Rodney示範中高難度的單腳斜起後空翻前後分腿,氣勢十足。 

青雲路

勁過敖 sir 凌空 tricking

Ads by Google

早前在電視劇《叛逃》中,敖 sir(關禮傑飾演)以破地心吸力的姿態跨越天台,令一眾網民大呼不可思議,並推出不同惡搞版, YouTube點擊率合共近百萬!
事實上,可做出反地心吸力的動作,大有人在,凌空旋風腿、自轉 360度踢腳,這些來自 tricking動作,猶如格鬥遊戲的招式,玩了 tricking超過 10年的 Rodney,在 10年開辦了香港首間以 tricking為主題的
場館 Trickstation,教授學員一系列高難度動作,原地空翻易過借火,連敖 sir都要讚好!

 

 


勁喎!設計對白 

電視劇《叛逃》中,敖 sir示範跳樓,遭網民惡搞。 

咩係 tricking?


現開了 Trickstation, Rodney有了固定場地玩和教 tricking。 

Tricking是一種結合了武術、體操、街舞以及各種表演形式的運動,起源於 60年代美國空手道,當時比賽其中有個環節叫自選套路(creative form),參加者需要耍出連串招式,難度愈高得分就愈高,某部分人開始加入一些空翻或其他門派的招式,慢慢演變出 Tricking。 Trick解作花式,表演者將各種高難度花式動作進行自由組合,就叫做 tricking。 Tricking現流行於歐美,是極限運動的一種。

 

採訪當日, Rodney在荃灣公園內,向記者示範甚麼是 tricking,腳刀、後空翻前後分腿、側直翻,猶如格鬥遊戲中的動作,引來不少途人張望。 Rodney表示:「 Tricking主要由踢腳、轉體、翻騰幾個基本動作組成,但你可以自由組合,想點玩就點玩。」
對於 tricking的熱愛,緣於 Rodney喜歡挑戰自己,「自己對武術、體操都好有興趣,而 Tricking包含咗體操、雜耍、跆拳及空手道等運動當中嘅高難度動作,自己可以將佢哋自由組合再展示出嚟,難度幾高。」
Rodney自少便十分好動,被家人捉去學體操,使他對具挑戰自我的運動產生興趣,「 9歲同屋企人移民澳洲,屋企人見我成日紮紮跳,捉咗我去學體操,喺嗰邊入咗個體操會,周圍去比賽,諗番起嗰時成日拉筋、壓腿,真係幾辛苦,不過當完成一套動作,會好有成功感,而且唔係人人都做到,好有挑戰性。」
在澳洲讀書期間, Rodney開始接觸 tricking,「學體操時,喺網上見到有人玩 tricking嘅片,覺得幾好玩,自己學體操又識空翻,就斷續續咁睇片自學,始終冇人教。」

返港學藝

修讀媒體製作的 Rodney,於 03年大學畢業,隨後回流香港,「當時返嚟香港參加家姐嘅婚禮,咁啱見到有私人開嘅特技人課程,於是就報讀,留喺香港繼續發展。朝早返工,做過網頁設計、英文補習,夜晚就跟師傅學嘢,好似點就鏡頭做動作、拳腳節奏點打先令觀眾覺得好睇。雖然冇咩私人時間,但唔覺得辛苦,反而發現坐喺 office嘅工唔啱自己,但都要維生,咪做住先囉。」
文職工作不適合自己,讓 Rodney決定以 freelance形式接表演工作,「跟師傅學嘢嗰陣,佢畀啲表演工作我哋做,好似主題公園嘅舞台表演、商場 show、電視劇及廣告中嘅特技動作等,覺得呢啲先係自己想做嘅工作,於是就成為全職表演工作者。」

開館授徒

成為表演工作者後, Rodney認識了更多喜愛 tricking的同好,為了有固定場地練 tricking,催生了 Trickstation的出現,「初時自己同班朋友玩,慢慢身邊有其他朋友話想學,於是 book康文署嘅場地教 tricking,但唔係成日 book到場,同埋每次都要自己重新鋪過啲軟墊,好唔方便。見想學嘅人開始多,決定同幾個好朋友夾份租個場地,開班教人。」在 10年, Rodney與幾名同好開設了 Trickstation, 1堂成人收$130,學生則$100。
有體操底子令 Rodney能輕鬆應付 tricking的高難度動作,但同時也有些桎梏,「 Tricking同體操一樣好多空中動作,自己空間感會好啲,不過體操動作要好標準,要雙腳落地、向前向後翻騰等方向好明確;但 tricking可側身 45度單腳起跳,又可以喺空中加踢腳動作,旋轉方向冇規定。可能自細練開體操,有啲小動作好難改,有新人玩呢類動作上手仲快過我,我要慢慢練。」
在 12年,因練習令右腳的十字韌帶斷裂,使 Rodney的表演生涯受到影響,「自己練緊個高難度嘅轉體動作,落地時個角度唔啱,十字韌帶撕裂咗,唔好話 tricking,屈埋同企都痛,之後嘅 job要推晒佢,我一直靠表演為生,影響好大。」

基本 3式

雖然說 tricking是自由組合,但還是可分拆 3個基本動作,讓新手練習。


後空翻抱膝 

空中踢腳 

旋子 360°

重建韌帶

對 tricking的難以割捨, Rodney決定接受手術重建十字韌帶,「喺腿筋肌肉取出肌腱組織組成一條新嘅韌帶,手術後連伸直同屈埋都痛,有擔心過自己玩唔番 tricking,要 keep住做復康動作,好似由伸展動作做起,再慢慢加強到單腳跳、深蹲等,訓練番肌肉嘅強度同平行感,用咗年幾時間先玩得番 tricking,右腳只得番 7成狀態。」
受傷後, Rodney不能常接表演工作,卻以教練為正職,「好在之前考咗體操教練牌,受傷期間去咗私人機構教小朋友體操,𠵱家個膝頭用力都仲痛緊,表演 show唔可以成日接,惟有轉為做教練,正職教體操,同時又喺自己館教 tricking。」

配合跳舞

現時 Tricking不時出現在電影及表演當中,學 tricking除了興趣外,還是一種增值技能,「電影上開始有人加入 tricking元素,好似外國電影《 Step up》系列就加入 tricking嘅動作喺跳舞上,令到多咗人留意,亦開始多人玩,唔少學員都係跳舞或者係做緊特技人,希望鍛煉自己身手之餘,都想將 tricking糅合番喺自己嘅專長上,之前 13年花車巡遊都有搵我哋去表演 tricking。」
現時表演連教班, Rodney平均月入約$15,000,他希望更多人認識到 tricking,同時希望香港電影可以加入 tricking元素,「嚟緊會幫一套微電影設計一啲 tricking動作,希望吸引到多啲香港人玩;其實外國電影都開始加入 tricking元素,希望香港動作電影會有多啲 tricking,畀更多人認識。」

Yooki 學員

自己跳開 hip hop同 Jazz,上網見到啲跳舞短片,有人將 tricking加入舞步,令到個 show好正,於是就過嚟學。

Kristopher 學員

我喺澳洲過嚟 working holiday,自己有玩開 tricking,唔同地方嘅 tricking都有少少唔同,所以過嚟學習吓。

後記:膠劇

睇無線膠劇,反恐部隊要跳樓練膽識,難怪網民要惡搞敖 sir跳樓片段。看着 Rodney原地做空翻、在公園長凳上做後空翻踢腿,表面輕輕鬆鬆,實在難度很高,記者自問沒這樣的膽識,都是轉珠啱自己多啲!

點入行?


13年的花車巡遊表演, Trickstation成員也有份演出。 

Rodney表示現時商場或私人機構不時會找他們表演 tricking,「 Tricking喺外國比較流行,好似歐洲及美國都好多人玩,香港則比較少,除咗興趣之外,其實主題公園、商場及私人機構不時會搵識 tricking嘅人做表演,大約每次表演 5-20分鐘收$1,500至$3,000不等,可以上好似 JOBSDB等求職網留意吓。」

Tricking班

機構︰ Trickstation
時間︰ 1.5小時
費用︰成人$130、學生$100
查詢︰ http://www.trickstation.com 
內容︰轉體、踢腳及翻騰等技巧,如何組合動作等。


撰文:曾志恒
攝影:黃家活、葉偉豪
部分圖片由被訪者提供

全站熱搜

tvb4life 發表在 痞客邦 留言(0) 人氣()