最煩係每次要 mark邊個嚟咗打波邊個 no show,好在有 facebook同埋 WhatsApp嘅「報到」 record! 

ILIKE

電子化

逢星期一同行家打籃球,不經不覺已經打咗大半年,呢類 old school活動,老實講用到科技嘅機會唔高,最多靠 facebook同埋 WhatsApp「報到」,先知當晚係咪夠腳。但係一踏入雨季,就開始用多樣嘢,就係 Google Drive!點解?

 

Ads by Google

事關為免落雨冇波打,唯有轉 book室內場;之前打街場就話唔使俾錢,但 book場就唔同講法,最煩係個個禮拜嘅人腳都唔同,場租除開又有零頭,無理由夾一個幾毫散銀咁麻煩。點算?大夥兒決定每人科水廿蚊俾負責 book場嘅波友,由佢喺 Google Drive開個試算表 share出嚟,逐場扣錢,見到負數下次就乖乖俾錢, mark錯數就即時修改……所以幾時都話科技係死嘅,點樣用嚟 solve problem先最重要!@潘健文

藍牙小喇叭落腳有地

上個禮拜,收到 SWATCH GROUP寄嚟嘅小禮物:一個藍牙喇叭仔( My vision)。呢類喇叭其實幾啱喺公司用,唔阻地方,用 USB叉電(駁住部腦就得),不過因為自己鍾意聽老餅歌,唔想班同事耳仔受罪,所以都係拎番屋企用好過。搬過幾次屋,冇再添置正規音響器材,屋企聽歌多數開部 Mac機用 iTunes,係舊年見 Bose出嘅 SoundLink Mini真係好強橫,一部 iPhone一個 Bose喇叭仔,已經夠聽。係有時要上天台陪老婆大人整麵包,就要攞住個(略重嘅) Bose喇叭仔上上落落……好嘞,而家多一個喇叭用, My vision大可以長駐天台!@劉定邦


My vision喇叭仔有 line in同插卡槽,唔一定要連接電話,算係咁。 

色跑一定跑呢啲

有睇過早幾期娛樂版嘅 hotpot,應該知道 The Color Run呢個染色跑步嘉年華。原本主辦機構上年想喺香港搞,可惜就好似電動 F1賽車一樣,過唔到政府部門審批。想玩,唯有逃出香港。
有幸報到三月尾喺深圳大運站舉辦嘅 TCR,雖然氣氛冇外國嗰啲咁癲,但大家都算玩得放,將彩粉掟入人哋個口、手腳齊出整污糟人哋全身,都冇人發脾氣,基本上識同唔識,全部染色。不過,喺深圳搞真係好有內地特色,其中一樣就係寄存行李攤位竟然冇人!搞到全程要揹住個袋玩,好在替換衫褲一早用袋裝住,否則真係要買過套衫褲先返到香港。@周群雄


沿途嘅保安、公安慘成箭靶兼人肉景點,個個都爭住同佢哋影相,點解?難得吖嘛! 

火星裝備

唔少手機品牌都出穿戴裝備,基於暫時都未有一件成功嘅「參考」目標,大家唯有努力發揮創意。不過,發揮還發揮,如果太離地,變成火星裝備就大件事。
好似某大品牌早前推出嘅穿戴裝備,功能無錯係好多,可以藍牙駁手機,睇來電、查位置、記錄運動,甚至連心跳都度到,聽完都覺得心動。之不過一戴上手,未享受到功能有幾勁,已經要先幫條頸鬆鬆筋骨,皆因每次都要打側頭先睇到個曲芒上嘅字,真係諗極都唔明,點解唔可以將啲字打橫擺?唔通設計師隻手與別不同?定係見新一集蜘蛛俠就快上,要幫手造吓勢?@劉耀祥


最好嘅觀賞方式,就係要扮晒喺網上好 hit嘅拖住女友去旅行 pose,或者扮蜘蛛俠噴網。 

用家要啟動人肉「橫變直自動轉向」系統之外,仲要扭埋手先睇得晒,多謝曲芒。 


text:科技組

    全站熱搜

    tvb4life 發表在 痞客邦 留言(0) 人氣()