的座位風味十足,都值得來影影相。 

荔枝香茅梳打$28(左)和珍多冰$28(右)一杯無味如冰水和一杯只喝到椰糖味,飲水好過。

明明餐牌上的粟米墨魚脆多士$42好靚仔,但實物唔吸引,多士又是太油,墨魚膠無味。 

評分

食物:★★
服務:★★★
環境:★★★★
抵食:★★★★

1968老街市

地址:佐敦佐敦道 31至 37號百誠大廈 1樓 B鋪
電話: 2782 3013


撰文、攝影:試食王

    全站熱搜

    tvb4life 發表在 痞客邦 留言(0) 人氣()