專題 Log In

永遠夠潮  MINI Cooper S

MINI係一個好奇怪嘅牌子,就好似米奇老鼠一樣 forever young,連擁有 MINI都成為年青、有活力嘅象徵。第 1代 New MINI自 2001年推出至今已有 13年,就算第 2代都係 2006年推出,都有 7年款啦,但拍埋剛剛推出嘅第 3代旁邊,完全唔覺 out!全因 New MINI外表已成為一個 legend,係新潮嘅代名詞,我敢打賭再過多十年睇番今日嘅 MINI,外觀都仍然潮味十足!外表唔大改就仍可以扮潮,但動力輸出同車廂唔升級,就吸引唔到人,所以第 3代大幅改動動力系統,車廂都用最新設計,唔單只賣潮味,仲有 hi-tech、 performance、 comfort!第 1、 2代車主試完之後都大讚進步明顯,有換車衝動!

Ads by Google

MINI Cooper S Spec.

引擎: 1,998c.c.直四 turbo
馬力: 192bhp/4,700-6,000rpm
扭力: 28.6kgm/1,250rpm
傳動: 6前速自動、附+/-模式
懸掛:前麥花臣支柱、後多連桿
制動:前透氣碟、後實心碟
0-100km/h: 6.7秒
車身: 3,850× 1,727× 1,414( mm)
車重: 1,250kg
車價:$358,800
查詢: MINI Hong Kong( 3193 6800)

'04 MINI Cooper S Spec.


Kenneth 

接受唔到車頭中間條橫桿,影響車頭美感。
Cooper S版仍保留中置尾喉,而且車尾泵把有型。

引擎: 1,598c.c.直四 supercharger
馬力: 163hp/6,000rpm
扭力: 21.4kgm/4,000rpm
傳動: 6前速手動
懸掛:前麥花臣支柱、後多連桿
制動:前透氣碟、後實心碟
0-100km/h: 7.2秒
車身: 3,626× 1,688× 1,413( mm)
車重: 1,075kg

'12 MINI Cooper S Spec.


Jeff 

車頭太過凸出,令車頭又大又斜。
頭燈以至好多車身部分都造得比以前細緻。

引擎: 1,598c.c.直四 turbo
馬力: 175bhp/5,500rpm
扭力: 24.5kgm/1,600-5,000rpm
傳動: 6前速自動、附+/-模式
懸掛:前麥花臣支柱、後多連桿
制動:前透氣碟、後實心碟
0-100km/h: 7.2秒
車身: 3,752× 1,683× 1,407( mm)
車重: 1,130kg

 

老實講, MINI靠個樣食糊,但個樣又成為咗一個設計包袱,外表玩到幾癲都要令人一望就知係 MINI,即係唔可以有 unexpected出現!所以同你講:「新 MINI出咗喎。」你根本唔需要用 5秒時間去思索,都估到外表 7成以上。第 1代車主 Jeff:「 MINI根本唔使點改個樣啦,好難改得令人受落。」第 2代車主 Kenneth:「部車未出都估到個樣係點啦!改得太厲害會影響銷路添呀!」


Cooper S沙板指揮燈都有「 S」字樣電鍍章。 

尾燈 size前所未有咁大,似足 Countryman。 

再度發福

以現今世代新車標準,差唔多無一幸免一代比一代大部, MINI唔可能再回到 Old MINI年代咁細部,第 3代甚至再度發福,驟眼睇有幾分似 Countryman。新車變得更大,除因為要加強車內空間外,亦因為加強安全性。新一代 MINI車身長 3,850mm、闊 1,727mm、高 1,414mm,比 Kenneth部第 2代長 98mm、闊 44mm、高 7mm,可明顯睇到有實際增長,而車廠唔知有心定冇意,新一代 MINI車頭同車尾外觀設計,竟進一步誇大,鬼面罩佔據車頭 7成位置位,中間有一條明顯係有泵把作用嘅橫桿凸出,完完全全將 MINI嘅特色 3倍放大! Cooper S版本獨有開窿頭冚都係裝假狗,入氣口其實密封,中冷器已移到泵把下方,直接迎向生風。車尾方面,只要 3代同堂就見到尾燈一代比一代大,新一代尾燈巨型到接近方形,同 Countryman神似。

同級冇對手

同 MINI Cooper S一樣玩潮味,又要高性能嘅車唔係冇,但冇一款可以直接抗衡。德國國民之車 VW Beetle有樣、價平,但性能唔高; Abarth 695有樣、有性能,但車價貴。

外表夠照  VW Beetle 1.4 GT Beetle

同 MINI同樣擁有經典地位,比 MINI更早復刻,第 2代 New Beetle GT版採用 1.4公升 turbo引擎,最大馬力有 160匹,車身比 MINI大一截,講操控一定唔及 MINI,但勝在價平,$319,880有交易。

貴得離譜  Abarth 695

由 Fiat 500變成 Abarth 695,主要將 turbo引擎大幅加大增壓值, 1,368c.c. turbo引擎有 180匹!唔打得都嚇得!而且全車大幅改動,周身都係賽車專用配件,亦因此車價不菲,$768,000起。

車廂玩嘢

玩得 MINI就係要玩 gimmick嘢,每個車主都想自己部車與別不同,所以 MINI一直以嚟最煞食就係有無限咁多原廠車身及車廂配件,用家點襯都得。然而,新車又點可以只靠外在補品?所以新一代車廂已加入大量更新潮、更玩嘢 design!軚盤仍可以同背後儀表一齊上下移動,保證女士將軚盤移到最低位都睇得到速度表。而最最最出位,一定係中控台上巨型圓表,已經由以前嘅速度表改為多功能顯示 mon,而且喺波棍旁首次加咗類似 BMW iDrive嘅控制器,使用上更方便。大圓表外圍係首次使用嘅 LED圈,大家唔使擔心 MINI會好似 MK飛仔車咁搞到車廂變 disco, LED圈會同車內大部分系統連動,例如調節冷氣時,就會變成一邊紅色、一邊藍顯示溫度;泊車時會用顏色表示距離;行車時又會變成轉數表, MK貨邊有咁過癮?



'14 Cooper S由於要收入大顯示屏,所以中控台圓表造到比上代更大。 

'12 Cooper S第 2代中控台已有第 3代嘅雛形。 

'04 Cooper S初代中控台圓表相對地較細,而且真係指針速度表。 

環保慳油

要潮得起就要有多項環保新系統,所以新一代 MINI Cooper S首次加入現時極之流行嘅停車自動熄匙系統,而且行車模式都有 3個設定,分別係 SPORT、 MID及 GREEN,先唔好理 3個模式表現係點,中控台巨 mon即有動畫顯示, LED外圈又會變成紅色、黃色及綠色,總之令你每次轉行車模式都有新鮮感。表現方面,廠方以「 go-kart」形容 SPORT模式,排氣聲、轉波反應都比 GREEN模式進取得多,相反 GREEN模式配合埋停車自動熄匙系統,可得出 5.4L/100km耗油表現,令 Cooper S「文武雙全」。

Jeff:
擋風玻璃比較細同斜,要少少時間適應
由座位到控制系統都非常好,有大幅改進。

Kenneth:
波棍唔好揸手,外表亦唔靚。
新系統多嘢玩,而且前座一流,冇更換理由。



速度表密密麻麻,其實唔係咁好睇。 

軚盤比較粗身,手感唔錯。

中控台下方設有鮮紅色 engine start/stop掣。 

首次加入多媒體控掣器,使用方法同 BMW iDrive近似。 

空間升級

名為 MINI,車廂大唔大根本唔重要,筆者怕佢大過頭㖭!但所有新車為有更舒適乘坐感,都會放大車身,令車廂更舒適,新 MINI Cooper S都唔例外,軸距比上代增加 28mm,直接令後座腿部空間增加 23mm,尾箱空量由 51L增加至 211L,進步十分明顯。此外,雙天窗面積佔車頂一半,亦都令車內空間感提升,從此坐入 Cooper S後座都唔再係苦事。值得一提係 Cooper S前座,除用咗真皮同猄皮混合縫製之外,形狀更加前所未有咁賽車化,包承力出色,可以拍得住以往嘅 JCW版本。


尾箱空間有明顯增長,現時有 221L容量。 

後座腿部空間受惠軸距增長,男士都唔覺好狹窄。 

前座由用料至形狀都非常出色,兩個舊款車主一致讚好。 

雙天窗佔面積甚廣,為車廂增加空間感。 

環保慳油

要潮得起就要有多項環保新系統,所以新一代 MINI Cooper S首次加入現時極之流行嘅停車自動熄匙系統,而且行車模式都有 3個設定,分別係 SPORT、 MID及 GREEN,先唔好理 3個模式表現係點,中控台巨 mon即有動畫顯示, LED外圈又會變成紅色、黃色及綠色,總之令你每次轉行車模式都有新鮮感。表現方面,廠方以「 go-kart」形容 SPORT模式,排氣聲、轉波反應都比 GREEN模式進取得多,相反 GREEN模式配合埋停車自動熄匙系統,可得出 5.4L/100km耗油表現,令 Cooper S「文武雙全」。


新加入輸出功率顯示,用咗佢之後,跑味更加濃郁。 

SPORT Mode之下, LED燈圈都變成紅色。 

MID Mode即係正常模式,燈圈為黃色。 

叫得做 GREEN Mode,燈圈自然用綠色,而且亦明顯話你知慳油。 

全新引擎

每一代 Cooper S都有新引擎,第 1代用 1.6公升 Supercharge、第 2代用 1.6公升 Turbo,今次第 3代首次為引擎大升級,採用 1,998c.c. Turbo,配合雙 VANOS及 VALVETRONIC技術,得出 192匹馬力、 28.6kgm扭力,比上一代增加 17匹及 4.1kgm。數值上好似唔多,但大 c.c.引擎就係可以令最大馬力轉數範圍更闊、低轉扭力更豐富。實際試過 Cooper S,發覺引擎寬容度比以前強,波箱表現比以往快速得多,對改善加速反應好有幫助,尤其低轉數再踩番起時更爽快。綜合新一代 Cooper S行車表現,廠方冇呃人真係有「 go-kart」感受,動力表現同舒適性都雙雙提升。



全新 2.0公升 turbo引擎有 192匹馬力,而且輸出更平順有勁,比舊款更好! 

波箱反應有大幅改善,連揸開棍波嘅舊款車主都讚佢夠快。

Jeff

kart仔感覺同以前差唔多,冇特別加強。
波箱好快!我揀棍波都係因為當年自動波未夠好,𠵱家一定要自動波。

Kenneth

始終車身大咗少少,靈活性同我部差少少。
引擎同波箱都冇得頂!配合出色!

同場加影  MINI Copper

與 Cooper S同時到港仲有賣$264,800起嘅 Cooper,唔好以為 Cooper仲係好似以前咁用 NA引擎咁簡單,新 Cooper用全新 1,499c.c.三汽缸引擎,而且加上 Turbo系統,馬力都有 136匹,絕對唔會比同級對手弱,「 go-kart」感覺仍然強烈。外表方面, Cooper斯文得多,而且車頭冚冇窿、又冇怪相頭尾泵把,充分展現出簡單就是美。車廂方面, Cooper當然會 cheap少少,冇咗恆溫冷氣同埋真皮桶座,但 detail位都有驚喜,座位縫線用彩虹色,配喺黑色布料上,分外醒神。



Cooper版尾泵把平淡得多,而且車牌框有電鍍裝飾。 

Cooper用布料座位,包承力當然唔及 Cooper S,但手工仍然精美。

撰文:袁國基
攝影:葉偉豪
鳴謝: New MINI Club Hong Kong

全站熱搜

tvb4life 發表在 痞客邦 留言(0) 人氣()