新車激試

暴力小房車  Audi S3 Sedan

試車當日,嚟到同代理約定嘅試車地點,眼未見、耳先聞,低沉嘅排氣聲逐漸趨近,初時仲以為有架跑車嚟緊,結果竟然係今次借嚟試車嘅 S3 Sedan,而且正好係火辣嘅紅色車身,配合由頭到尾、由內到外都係一副戰鬥格嘅外形。
如果要買一部馬力勁、重玩樂性、但係又要車吓屋企人咁嘅四門房車,大家唔使諗喇,一定係呢部 S3 Sedan,事關咁嘅價錢、咁嘅規格,佢真係冇對手囉。

Ads by Google

原裝 S3 Sedan已經配備極具跑味嘅 18吋 5幅式雙間合金軨,不過今次試嗰部車已換上同 RS4同款嘅 19吋 5幅式 V字形合金軨。再睇吓車頭,用咗大量金屬飾條,包括鬼面罩、蜂巢形進氣口前兩條飾條同前擾流板,側鏡亦用咗黑銀雙色設計,車尾仲型,四出式死氣喉唔單只聲靚,就算唔識車嘅見到都知你部嘢跑得吓,淨係睇個樣已經令人熱血沸騰,比 A3 Sedan明顯更有型有格。

紅黑內外絕襯

外形靚,內裝一樣正,車廂入面以黑色為主,多個細節位都用咗紅色去配襯,好似波棍、軚環、皮座上面啲紅色線咁,仲可以加 option去換黑紅色皮座,同呢部小房跑嘅身份襯到絕。車內雖然有部 5.8吋彩色顯示屏,但最主要功能唔係播歌睇片,而係揀行車模式,如果你裝埋 Bang& Olufsen音響系統,仲可以喺度調校埋音效表現。由於呢部嘢係由揭背嘅 A3系列演化出嚟,就算加長車身至 4,469mm,車內空間都唔見得特別好使,坐喺後排會有少少頂腳,而且車身高度只有 1,392mm,筆者 176cm高坐直少少都就嚟頂頭。


側鏡有 LED指揮燈,以及電鍍銀同黑撞色,型得嚟夠豪華。 

S3 Sedan同 Sportback一樣用鈦金屬色車底擾流同四出式尾喉。 

19吋 5幅式 V字合金軨,同 RS4用嘅係同一款。

尾廂有 390L儲存空間,都只係比 S3 Sportback多 10L。 

電動天窗睇落唔係特別大,其實已經佔車頂近 1/3面積。 

5.8吋彩色顯示屏夠晒突出,主要功能都係揀吓駕駛模式,另外軚盤上亦有轉波撥片,玩樂性十足。

加$19,700就可以換呢款以紅色配襯嘅皮座。 

後排兩個座位都有為嬰兒椅而設嘅安全扣。 

高大嘅乘客坐喺後座會有啲頂頭同頂腳。

節能低耗油


紅圈為啟動停車熄引擎功能。 

S3 Sedan比揭背 S3多咗個車尾廂,車身重咗,係咪一定大咬啲呢?出奇地又唔係喎,多得 Audi一系列慳油系統,除咗基本嘅停車自動熄引擎功能之外,喺滑行或者煞車時,系統會將動力回收進行充電用於之後嘅加速,廠方話可以慳到 3%電油量,所以 S3 Sedan嘅耗油量低到只需 6.9L/100km,以香港油價計算,大概$1.16/km,抵玩!

Audi S3 Sedan Spec.

引擎: 1,984c.c. TFSI直四 Turbo引擎
馬力: 300ps/5,500-6,200rpm
扭力: 38.7kgm/1,800-5,500rpm
傳動: 6前速自動,附+/-模式
油耗: 6.9L/100km
車身: 4,469× 1,796× 1,392(mm)
車重: 1,450kg
售價:$588,800起
查詢: Audi HK( 3465 0000)

300匹強勁馬力

講到呢度,你咪以為佢只係得個樣嚇得吓人,其實佢嘅性能一樣咁堅! S3 Sedan配備一副 2.0公升 TFSI直四 Turbo引擎,配 6前速 S tronic自動波箱,最正都係佢馬力有成 300匹,一樣係四驅兼 2.0公升偈嘅四門房車,只係得 M-Benz嘅 CLA45 AMG,仲要有成 360匹馬力。講真嗰句 CLA45 AMG係勁好多,不過你個荷包都傷好多,因為 CLA45 AMG貴成廿萬,咁睇係咪 S3 Sedan抵玩好多先? S3 Sedan引擎另一特點係喺 1,800-5,000轉時可以保持 38.7kgm扭力,市區行車基本上全時間都有強勁輸出。另外佢個車身高度亦比普通版 A3 Sedan降低咗 25mm,風阻低啲、馬力大啲、加速都勁過人, 4.9秒就可完成 0-100km/h加速,坐上車你就知有幾勁。


用咗一副 2.0公升 TFSI直四 Turbo引擎,連引擎都要加兩條紅色線話你知佢跑得吓。 

除咗軚盤嘅轉波撥片,用波棍嚟操作+/﹣系統都得。 

表板上面都有個小屏幕,可以睇到數字版嘅行車時速、室內溫度等數據。 

5種駕駛模式畀用家自己揀選。 

輕易轟上 120km/h


Sedan版車長達 4,469mm,比 Sportback版長 137mm。 

由於低波嘅齒比較密,慢速低轉已有強勁動力,加上用咗四輪驅動,起步可謂極之爽快。頭先講過喺顯示屏可以調校行車模式,系統內置 5種模式,你仲可以喺個人模式入面再調校傳動同避震等設定。以「動力」模式行駛,避震明顯變硬,路面情況直接咁傳遞至車內,就算行緊 60-70km/h時速,踩油嗰吓推背感依然隨即而來,要上到 120km/h都唔係難事。另一方面, S3 Sedan軸距只有 2,631mm,以四門房車嚟講掟彎都算靈活,不過要車屋企人嘅話,筆者建議都係揀番「舒適」或者「自動」模式,行車穩定啲同避震軟啲。作為一部小房跑,佢個波箱同軚盤上分別有+/-波功能同轉波撥片,如以純玩樂性質嚟講, S3 Sedan算做足跑房車本份。


撰文:鄭永麟
攝影:葉偉豪

    全站熱搜

    tvb4life 發表在 痞客邦 留言(0) 人氣()