型格外形可以老翻,但風力同靜音真係冇得呃,可以話係另類防偽「標籤」。 

ILIKE

靜音送風

Ads by Google

Dyson嘅無葉風扇 Cool,淨係外形已經夠殺食,如果唔係,羅湖商業城或淘寶就冇咁多老翻貨啦!講到功能,環形出風又的確均勻舒服,但致命傷係開到最大輸出嗰陣,高頻噪音都幾難頂,打算喺屋企睇戲,享受吓套 home theatre音效,就真係要開冷氣先得。
新一代無葉風扇今個禮拜到港,代理話靜咗 75%有多,即場試聲,真係冇作大喎,開到十級風力,都只係得微弱風聲,實用價值即時高番晒。價錢方面,同上一代推出嗰陣差唔多,三個 size分別賣$3,680( AM06)、$4,580( AM07)同埋$4,880( AM08)。想知道有幾靜,真係要落 K-11間鋪試試。

 


周群雄 

 

米蘭單車

啱啱出完米蘭 trip,老實講,印象最深刻唔係靚景美食,反而係單車!行街時時刻刻都見到架橙色單車,認真奇怪。上網一查,先知嗰架單車叫 BikeMi,只要上網登記兼俾錢(日租 2.5歐羅),去到單車站輸入網站提供嘅密碼,就可以踩車四圍去。單車站幾乎每隔兩個街口就有一個,借車還車都好方便。本來同攝影師都心郁郁想租車,但係唔熟路又冇 GPS喺手,最後都係得個諗字。只係想講香港政府成日宣傳叫人做運動,起呢類單車站,咪可以吸引到人返工放工踩吓囉,仲唔使驚塞車,幾好!


潘健文 

好多景點都有單車站,好似米蘭大教堂門口就有成十幾架。 

野外小喇叭

呢輪好勤力,個個星期去行山,有時撞正朋友唔得閒,都會一個人照行。不過,荒山野嶺,尤其樹木參天嘅路段,講真都有少少寒意,所以會開住手機播吓歌,叫做有啲人氣,可惜音效始終麻麻。前排見到 TDK有隻叫 TREK Micro A12嘅藍牙喇叭仔,可以加個釦掛喺背囊, 480蚊有交易,除咗有個 1.5吋全音單元,仲有多一個 2吋低音單元,音質都幾有驚喜。如果放喺個箱面上播,仲可以增加低頻。可惜粒電持久力一般,最多只得六個鐘,唯有就住聽。


劉耀祥 

外形的骰,最鍾意有個釦,屋企用,掛喺床頭都得。 

潛得睇得

「又睇錶!」「睇吓啫睇吓啫……點會買吖,發咗咩。」咁啱有隻新錶上咗嚟公司影相,唔睇,點對得住自己,更何況係「卡地亞首潛」: Calibre de Cartier Diver。睇相睇得多,真身第一次見,再襯埋上手…… 42mm算係大小適中,錶底弧位幾貼手, 300米深潛,不過冇鎖霸,奇!係覺得條膠錶帶「削」咗少少,撐唔起一隻六萬蚊嘅錶。另外,個 ADLC處理嘅單向計時外圈異常「令立立」,啲刻度亦略嫌唔夠深,少咗啲剛陽味,即係唔夠 man。不過,整體感覺良好,一望就知係卡記出品。


劉定邦 

Calibre de Cartier Diver一出就有三個型號,全鋼($61,000),金鋼($78,500),同全金($209,000),全部配膠帶……自己覺得金鋼「合理」兼搶眼。 

text:科技組

    全站熱搜

    tvb4life 發表在 痞客邦 留言(0) 人氣()