亂噏24:陳果開竅 多得蔡瀾

#video_player{width:100%;height:100%;}


■肥佬黎笑陳果(左)叫自己做Fruit,一定「特別」啦!攝影:馮就康

草根導演陳果執導的《那夜凌晨,我坐上了旺角開往大埔的紅VAN》勢如破竹,上映一周已衝破千萬票房,當中的政治隱喻更引起網民無限解讀。但早在《紅VAN》之前,陳果其實拍過一齣荷李活爛片,之後又因拍文革題材電影險些遭內地禁映,他會在今集《亂噏24》詳細剖白。節目足本版逢周四晚上11時播出,讀者可在http://bit.ly/appletalk24重溫。
撰文:馮國康、Sidekick

Ads by Google

今日的陳果能獨當一面,拍出自己的風格,且能在獨立和商業之間游走,全靠蔡瀾當年一句話,對他影響深遠。陳果首部作品《大鬧廣昌隆》便是由蔡瀾監製,當年他們在日本一寺廟拍攝落雪鏡頭,一直等到晚上也沒有下雪,其時蔡瀾在他耳邊說了一句話:「阿果,你以後做導演咁樣拍法,你返屋企都得!」陳果牢牢記下這句話,自此拍戲全部「不求人」。

 

從大島渚得啟發

陳果在節目中說:「我知道呢部戲(《紅VAN》)上唔到內地,又唔想老闆蝕,希望喺原有budget度再平一啲拍,加上演員幾合作,變咗部戲有一個幾特別嘅signature。」蔡瀾說:「佢係主流出身,但係對大商業片幾排斥,佢想自己行一條路出嚟,結果真係畀佢行出一條路。」黎智英認同:「聽佢個名就知特別啦,點會叫自己做Fruit!」陳果儍儍一笑:「符碌陳呀!」然後續說:「其實我唔係排斥商業電影,但你想做出位係好難,因為商業電影好難有自己嘢。」後來他從日本大導演大島渚得到啟發,以低成本探討社會問題,令他拍出「回歸三部曲」及「妓女三部曲」等佳作。
普遍人認為陳果對上一部拍的長片,已是十年前的《三更2之餃子》,其實五年前他拍了一部荷李活鬼片《Don't Look Up》,他形容為人生污點,陳果不忿氣的說:「我未試過發誓要拍一部爛片!」他解釋當年純粹抱着挑戰心態接了這齣戲:「日日去到現場好似死咁滯,拍咗三十組拍晒,本來四十組,但因為冇budget,個個部門要晒嘢之後cut我budget,結果梗係一pat屎啦!」
陳果直言有想過中途離場,因當年也有少少名氣,但後來計算過仍覺得「有着數」和「輸得起」,便硬着頭皮完成。肥佬黎問有甚麼着數?他笑笑口說:「咪攞一次經驗囉!我去到LA都好慘㗎,日日call章小蕙、盧燕姐傾吓偈申訴吓,盧燕姐又教我如果將來要喺度拍,你一定要有晒劇本,掛埋producer你就有話事權。」後來有荷李活片商向陳果招手,但他認為不是自己的故事而婉拒,他說:「發覺都係香港好啲,自己地方。」


■陳果第一部執導電影《大鬧廣昌隆》由蔡瀾監製。


■執導的首部荷李活片《Don't Look Up》,陳果形容為人生污點。

成都短片惹迴響

四川發生大地震後翌年,陳果獲內地邀請拍了一段短片《成都我愛你》,豈料一度被禁,原來跟當中一幕毛澤東逝世的片段有關,他說:「之後上去講數,剪咗一場戲之後畀我放。你知毛澤東死嗰日好多人喺條街度喊,我一個shot由街度track落嚟,成個茶館二百幾人同時喊,一路track到入房,見到女主角,佢因為失戀喊唔出,跟住第二個shot拍佢離開茶館走出街,街度都有人喊。佢哋叫我剪走呢場戲,因為同歷史不符。」陳果被迫就範,當時感到很失落。但該短片在內地引起極大迴響,有人評價那是陳果電影生涯其中一部代表作,因他夠膽拍男主角經歷文革後感到懺悔的故事。
《紅VAN》的主要對象為年輕人,一班年輕演員如黃又南、徐天佑和文詠珊(Janice Man)自然孭重飛。天佑和又南是陳果帶入行,不過天佑記得當日遇上導演時,一度以為他是騙徒,他說:「嗰日喺旺角警署出面,突然間陳果走埋嚟,問有冇興趣拍廣告。因為嗰陣時好多呃人騙案,但嗰時諗我又冇錢,都冇嘢畀人呃,如果佢要錢我咪走囉,點知原來係真嘅。」
那是一飲品廣告,天佑分享當日casting的趣事:「咁我拍檸檬茶廣告,梗係諗住學生王子加個女仔啦,點知上到去casting,就一個鏡頭影住我,問我好多問題。跟住過咗兩日,導演就話個廣告已經拍完,原來就係casting嗰啲嘢!」
陳果憶述:「其實個廣告要真,咁佢當時都有少少寸嘅,乜都死撐。佢話演技得吖嘛,做李小龍睇睇,點知佢反問有冇劇本吖?跟住我叫佢演周星馳,佢又話唔得,話啲戲好渣,總之死拖死撐,佢撐咁耐我就拍咁耐,咁就成為咗個廣告片。」


■陳果(右二)與崔健(左二)為四川地震執導的《成都我愛你》,當年成為威尼斯影展閉幕電影。資料圖片


■又南在《紅VAN》與陳果再度合作。劇照

又南則是拍攝陳果的《香港有個荷里活》出道,又南記得當時他還在讀書,導演堅持要他讀完中五才可拍攝,他說:「佢驚我入咗行之後,冇機會再讀書。」肥佬黎說:「咁呢個導演都算有啲良心喎!」
電影其中一幕講述又南斷手,要放聲大哭,事前導演講明不提供眼藥水,要他真情演繹。又南憶述說:「我記得導演同我講,今日你最大,反而壓力最大。」他最初拍了一次,看playback時覺得不夠好,第一次拍戲又不想有遺憾,故要求拍第二take,但第二take卻哭不出來,哭的竟是副導演。又南說:「我好記得副導演話唔好放棄呀,跟住導演話『我放棄,全部收工』,副導話唔收得住,我望到副導演喊晒,自己就嚟料!」陳果坦言當時的說話也很難聽:「嗰時候佢鍾意做車房仔,我就同佢講話你做唔到呢場戲,你返去做車房仔啦!都有少少侮辱性,佢都好委屈。」又南拍完該場戲後徹底崩潰,沿途返家一直狂哭,之後三天沒有說話。


■蔡瀾指陳果拍出自己風格。

JM越拍越鍾意

至於Janice Man從未想過拍戲,當初做兼職模特兒只是想賺零用錢,到後來發現自己跟藝人沒太大分別,便決心做藝人,她笑說:「已經冇咗正常生活,咁我咪好唔抵?所以咪試吓。」結果一拍便愛上演戲,因為每次接觸的角色都不同,感覺很特別。


■Winnie愛幫新導演,黃修平是一例。

曾麗芬投資預蝕

Golden Scene老闆曾麗芬(Winnie)繼去年投資黃修平的《狂舞派》後,今次再為《紅VAN》出資。肥佬黎欣賞Winnie對電影有份激情,才會放膽投資。不說不知,黃修平對上一部作品《魔術男》,也是Winnie投資,當時她明知有可能蝕錢,都要幫這些新導演一把,她說:「我覺得佢(黃修平)做咗好多嘢,幾年都開唔到戲,結果幫咗佢。」
合拍片有特定規限,如要用內地演員,部份場景也要在內地拍攝,因此通常由內地女星擔任女主角,Winnie說:「我哋(香港)男主角比較強,如果唔強,第日連男主角都冇埋。」

米芝蓮呃人 德國兩星餐廳無廚神
http://bit.ly/talk244001

難忘蔡生一席話 造就今日「符碌陳」
http://bit.ly/talk244002

錯就要認! 文革歷史誓要撥亂反正!
http://bit.ly/talk244003

陳果勇闖荷李活 誓拍人生第一部爛片
http://bit.ly/talk244004

街頭被誘拍廣告 最後變明星實錄
http://bit.ly/talk244005

又南喊唔出 俾陳果叫佢返車房做
http://bit.ly/talk244006

做幕前第一戒 要有中五學歷?!
http://bit.ly/talk244007

女神突變?!JM拍紅VAN玩驚嚇
http://bit.ly/talk244008

為咗電影夢 可以蝕到幾盡?
http://bit.ly/talk244009

潮流只興合拍片 成龍喺香港都唔掂
http://bit.ly/talk244010

    全站熱搜

    tvb4life 發表在 痞客邦 留言(0) 人氣()