歐洋風

哥斯拉敢收你錢

事情發生在 1998年。同家人打完邊爐,我提議睇場戲,一行 6人去了銅鑼灣的戲院。
我和姐姐和另一朋友決定睇《哥斯拉》,因為細路仔嗰陣睇開。
點知兩個鐘後,我哋全部無語。

Ads by Google

基於睇戲前必須先俾錢,即使我想廣傳話電影唔好睇都已經蝕咗 360蚊。
好在今年有套新版《哥斯拉》,無論形態外表、潛在寓意,全部喺晒度,適逢今年又係「哥斯拉」誕生 60周年,呢隻經典怪獸絕對值得你扲荷包,買飛入場朝聖。

 


哥斯拉真身一直保持神秘,早前英國電影雜誌《 Empire》 4月號,公布經典巨獸嘅真面目,驟眼睇同原著有七、八分相似。

茶包一個值幾多錢呢,為咗三個茶包而鬧人蠢,就立即可以損害你的聲譽。呢個 case,正正同 1998年嘅《哥斯拉》一樣。
係人都知,「哥斯拉」喺日本人心目中幾咁神聖。 1954年推出第一集,內容講二戰講原子彈,充滿反戰嘅警世意味。點知 1998年落到美國人手,變到阿媽都唔認得。論外形,似《侏羅紀》嘅暴龍;論劇情,淨係有破壞冇建設。最離譜係「哥斯拉」竟然識生蛋,同原著完全係兩碼子事。
一隻經典巨獸好值錢㗎,不過一個壞 remake就立即可以損害聲譽。結果上至粉絲下至我,全部插爆。 2001年,製作公司東寶更將 1998年呢齣失敗之作,刻意正名為另一隻怪獸「吉拉」,企圖為「哥斯拉」洗底。

有原著神髓

經過咁痛苦嘅 remake,加上觀眾逐漸流失,東寶喺 2004年宣布十年內唔會再推出「哥斯拉」電影。直至今年,粉絲又有福嘞。
新版《哥斯拉》(美國、香港 5月 15日同步上映)係根據 1954年電影原著改編,不單保留經典背鰭,身高更由原先嘅 50米激增至 100米。啱數噃,家下啲樓動輒幾十層,「哥斯拉」又點可以唔與時並進呢?
古仔亦跟足原著,圍繞大自然懲罰人類嘅主題。日本核電廠因地震發生意外,不過所謂嘅地震其實並不簡單。同一時間,兩位科學家發現巨獸嘅藏身洞穴。鋪陳一大輪,哥斯拉終於出嚟大肆破壞。據知導演更會安排另外兩隻怪獸同「哥斯拉」對打。跟足原著兼顧埋官能刺激,各位死忠粉絲或者普通觀眾,應該可以放心喎。


50年代曾發生「第五福龍丸」事件,美軍當時喺馬紹爾群島試射核彈,令第五福龍丸上嘅船員受到核污染。電影將事件融入劇情,講美國發射核彈並非試核,而係對付哥斯拉至真。 

渡邊謙飾演科學家,致力尋找傳說中嘅哥斯拉。 


1998年嘅《哥斯拉》,淨係望張相都知出事!任何一忽都冇原著神髓,完全唔知想點。 

法國女星茱麗葉庇洛仙平日拍開文藝片,今次睇過劇本,都忍唔住破例參與,飾演主角母親,慘死於核電廠意外。 


自媽媽死後,爸爸致力尋找意外原因而忽略主角,搞到父子關係疏離。不過自哥斯拉甦醒後,兩仔爺冰釋前嫌,合力拯救人類。 

哥斯拉甦醒,大肆破壞人類文明。導演話,哥斯拉象徵大自然嘅黑暗面,係要人類反思自己嘅行為。當然啦,你唔反思,都可以當特技片睇嘅。 


主角由阿倫泰勒約翰遜飾演,佢前作有《勁揪俠》,早前更喺《美國隊長 2》片尾出現,飾演「奇跡兄妹」之一,亦即係日後嘅 Quicksilver。 

「奇跡兄妹」嘅妹妹 Scarlet Witch,由伊麗莎白奧爾森飾演。佢今次喺《哥拉斯》扮演阿倫老婆,負責生離死別玩煽情。 

撰文:娛樂組

    全站熱搜

    tvb4life 發表在 痞客邦 留言(0) 人氣()