Fun App

不再卡關  Line Rangers勇救莎莉小貼士

Ads by Google

有玩開 Line嘅朋友,最近都被救救莎莉訊息洗版,其實呢個係話題新 game《 Line Rangers》嘅好友邀請。隻 game公仔得意玩法簡單,中毒性極高,連電視都有賣廣告就知佢人氣勁。點知玩落去難度甚高,個個達哥上身齊齊卡關,惟有周圍發邀請拎着數再挑戰。唔想再卡關,等《 FACE》教你過關貼士,助大家早日勇救莎莉。

 

Line Rangers
平台: iOS/Android
售價:免費

識篤就識玩

遊戲目的係摧毀右方敵人主塔,敵人會不斷出兵攻擊我方主塔,被推倒就 game over。點打人呢?點下方隊員 icon就會消費礦石資源出兵,攻擊完全自動波,幾冇打機天分嘅都啱玩。不過打到後期敵人出兵速度完全無理,開始十幾廿隻打埋嚟,要有特別的出兵方法先搞得掂。

推薦無課金隊伍

一星炮灰兩隻唾手可得,出賣朋友得嚟嘅青蛙熊大同蜜蜂,唯一有難度嘅係三星或以上遠攻一隻,都總會抽到或打到。方法係先全力升礦,敵人打到埋嚟就輪流出熊大同遠攻,見到資源有凸要偷雞繼續升礦,升到 Max就加埋炮灰 4隻輪住出,唔可以畀資源有一刻多咗出嚟,蜜蜂反而真係等到多到瀉先好出。呢個隊伍夠 level可打到 50關打後。

貼士 1:必要的邀請

隻 game玩抽蛋, 4、 5星隊員要用寶石抽,唔想課金又想快速入手勁人,惟有騷擾朋友發邀請,邀請 50人有 4星青蛙熊大、 100人就有 5星蜜蜂哈尼。打到後期,隊伍靠肉盾加遠攻,皮堅肉厚嘅熊大一定要拎到手,想過關千祈咪玩必要的沉默,至少要出賣 50位朋友。


青蛙熊大比邀請 100人嘅蜜蜂仔更有戰術性作用,體力可過 10萬,冇佢唔掂。 

抽蛋分 3種,用 20石抽先有 5星, 100粒寶石可抽 6隻較抵,開頭靠出賣朋友嘅隊員已夠做,儲石先抽啦! 

貼士 2:打舊關儲呢

卡關時唔好死心不息,返去之前啲關儲錢,升級基地設施最有效提升實力,資源上升速度同最大限度優先升級。另外打舊關仲可以儲寶物、儲隊員,好似打 RPG咁儲完「呢」再挑戰,修練時切記唔好用魔法同好友幫手,唔好浪費。


集齊 3件寶物可打開各種特殊效果,寶物喺各個關卡隨機取得,星期二特別易出。 

抽極都抽唔到好隊員,可靠過關抽怪, 32關管理員、 44關史坦、 52關雷雲都係可以長用嘅強力隊員。 

貼士 3:炮灰頂硬上

真正開戰,青蛙熊大同遠程攻擊手出不停,最好夾雜兩隻 1星炮灰,因為熊大行得慢,低資源嘅炮灰可以喺熊大未上前線時頂住先,等級完全唔使理但移動速度一定要係「非常快」。另一秘訣係頂到 hurry up時,敵人血量減半先出[!94C4]石魔法,隨時一發逆轉反敗為勝。


炮灰除咗頂怪,隊員死得多仲可叫出幽靈大隻佬拖慢敵人,好有用。 

挑戰難打關卡記得用錢開晒 3招魔法,落[!94C4]石最好等到 hurry up先有最佳效果。 

LINE精品熱賣 結婚公仔炒得起

玩《 Line Rangers》最開心係見到熊大、兔兔、饅頭人成班 friend扮鬼扮馬,到最後打到發脾氣都打唔贏,不如去搜羅 Line精品慰藉心靈。雖然大家傾偈都係用 WhatsApp,但無礙 Line嘅可愛角色人氣急升,唔少精品都出現炒賣。呢對上年年尾推出嘅熊大、兔兔結婚公仔初出時連日本都瘋搶,淘寶價一度超過 1,000人仔,𠵱家再版 Log-On大手入貨就抵買得多, plan緊結婚嘅新人買番對放喺花車頭,甜蜜又夠潮,賓客一定讚!


熊大兔兔結婚公仔售價:$399 

熊大危機一發都係輪流插刀仔,插中機關熊大彈出嚟就輸。售價:$149 

莎莉咕𠱸有啲人因為被《 Line Rangers》洗 app而討厭雞仔莎莉,但其實佢真係好得意㗎。售價:$159

饅頭人抹芒機械人入電池,自己會喺手機芒周圍抹嘅清潔機械人。售價:$149 

兔兔紙巾座可用來放盒裝面紙,雖然塊面拉長咗,但一樣咁可愛。售價:$149 

兔兔搖頭公仔一邊播放卡通片 Line Town音樂、一邊搖頭嘅兔兔公仔。售價:$369

 

查詢: Log-On( 2736 3866)

新 Line App 手機 Icon任你轉

除咗打機, Line仲有出好多不同功能嘅 app,最新嘅《 Line Deco》可以幫你打造 Line風格嘅手機桌面,唔只有 wallpaper下載,仲可以將啲 app icon變晒做熊大、兔兔。嚴格嚟講佢係提供好多 icon做捷徑連結唔同嘅 app,原本個 app仲喺度嘅。有咗佢連 iOS都可以簡單自訂桌面,𠵱家好多靚 icon靚主題都限時免費,要試趁熱,但缺點係每次開 app都要 load多半秒。


Line Deco平台: iOS/Android售價:免費 

因為要逐個 icon同 app做連結,都有一定嘅麻煩。 

莎莉主題,一片黃色, iPhone都變 colorful。 

兔兔主題,整完後啲 icon亂晒,要自己玩 puzzle咁砌番,有得玩又有得裝飾桌面。 

撰文:司徒港燊
攝影:彭自維

全站熱搜

tvb4life 發表在 痞客邦 留言(0) 人氣()