7/4雖然出鏡率比以往少好多,不過高鈞賢仍然抱樂觀態度,現於深水埗車房做學師仔嘅佢,仍不時開懷大笑,亦同同事相處融洽。 

真面目

頂硬上 港男冠軍霉足 9年 高鈞賢做深水埗車房仔

生活艱難,明星都唔例外,尤其半紅不黑。當香港小姐冠軍譚小環在無綫打工,打足 18年都只得萬八蚊人工而要落鋪賣魚蛋,做老闆仔好過做 TVB藝員仔。

Ads by Google

05年「第一屆香港先生」冠軍高鈞賢,得獎後以為會順風順水,點知在無綫捱足 9年都只得 2萬 5月薪,加上 job接唔到、劇亦愈拍愈少,迫住另謀後路。繼 12年高鈞賢在黃埔開設兒童藝術學校後,上週本刊發現高鈞賢要在深水埗做車房仔。由港男冠軍跌落 7綫大茄,心灰高鈞賢寧做車房仔好過在大台捱騾仔,一個港男冠軍哀歌。

 


05年高鈞賢專登由多倫多返港參選港男,當時獲 TVB以萬五蚊月薪力邀簽約 8年。《蘋果日報》圖片 

05年由多倫多回港參選「第一屆香港先生」,成功奪得冠軍的高鈞賢, 21歲便簽約無綫做親生仔,在娛圈打滾近 9年,高鈞賢曾經受捧, 06至 08年更經常爆騷,每年加薪,理應好開心。

換零件一腳踢

「 TVB係咁㗎啦,呢輪捧吓呢個、轉頭又掉埋一邊唔理, Matthew(高鈞賢)都係衰黑仔,啱啱得獎嗰時就咩都塞畀佢做,套套劇都有佢份,但係轉個頭有新人咪打佢入冷宮囉!」知情人士說。
上週一( 7日),本刊發現高鈞賢在深水埗一間車房入面,已換上車房制服的他,邊攞住電筒照車底、又向身邊同事請教,最後更落手替私家車更換零件。記者眼見高鈞賢手腳生硬似足初學者,不過貴為香港先生都唔介意落手落腳整車,難得馬死落地行。
後來車房老闆請伙計幫手洗車,高鈞賢二話不說就走出店外洗車,同樣是有車一族的他,洗車手勢十分熟練,踎低抹車亦唔介意。


放低身份,高鈞賢就咁攞住水喉幫車房洗車,其間都有街坊認出佢而評頭品足。 

照零件高鈞賢只屬初階,暫時只係負責基本檢查,不過有心學嘅佢仍然表現認真。 

捐車底做車房擺明會污糟,但高鈞賢冇介意,仲慌死唔夠入,不時捐個頭入車底慢慢研究。

時裝店打躉

呢頭做完車房仔,上週二( 8日)傍晚高鈞賢由將軍澳寓所出發,揸車去到尖沙咀利時商場,轉戰商場做 sales。
「 Matthew大約一個月前喺利時開咗間 boutique,因為兒童藝術學校嗰邊可能遲啲會退股, TVB嗰邊又得份老底,係時候要靠自己搞吓生意囉!佢每個月有 2萬 5蚊,喺 TVB嚟講算唔錯,但佢又要養車又要供樓,真係冇錢剩,好在佢有啲投資幫補吓。佢本身對車有興趣,所以有時間就會去車房學師、幫手,睇吓遲啲有冇機會開到間車房;至於 Boutique嗰邊都係靠 Matthew自己過韓國或者日本攞貨,雖然係明星,但係過去都係坐廉航經濟位咋!」高鈞賢身邊友人說。


8/4上週二( 8日)高鈞賢返去新開嘅時裝店睇鋪,見佢睇數簿又幫手執貨,對於獨資小生意高鈞賢都要睇到實。 

11年高鈞賢被揭與日本二線女星木南晴夏( Haruka)拍拖,不過異地戀難維繫,半年唔夠即告分手收場。 

凍薪 4年

記者嘗試聯絡高鈞賢,但他對本刊一切問題都表示未能回應。據高鈞賢身邊友人透露,自 10年開始,公司已對高鈞賢採取半放棄態度。
「佢當選嗰年, TVB畀萬五蚊佢一個月做底薪,佢當時只得 21歲,梗係話好啦,而且合約講明會每年加二千五,簽 8年的話,最後會有 4萬老底,點解唔做!初時真係好好,點知到第四年,公司就話要凍佢薪,而且工作量大大減少,角色又愈做愈差,最近拍《寒山潛龍》,仲要佢做 7綫角色,去非禮個 60幾歲嘅阿婆老臨,搞到佢成個灰晒冇晒心機!今年 9月約滿,佢開始為自己打算,話晒都 30歲喇!」
據知最令高鈞賢萌去意,是無綫最近替他推了一套即將開拍的國內時裝劇,但卻被高鈞賢得知,製作單位曾開價 70萬酬勞,兼與鄭元暢和馬德鐘合作,這就是高鈞賢覺得非走不可的轉捩點。

《東張》主持做 7仔

低處未算低。 11年參選香港先生的 32歲黃健東,亦好唔過高鈞賢好多,雖然在參選時贏得「演藝潛能大獎」,可惜一直未被公司重用,只派做娛樂新聞台主持和《東張西望》,每年一劇都仲要係客串,結果去年中黃健東在港島區兼職時薪 38蚊的便利店店務員,但公司得悉後即以形象問題要求黃健東辭職, 3個月後黃健東只好辭退店務員職位,轉到中小學校社區中心教戲劇和英文。車房仔同做 7仔都肯捱,偏偏撈唔到一個角色仔,此處不留人,自有留人處嘅!


娛樂主持撈 7仔時薪$38去年黃健東兼職做便利店,初時仲放晒相上微博,點知即被公司要求佢離職,連時薪 38蚊都唔畀佢賺。網上圖片 

港男黃健東據知黃健東專揀半夜時段返工,基本上唔阻佢返 TVB開工,可惜公司話會影響形象,職業無分貴賤喎!網上圖片 

冇做店務員,黃健東出鏡率好似高番啲!至少月初佢都採訪過型男爸爸張亮吖!

捧到霉

05年獲得「香港先生」冠軍的高鈞賢,首部電視劇已跟胡杏兒在《肥田喜事》中合作,拍住廖碧兒參加湖南衞視舉辦的《舞動奇蹟》後再返港與徐子珊合作《舞動全城》,到 11年與周麗淇飾演情侶拍攝《女警愛作戰》後即備受冷待,在《飛虎》、《仁心解碼 II》等都只係客串,去年的《寒山潛龍》更被安排做鹹濕佬,有一幕要挑逗一位老婆婆,角色有咁衰得咁衰。


07年與徐子珊在劇集《舞動全城》中飾演情侶,戲分唔少。《蘋果日報》圖片 

13年戲內高鈞賢角色排到尾,先有馬國明、敖嘉年、陳國邦、曹永廉,連新上位嘅鄭世豪都有排名,高鈞賢認真慘慘豬。《蘋果日報》圖片 

港男去晒邊?

 


袁偉豪 

07年香港先生冠軍,得獎後接住落有劇拍,直到 12年接拍《 On Call 36》開始受注目, 13年的《好心作怪》更令他在「萬千星輝頒獎典禮」奪得「飛躍進步男藝員」獎。

 


羅天宇 

08年「香港先生」少年組冠軍,初時參與《舞動全城》,後加入處境劇《畢打自己人》和《誰家灶頭無煙火》, 12年首播的《愛.回家》,馬子仁一角得到相當重戲分,同時亦被踢爆與港姐湯洛雯拍拖。

轉行


彭罡原 

與高鈞賢同屆參加「香港先生」的彭罡原(前名彭冠期),只拍過 4部電視劇, 09年全裸參與雲翔執導的《安非他命》而一時見報。現已轉行做飲食業當日本菜師傅。

 


黃長興 

早已轉為部頭約的黃長興,近年劇集愈拍愈少, 11年在北角開設自家法國餐廳, 12年更與圈外女友在法國註冊結婚。


陳志健 

06年參加「香港先生」得到健力組冠軍後簽約做藝員,多數演閒角,曾在 12年的《拳王》中因角色阿力而開始為人熟悉,最為人知的是 12年與甘草演員羅樂林愛女羅苡芝結婚。

大台員工再爆料

TVB前助導偽文豪出書爆舊公司衰嘢,但其實大台縮數講極未完,大把前、現任員工有不滿。

出電話費打工

前任 PA
年資: 2年
離職時月薪:$9,000
「人工已經唔係多,但係每晚一百幾十個電話打畀啲藝人開工,電話月費一概冇得 claim。最慘啲阿姐有時就打去搵唔到人、有時講極都話要再影張通告 send畀佢,每個月通話加數據收費走唔甩五、六百蚊,都係自己出。」

化妝品放廿年

前任化妝
年資: 15年
離職時月薪:$15,000
「我喺度做咁耐,啲化妝品資歷仲老過我,試過見到啲化妝品出產日期係 90年,過期過足二十年,一樣照用喺啲藝人塊面度。我哋試過提出唔係咁好、唔多健康,上邊仲講笑,話化古裝梗係用古代化妝品喎!」

新人帶阿媽返工


《忽然 1周》圖片 

佘詩曼契細佬麥子樂(藝員)
年資: 10年
離職時月薪: 1萬
「喺入面讀訓練班、做新人,個個都奉旨要帶個老母返工。行錯位、講錯嘢,冇人畀面你係新人,唔理男女都一輪粗口狂鬧,字典裏面完全冇尊重兩個字。不過對住阿姐嗰啲就即刻第二個樣,無論笑場幾錯都笑騎騎,叫人慢慢嚟喎。」

床單有蟲

前任道具
年資: 3年
離職時月薪:$12,000
「啲道具床單、被套、枕頭套用足十年八年都係嗰啲,每次拍完就咁摺埋收起,啲櫃已經污糟、再同其他冇洗過嗰啲撈埋一齊,開廠時攞出嚟就又塵又蟲揚晒出嚟,所以啲阿姐上親床,都長袖長褲又着晒襪自保。」

慳番特約錢

現任綜藝科 PA
年資: 2年
月薪:$9,000
「上邊最興揀啲最弱勢社群嚟度縮數,好似最近搞世界盃宣傳,主持後邊實有啲人群造吓勢做啦啦隊,正常應該搵 model或者特約,佢哋就會搵訓練班啲學員嚟做。話就話係畀學習機會,其實貪佢哋免費,連 60蚊個鐘特約錢都唔使畀!」


採訪、撰文:娛樂組
攝影:攝影組

全站熱搜

tvb4life 發表在 痞客邦 留言(0) 人氣()