Darling指熊大性格膽小兼坐唔定,但採訪當天牠卻肯坐定定讓記者拍照,她笑說非常神奇。 

Petbook

慘情鬆獅狗 重投生活

不論對人對狗,暴力從來不是解決問題的辦法。鬆獅狗熊大自小被主人困在籠中及虐打,面對長達 5年的身心虐待,連對食物的認知也沒有,幸好新主人 Darling將牠帶回家,用愛將牠感化,令牠重新投入生活,重建對人的信心。

Ads by Google

姓名:熊大(已絕育)
年齡: 6歲
性別:男
品種:鬆獅犬

 


熊大見到陌生人,便會驚到匿落枱底。 

採訪當日,記者來到 Darling位於元朗逢吉鄉的影樓,當鬆獅狗熊大見到記者,便飛快地躲進枱底,行為像一樣怕事的貓仔,「熊大好怕陌生人,特別係男人添,佢一見到就會即刻匿埋,有時想捉都捉唔住。」
Darling是一名寵物攝影師,平日工作以接 freelance和為寵物雜誌拍攝硬照為主,但原來她曾是一名怕狗之人,「我以前一直以為狗冇性會亂咬人,所以我好怕狗,但喺約 2年前,有次同朋友去西貢上山影相俾野豬追,當我好驚唔知點算之際,突然有 2隻野狗跑出嚟趕走咗隻野豬,之後仲帶番我哋出大路,自此我就唔再怕狗,仲因為呢件事我決定唔再影婚紗相,轉行影寵物。」
1年前, Darling開辦寵物影樓,並萌生養狗的念頭,「當時心諗冇理由幫人影狗仔相,但自己冇養狗㗎!橫掂𠵱家空閒時間多咗,就決定去領養一隻狗返嚟陪吓自己。」

一見如故

當時 Darling去到 Hong Kong Dog Rescue,並遇上熊大,他們一見如故,「事前我都冇諗過想養咩狗,都係啱心水就得,但一上到去,就見到有隻鬆獅狗縮埋一角,成身仲好污糟,當佢望住我嗰陣,佢好似話我知佢等緊我咁,結果我當日就帶咗佢返屋企。」
當時熊大的身體狀況不算差,只是後腳有點乏力,但精神方面卻叫 Darling十分擔心,「當時熊大極度怕人,咩人行埋去佢度都好似驚到要死咁,最得人驚係我餵狗糧以外嘅食物畀佢食時,佢竟然唔識得食。我估佢前主人應該成日困住佢同打佢,令到佢好驚人,連對食物嘅認知能力都冇埋。」


為了讓熊大重新適應生活, Darling每天都會帶牠上班見多點人和狗。 

熊大視老虎狗波士(右)為大佬, Darling指牠們感情十分要好。 

熊大現在已經是一隻為食仔,見到骨頭會舔舔脷。

重投生活

為了令熊大重新投入生活, Darling用盡方法,甚至寵物傳心術都試過,「寵物傳心師話熊大經常俾一個食煙嘅男人打,先搞到佢咁,仲話我同佢係幾世姻緣,今生要還畀佢添,呢啲聽完就算啦,點都好!我𠵱家每日都會帶佢返公司,等佢接觸多啲人同其他狗,仲要餵佢食多啲唔同嘅食物。佢最近好咗好多喇,已經冇咁怕人,仲好鍾意食蛋糕仔添!」
最近 Darling領養多一隻老虎狗,陪伴熊大玩耍,「隻老虎狗都成十歲喇,熊大當正佢係大佬咁,兩個關係好好,熊大都開心咗好多,希望佢可以快啲忘記過去嘅痛苦回憶啦。」


身為寵物攝影師的 Darling,會不時為熊大扮女僕影硬照,認真搞笑。 

想領養狗狗嗎


Hong Kong Dog Rescue(救狗之家)會拯救在漁農自然護理署被主人遺棄並等候人道毀滅的狗狗,被救出來的狗會安排到暫養家庭代為照顧,然後等待被領養。如果你有想為這些被遺棄的狗提供一個重生機會,就可以到網頁http://www.hongkongdogrescue.com/public/index.php ,查詢領養資訊。


撰文:何倬然
攝影:葉偉豪

    全站熱搜

    tvb4life 發表在 痞客邦 留言(0) 人氣()