娛頭

劉丹怕•回家 劉愷威趕裝修 楊冪大肚惡晒

預產期在六月底的楊冪,為 BB有居港權,放棄在老家北京分娩,上月底來港安胎準備生 B。
貴為國內一線花旦,楊冪居港期間,寄住在老爺劉丹位於沙田世界花園寓所,要同老爺奶奶同居,偏偏這段時間老公劉愷威要留在大陸開工搵奶粉錢,未能陪伴在側,加上同兩老生活習慣、文化差異分歧,朝晚見住引起唔少磨擦,搞到大肚婆脾氣變得更加暴躁。
為了安撫老婆,早前劉愷威專登抽時間撲返香港,催促新屋裝修工程,務求安排楊冪盡快搬走;而老爺劉丹為免成為老婆同家嫂的磨心,由向來愛回家變為怕回家,唔使開工,都要離家鬆一鬆,出走去打波避風頭。

Ads by Google

獨對兩老

今年一月,楊冪同劉愷威在峇里舉行婚禮後,隨即宣布有喜三個月。
在北京生活的楊冪,原本打算留在老家生 B,以便父母照顧,不過,老爺劉丹急於抱孫,多次勸劉愷威氹掂老婆來港生。
「最初小冪(楊冪)唔想喺香港生,諗住有自己阿媽睇住,方便照顧,但愷威話 BB喺香港出世,一出世就會有居港權,唔使再搞手續申請,又要住七年先可以攞到三粒星;又話香港嘅醫療設備一定比大陸好。為咗 BB着想,最後小冪都答應嚟香港生。」劉愷威身邊人說。
今年三月,楊冪在上海拍完電影《小時代 3》後,便移駕香港待產,並入住老爺劉丹沙田世界花園寓所,同老爺奶奶一齊生活。
楊冪和劉愷威由拍拖到做劉家新抱超過三年,但其實和劉家兩老相處時間並不多,關係生疏;劉愷威安頓好老婆留港待產後,又撲返大陸為新劇埋尾,大肚楊冪獨自面對兩老,加上生活習性不同,相處亦開始出現問題。


上星期楊冪外出產檢,奶奶雖然伴住,但兩人恍如陌路人,佗住七個月肚的楊冪行動迅速,冇理會奶奶。 

今年一月楊冪同劉愷威在峇里結婚,楊冪要全權話晒事,雙方家長甚少交流。 

唔肯食燉品

「相見好同住難!更何況大家之前關係又唔係特別好,好似搞婚禮嗰排,小冪乜都要話晒事,唔理老爺奶奶意見,丹爺(劉丹)同記者講咗少少婚禮內容,小冪都好唔高興,同愷威詐晒型,之後丹爺每次俾記者問到有關新抱啲嘢,都唔敢再爆響口。」
兩地人思想、習慣差異大,加上大肚婆情緒易波動,楊冪同老爺奶奶住唔夠一個月,已經嚟料。
「小冪住唔夠兩個禮拜,已經頂唔順。丹爺丹嫂見新抱佗住金笸籮,梗係服侍周到,燉好多補品俾佢食,點知小冪話自己食素,唔肯食啲燉品,嘥晒奶奶啲心機;但轉頭佢突然又話大肚婆會變口味,一話想要食 pizza同燒鵝,就打電話俾老公,等愷威叫丹爺去買俾佢食,總之乜都經愷威把口,點都唔肯自己同老爺奶奶講。大肚婆食呢啲嘢,做奶奶梗係覺得唔健康冇營養,難免會哦幾句,小冪當然唔理咁多,有時仲嫌兩老煩,喺屋企好多時都匿埋喺房。」劉愷威身邊人說。


劉愷威早前返港,除了安撫老婆同阿媽外,另一個主要目的就是到新居催促裝修進度。 

13年劉愷威以公司名義,用三千萬買入半山蔚皇居單位,該公司楊冪佔 40%,劉母只佔 21%。 

星期日 Family Day劉丹兩公婆約埋阿女同未來女婿食晏,但楊冪唔肯出席應酬。 

家有惡妻

童星出身,北京電影學院畢業的楊冪,一一年憑電視劇《宮》在內地爆紅,成為新一代女神。雖然經常被指整容、扮大牌,又試過在國際影展豎中指及被同學翻舊賬,負面新聞一大籮,但一線花旦地位及身價,依然硬淨。

求學期惡行

舊同學大爆讀書時期的楊冪經常染髮搽指甲油,又在校內聯群結黨,與兩個老友被同學稱為「三賤客」,又被人將她豎中指的照片放上網。

康城豎中指

12年 5月,楊冪首次進軍康城影展,當時有指外籍工作人員嫌楊冪在紅地氈逗留太耐,要求她離開,楊冪不忿向對方豎中指。

野蠻新抱

去年與劉愷威註冊,今年初在峇里補辦婚禮,有指楊冪恃肚橫行,婚事由女家話晒事,更要求男家讓出半圍主家席給女家親戚。

大肚黑面

今年初,劉愷威到上海拍攝新劇,即使女主角是好姊妹唐嫣,但楊冪依然唔放心, mark到實監場,見老公攬住唐嫣演戲,即場黑面。


阿媽佔細份

收到風婆媳關係開始變差,為免小事化大,劉愷威三月底一完手上工作,迅速回港拆彈。
為了安撫老婆,原本打算讓楊冪在老豆屋企坐完月,才搬去中環半山蔚皇居新屋的劉愷威,決定改變初衷,盡快搬走,避免老婆和老媽子之間的磨擦,進一步惡化。返港期間,劉愷威經常單獨到新居視察裝修情況,催促裝修工人盡快起貨,之後,又趕返橫店,繼續拍劇。
「之前愷威未結婚就買樓送俾楊冪,當時丹嫂有啲唔高興,雖然後來層樓落埋阿媽個名,但楊冪佔 40%,丹嫂得 21%,緊邊個多啲,一清二楚,做阿媽嘅點會開心,雖然仔大仔世界,但個心就會有條刺。」知情者說。
楊冪留港待產已一段時間,但一家人極少一齊出外,好多時甚至各有各食。上月底,劉丹兩公婆約了女兒和未來女婿在尖東富豪酒店食晏,楊冪並無蒲頭。


楊冪在上海拍罷《小時代 3》,劉愷威隨即人肉護航,送老婆回香港安胎。 

正在橫店為新劇《暴君的溫柔》開工的劉愷威,不時在微博同楊冪打情罵俏。 


劉愷威去銅鑼灣 fresh專櫃為楊冪購買適合大肚婆使用的補濕面膜。 

執完樣執錢

北上搵食多年的劉愷威,整容大變樣後,運勢亦有改動,由奀星變男一,套套擔正,不過,相比同樣係整容樣的內地一姐楊冪,劉愷威的身價和吸金能力,始終差老婆一大截。


流連球場

上星期四(四月十日),楊冪夠期做產檢,老公不在香港,唯有靠奶奶做水泡。現場所見,兩婆媳甚少交流,做完檢查返屋企,粗身大細的楊冪一支箭標入大廈,無理過行後的奶奶丹嫂。
至於戲內戲外都是一家之主的劉丹,現實生活中開始,變得不「愛回家」。自從與新抱同住,家中多了一個女主,夾在老婆和新抱之間,老爺劉丹「怕回家」,唔使開工,都唔願留在屋企,寧願約朋友球場流連。
上星期,記者發現劉丹連續兩日到何文田打網球,每次由下午三時打到近六時先捨得走。減少留在家中時間,避開屋企兩個女人。


未懷孕前,楊冪擁有 34E魔鬼身材,加埋人工天使面孔,相當殺食。 




12/4週末,劉丹一連兩日寧願到球場打波,打到上氣唔接下氣,都唔願喺屋企。 

13/4

長期戰

婆媳關係向來是學問,阿媽年代,奶奶惡晒,做新抱艱難,但現世代女性,唔會忍氣吞聲,婆媳大戰,爆完又爆。

李嘉欣

08年嫁入許家後,有指李嘉欣一直得不到許世勳夫婦歡心,婆媳間常有拗撬。小 JM百日宴,許老太想以中菜招呼客人,但李嘉欣堅持食西餐;又試過同老公去歐洲一個月,卻將小 JM送返娘家照顧,搞到嫲孫冇機會見。

張栢芝

06年與謝霆鋒秘密到菲律賓結婚,事後拉姑大動肝火唔認新抱,鋒芝離婚後,拉姑仍埋怨多年來只上過兒子愛巢五次,甚少見到兩個孫仔。

江希文

資深大律師胡漢清去年與母親莊永楚展開隔空罵戰,事後新抱江希文連發 13條微博炮轟奶奶,指對方只向錢看,胡老太繼而反擊:「餘生唔想再見(江希文)。」

劉嘉玲

08年,劉嘉玲與梁朝偉在不丹搞婚禮,終於正式做梁太,但有指朝偉媽一直不滿新抱 open多緋聞,婆媳關係一般。


撰文、攝影:娛樂組

全站熱搜

tvb4life 發表在 痞客邦 留言(0) 人氣()