潮𡃁便當

復活節食遊元朗

復活長假期將至,與其旺區與自由人爭路或者夾硬外遊被鋸至一頸血,不如到元朗南生圍大草地踩轉車,親親大自然好過,做運動前,食個靚靚 all day breakfast,做運動途中,食吓豆腐花,做運動後,歎個應節 high tea復活蛋, high完 tea直落食埋台式鴨煲,通通是常識罷!
嫌以上行程太 chur,只揀一兩度食又得,臨走買埋老婆餅都仲得,總之元朗食玩一程,開心過外遊 post相證明。

Ads by Google

破蛋而出甜品

Dessert Gallery新開一個月,紅牆木凳,走簡約風。店內甜品走創意傳統 combine路線,富新意的如用米入饌造布甸以及湊巧應晒復活節嘅蛋殼甜品,亦有傳統心太軟,味道有 4款,包括橙酒、呍呢嗱等, filling、雪糕同 topping水果玩自由搭配,隨心所欲,亦有新地,如士多啤梨、香蕉焦糖等 5款口味,當中以 rum酒夠醉人。


溫柔·暴力$75食前要先破開朱古力球,先食到入面以酥皮、吉士、朱古力脆脆及 brownie造的夾心,先暴力而後甜,改名都啱番成件事。 

朱古力榛子$65朱古力 mousse乃 76%比利時朱古力,內含榛子碎,粗獷質地添口感。 

飯布丁$58甜品如其名以飯去做,包括意大利飯、泰國米及糯米 3種米,更加入忌廉椰奶增滑加香,口感似小時吃的糊仔,幾得意。

 

Dessert Gallery
元朗鳳攸北街 5-7號順豐大廈地下 31號鋪 6695 8734
營業時間: 3pm-12mn(星期一休息)

Check!芥末分子蛋

講到元朗甜品,不得不提 Sense Dessert Cafe,港九潮人無人不知分子雪糕 Lab Made, Sense同樣以分子甜品出名,初開時一道盆栽 tiramisu更是影得又食得,今個復活節, Sense就特別推出甜品不是出奇蛋($75),雪糕是芥末味夠前衞,以食物質感改變達致多重口感,超 mix and match,食蛋前仲先要掉爛蛋殼,食兼行為藝術上身。

 

Sense Dessert Cafe
元朗鳳攸南街 9號好順利大廈地下 2號
2886 0499
營業時間:星期日至四: 3pm-12:30am、星期五及六: 3pm-1am

鳳攸街點去?

元朗鳳攸街位於西鐵元朗站 F出口,元朗東邊一隅,穿過新元朗中心經天橋就到,自成一國,較元朗大馬路市中心一帶感覺較悠閒。

叉足電正早餐

香港食店普遍午後起動,對於早起鳥兒來說非但要捱眼瞓,分分鐘要隨便塞嘢落肚。如果復活節決定入元朗玩,又想歎下元朗式早餐,去 Moment Cafe啦!早上 8點就開,提供豐富到爆全日早餐、芝士菠菜三文治、沙律等。沙律菜更特別用上本地水耕菜,不以泥土去種,無蟲亦無農藥,食得安心。除咗早餐,小店下午茶更有以芝士做餡的西多士,非常少見,邊食邊拉絲好過癮,體重呢啲放低一邊先。


全日早餐$78早餐包括 3款肉腸:法蘭克福、煙辣肉腸、阿歷士黑椒腸、 cold cut火腿、賓尼迪蛋、炸薯角、奶醬多及水耕菜沙律,一句講晒超豐富! 

流心芝士西多士$38(下午茶供應)西多士再加車打及水牛芝士,又甜又鹹香意外地 match。 

菠菜芝士三文治$38菠菜蓉加忌廉薯蓉芝士配烘底三文治,既清新又香口,快手 K.O.兩件。

食客 Daley& Esmond地產及工程係呢度熟客,一個星期起碼嚟 2-3次,羊扒超得,流心芝士西多士梗係正! 

Check!單車入南生圍


大家樂單車行( 9184 6881)敬輝農場( 2944 0029) 

入元朗點可以唔去出名嘅南生圍大草地?元朗鳳攸北街對出的大家樂單車行,提供全日租車服務,假日$50-$60不等,沿單車徑往博愛醫院方向踩 10分鐘,就會見到轉入南生圍的路牌,慢踩到大草地約為 30-45分鐘(踩開者半小時必到),路程中間會見到敬輝農場,必食有豆腐花($9),農場後更有浮橋可以玩同大叫半日。

 

Moment Cafe
元朗鳳攸南街 9號好順利大廈地下 1C&D鋪
6588 4808
營業時間: 8am-6pm(星期二休息)

爆汁至黑臭豆腐


灌湯臭豆腐$20/5件臭味未放入口都聞到,加埋無法抗拒的蒜辣,湯汁邊食邊流落地下,好味到狼狽都不理。 

一場嚟到元朗,必食全港獨有臭豆腐,喺正 B仔涼粉隔籬,有咩把炮?特別在化身食界周柏豪,黑麻麻!湖南長沙食法,以秘製滷水加入墨魚汁醃製豆腐超過一個星期,壓成比麻雀大少少 size,最地道係,炸好嘅豆腐中間會開出一個小洞,灌入大量清湯, on top仲會放辣椒醬、蒜蓉、芫荽等,分大中小辣,入口熱加辣,一咬爆汁,天一半地一半,唔知以為去咗士林夜市!除咗唔口乾嘅爆汁味,仲有乾炸味,上加似食乳豬蘸的甜辣醬,各有各 yummy!

 

黑色經典臭豆腐
元朗裕榮徑 3-5號金禧樓地下
6176 0919
營業時間: 4pm-1am


日賣 2000生煎包


生煎包$28/4個包底微脆,外包厚重,豬肉 juicy冇得輸,湯汁更多就好。 

荃灣超爆日賣 3,000個生煎嘅包祥興記喺元朗開店,繼續有 open kitchen吸引途人望包,店面積較荃灣店大,座位多一倍,嚟元朗必朝聖!生煎包內是灌湯豬肉餡,汁多肉香,每次為數 120多隻包會放入煎 pan煎 6至 7分鐘,其間加水,確保底夠卜卜脆,皮夠軟腍腍,趁熱食最正,𠵱家雖然拍唔住荃灣店,但都日賣 2,000隻,唔失禮㗎!

 

祥興記上海生煎包
元朗谷亭街 13號
營業時間: 10am-10pm


蠱惑迷湯鴨

雞煲就食得多,元朗的六六,稱得上元朗最東食店,結合港式雞煲食法落台式薑母鴨身上,薑母鴨同湯先分開上,食完再放湯,同台灣湯料齊上唔同。以台灣主理薑母鴨煲 10年的師傅為廚,全隻黑面鴨加入老薑、黨參、川芎等 10多種藥材熬製 8小時,勁蠱惑每日只售 20煲,賣完就冇吊人癮。而呢排潮濕多雨天,亦啱食店內一道以九尾草熬製的雞鍋,九尾草具祛濕之用,購自台灣,加入膳雞熬製,湯身較甘甜易入口,係食唔慣藥味嘅女生另一選擇!


薑母鴨$128藥材味蠱惑人心,令人喝罷一口又一口,鴨非常入味,連伴碟嘅葱都唔放過!老薑、黨參,薑母鴨好味的秘密。 

九尾雞$128甘甜清香,如果說薑母鴨霸度,九尾雞就以德服人,唔知係咪心理作用,喝罷果然精神為之一振,忘卻下雨天冇厘精神的煩惱。 

流浮山生蠔$78 

牛胸油$58 

Check!「炭」住食霸王鴨

九尾雞當中的九尾草乃台灣特產,有「台灣人參」之稱,味道芳香甘醇,具祛濕功效,能解食欲不振,當地人亦會將九尾草直接加滾水當茶喝。而薑母鴨則是台灣冬令進補食品,對脾胃有益,能有助消化,對手腳長期冰冷者最啱,在台灣,霸王紅面薑母鴨是人氣一家,以炭火滾住食氣氛超好,去台灣嘅人都朝聖。

 

六六火鍋
元朗鳳攸東街 9號好順意大廈地下 33號鋪
2217 8862
營業時間: 5pm-1am(星期二放假)




撰文:梁智欣
攝影:黃家活、崔百祥

全站熱搜

tvb4life 發表在 痞客邦 留言(0) 人氣()