創業通

西班牙藝術風情 Vis Passio 地址:銅鑼灣軒尼詩道 505號電業城( Solo Building) 9樓 903號鋪 網頁: http://www.vispassio.com 

4年一度的世界盃在 6月於巴西舉行,提到足球,不能缺少西班牙,西班牙可謂當今體育強國,足球、籃球及網球均是世界頂級,其實西班牙也是藝術之都,大家熟悉的畢卡索及達利亦出身於西班牙!
畢卡索及達利的抽象與超現實主義畫風、建築師高廸的馬賽克及幾何造型建築風格,全體現於西班牙的每個角落。
Kevin與太太 Terry因一次西班牙之旅,見到當地的首飾將西班牙建築及藝術風格融入設計中,非常獨特,故萌起賣首飾的念頭,將這股異國風情引入香港!

Ads by Google

專賣西班牙首飾的店鋪 Vis Passio,現售 6個西班牙品牌的首飾,包括 Fink、 Ciclon、 Mercedes、 Ras、 Pastacuita及 Ardentia等,這些以通花、馬賽克、陶瓷花、軟陶設計的耳環、手鏈、頸鏈、戒指及心口針等,全由人手製造,部分設計更富有當地著名建築的風格,十分有藝術氣息!
店主 Kevin與太太 Terry於 13年 12月底成立 Vis Passio,主攻 25至 40歲的女性市場。 Vis Passio乃西班牙語中「熱忱」的意思,可見他們對藝術的熱愛。
這次創業源於他們於 12年 9月第一次到西班牙的巴塞隆拿旅行, Terry笑言當初只是在當地街中閒逛,無意中發現別致小巧的首飾,她曾任小學美術老師,故很看重飾物的設計與藝術感,她最為欣賞仿藝術家及建築師高廸設計的首飾,「設計師融合當地嘅建築及藝術特色,用好多幾何圖形,仲會偏向多啲色彩,畀人熱情嘅感覺!」


西班牙街頭滿是高廸風格的幾何圖形建築物,如巴塞隆拿的米拉之家的大門,全用以曲線幾何組成。 

品牌 Fink的設計,仿傚高廸的建築特色,用以深色的銀器配以曲線幾何圖形造成耳環。黑銀水滴形通花耳環(針式),售$550。 

品牌 Pastacuita用軟陶製造不同的飾物,其中的靈感來源自馬賽克圖案。方併砌軟陶戒指,售$188。

西班牙很多傳統建築都喜用馬賽克,除了大型的建築外,桂爾公園裏還有其他藝術品,如這個石牆亦採用馬賽克方法建造。 

正方形四格軟陶耳環,售$198。 

品牌 Ardentia的戒指由圓形圖案拼湊而成。彩色圓點併砌戒指,售$680。

位於巴塞隆拿的桂爾公園,亦可見高廸的設計,窗框邊用彩磚以馬賽克方法拼出小圓形圖案。 

品牌 Ras所設計的耳環,全為曲線修長的設計,營造神秘、森林的感覺。磨砂白 Fairy耳環,售$190。 

高廸喜歡把幾何曲線融入設計中,圖為奎爾宮的大門。

富藝術色彩

Kevin從事商品網上生意,自與太太遊歷西班牙後,愛上當地的藝術色彩,因此萌生賣首飾的念頭,「我哋都覺得西班牙嘅首飾好特別,於是我哋上網搜集資料,發現香港大部分首飾都係走日韓風,好少鋪頭賣西班牙首飾,所以有得諗!」 13年 9月適逢於馬德里舉行珠寶展覽會, Kevin與 Terry便參加,找尋商機。
「我哋唔想喺街邊見到靚,就買返嚟轉賣,咁樣人人都做到啦!我哋想搵廠商入貨,確保貨源之餘,又可保證質素。呢次展覽會,我哋搵咗 4間有潛質嘅供應商,分別係 Fink、 Ras、 Ciclon及 Ardentia,大部分都係中小企,因規模較細,所以佢哋喺亞洲冇代理,知道我哋想喺香港推廣,就好樂意同我哋合作!」


Kevin夫婦覺得桂爾公園內的各種建築物及擺設都充滿藝術感,觸發不少靈感。 

巴塞隆拿著名的聖家大教堂由著名建築師高迪設計,從 1882年開始修建,至令乃未完工。 Terry表示,她很喜歡高廸的設計,覺得十分宏偉,所以當首飾結合高廸的設計元素,令她非常着迷。 

溝通有困難

然而, Kevin坦言與西班牙人合作,溝通上有一定困難,「我哋唔識西班牙文,大家都係用簡單嘅英文溝通,有時我哋仲要靠 Google translate嚟做翻譯!有啲情況會麻煩啲,例如隻戒子用銀造,但銀都有分『令面』及『啞身』,有光澤及磨砂,呢啲好難去表達,顏色方面都係一樣情況,我哋要用埋圖片去表示,減低出錯及誤會嘅機會。」
此外,時差與文化差異亦是他們所面對的困難,「西班牙比香港慢 7至 8個鐘,香港咩都要快同講效率,做乜都好緊張,而西班牙人做嘢冇咩壓力,好多時佢哋回覆 email都比較慢,可能要等兩三日先會覆你。」
雖然很多方面都需要磨合與適應,但 Kevin與 Terry很欣賞當地人的隨和與友善,「我哋除咗去馬德里嘅展覽會,仲去咗巴塞隆拿嘅街頭攤檔睇吓有咩特別飾物,俾我哋發現咗一啲用軟陶整嘅飾物,用手搓成唔同嘅圖案,再焗到變硬。」情況與製作牛皮糖的原理相似,他們即日於網上找該設計師的聯絡方法, Kevin回憶起仍十分緊張,「嗰晚凌晨 12點先搵到佢嘅聯絡方法,決定第二朝一早去工作室搵佢!」


Mercedes的陶瓷花耳環,亦是他們的主打,「冇諗過陶瓷花咁好賣,因為造型比較復古,但𠵱家好多人鍾意 vintage,一個月都賣到 50對!」粉紅紫玫瑰雙花陶瓷心口針,售$580。 

華倫西亞的瓷器很出名,街頭也看到由陶瓷製成的長凳。 

上門傾合作

翌日他們成功找到品牌 Pastacuita嘅設計師 Mariano,「當時佢個樣仲係睡眼惺忪,初頭覺得好奇怪,唔知我哋咩事,好彩佢都識少少英文,我哋話佢嘅設計好靚好有特色,想同佢合作,等佢嘅設計可以喺香港賣。」設計師有意合作之餘,亦被 Kevin夫婦親自拜訪的誠意打動, 3人可算是一拍即合。
他們設立 Vis Passio網站,客人可於網站內購買各種飾物,價錢介乎於$150至$1,000不等,「我哋仲喺 facebook開專頁宣傳、買 google嘅搜尋字,希望多啲人會搜尋到我哋。我哋都試過喺 yahoo拍賣網開 shop,但我哋嘅定價算高,而拍賣網賣平嘢為主,反應麻麻,開咗一個月就冇再用。」
網站的生意不錯,每月約有 20張單,營業額達 3萬,「有位客人反映,佢想買幾款首飾,但想睇咗實物先買,咁會有信心啲。我哋見生意都開始穩定,決定開實體店。」


Kevin(左)與太太 Terry都愛西班牙的藝術情懐,他們希望日後能引入男裝首飾打開男性市場。 

他們的實體鋪位於銅鑼灣電業城 9樓,人流低,但他們採取 show room形式營運,故不擔心人流問題。 

Show room睇實物

14年 2月, Kevin與 Terry於銅鑼灣 Solo開設樓上鋪,「有睇過尖沙咀嘅樓上鋪,面積約 100呎起要 1萬以上,最後就揀咗銅鑼灣 Solo,𠵱家呢度約 70呎,月租 5千,雖然呢度人流差啲,但人流唔係第一考慮因素,我哋想租間鋪嚟做 show room,等啲客喺網上睇完,再落嚟睇實物,亦可作交收之用,有實體鋪畀到客人信心。」開設實體店後,戒指比以往好賣,因客人可以先試大小,比較便利。
Kevin坦言大廈於地下大堂設有宣傳單張供途人取閱,作用卻不大,故他們仍主要以網站及 facebook宣傳,日後考慮以 instagram等途徑讓更多人認識。「我哋希望每年 keep住去西班牙兩次,親自發掘地道嘅首飾,畀客人更多選擇!」


13年 9月, Kevin與 Terry(右)拜訪 Pastacuita的設計師,對他們突如其來的邀請,設計師 Mariano(左)感到驚訝,卻又很樂意和他們合作。 

品牌 Ciclon的飾物偏向型格路線, Kevin更計劃引入其男裝首飾系列。銀手鏈,售$520。 

客人  Annie

我之前喺 facebook留意到 Vis Passio,見佢哋喺銅鑼灣開咗實體鋪,所以上嚟睇吓,實物比相片更加靚!特別係陶瓷花耳環,好別致!

開業成本

租 金:$15,000(兩按加一上)
裝 修:$10,000
入 貨:$100,000
總投資:$125,000

每月收支

租 金:$5,000
人 工:$20,000(老闆 2人)
入 貨:$40,000(連雜貨)
營業額:$80,000
盈 利:$15,000

Vis Passio

地址:銅鑼灣軒尼詩道 505號電業城( Solo Building) 9樓 903號鋪
網頁: http://www.vispassio.com 

點入貨?

西班牙每年 2月及 9月都會舉辦珠寶展覽, Kevin與 Terry表示每年都會到當地參與 9月份的珠寶展,從中發掘更多有潛質的供應商。參展商多為當地的中小企業,而且很少於亞洲有代理商,主攻歐洲市場,故可嘗試與他們合作,令其品牌攻入亞洲市場。但因各個參展商的參展資格不同,故不是每一間都可以買賣 sample,需多加留意。「現時供應商冇限我哋每年入幾多錢貨,不過我哋希望每個品牌一年入到約 20萬貨。」

歐洲珠寶首飾展覽會

查詢: http://www.jgf-europe.com 


撰文:霍芷晴
攝影:彭自維
部分圖片由被訪者提供

全站熱搜

tvb4life 發表在 痞客邦 留言(0) 人氣()