Cherry Ngan彩色單膊花裙$2,980 KOOKAI黑色鑲金屬鏈膠鈪啡色木鈪象牙色膠鈪all stylist's own 

cover face

顏卓靈 去到盡

我同大部份人一樣,對 Cherry的印象,完全基於《狂舞派》。正面形象、甜美面孔加上可愛爆牙,人氣急升,迅即成為少男女神。在我眼中,電影中的阿花就是她本人,一個大學生兼舞癡。戲中她就是做自己,難度比想像中細,不過如果你知道佢由 13歲平凡中學生至入行,被選中當女主角,冇熟人冇後台,你就知佢毫不簡單。熱血先行的她,一度密集式練舞整傷手以至個多月手臂抬唔高,又觸及左腳舊患要頻頻做物理治療,身體亦接踵因日夜顛倒出問題,戲中口頭禪「為咗跳舞,你可以去到幾盡?」成為年度金句,亦是她本人寫照。細看之下,原來 2012年她已奪導演會新演員獎,今年又先後獲金馬及金像獎提名,更同章子怡、舒淇一眾姐姐級前輩同場較勁,風光表面,成功非僥倖。學業、事業分身有術,廿一歲女,肯定前途無限!

Ads by Google

Profile


Cherry Ngan彩藍色豹紋 jumpsuit$1,780 KOOKAI桃紅併藍綠色鑲石 chokerstylist's own 

Cherry Ngan
出生日期: 1993年 12月 27日(山羊座)
出生地:香港
身高: 164cm
體重: 45kg
語言:廣東話、普通話及英語。
學歷:浸會大學英國語言文學系二年級
簡歷:中學時代開始模特兒工作, 07年起拍廣告,當中以 Olympus相機廣告最受注目。
12年踏入影壇,曾參演《浮城》、《大追捕》、《迷離夜》,並憑《大追捕》獲香港電影導演會 2012年度新演員獎,更憑《狂舞派》入圍第 50屆金馬獎及第 33屆香港電影金像獎候選最佳女主角。
主要作品:電影,《浮城》、《大追捕》( 12),《迷離夜》、《狂舞派》( 13)。廣告,麥當勞( 09)、 Olympus( 12)。
微博: http://weibo.com/tastycherry 

為將來鋪路


Cherry Ngan杏色恤衫背心$1,480粉紅色印花短褲$1,180both KOOKAI粉綠色方塊手鈪杏色 tube topboth stylist's own 

者無心插柳總是比較馨香,唔少圈中人提起自己入行經歷,十之八九是「陪朋友面試,但自己入咗圍」,說法毫無新意。惟有 Cherry夠坦白,一開始已直認自己一心想做演員,想怕戲恨入行。
「小學時見同學上台跳舞就好羨慕,於是自作主張填咗興趣班回條,要媽咪簽。」典型獨女性格,喜歡的就會爭取。學舞後,更熱衷表演。
「一次劇社劇目要扮老婆婆角色,同學都覺得好難搞,我怕拍唔成就膽粗粗上陣。但一埋位,就出奇地自然代入老人家身份唸對白,結果大獲好評。事前都估唔到,真係好似如有神助。」
不過空有夢想仲未夠,冇人冇物,入行談何容易?
「我由做模特兒開始,人家識你,先有機會俾工作你。總之一切都係為之後鋪路。」
十五歲未夠就早出晚歸為工作,你父母放心嗎? Cherry鬼馬話自己自細便過着放養式生活,好多事自己決定,當然後果亦由自己負責。「爹哋比較擔心前途,媽咪就成日坐喺廳等我返,會問『咁辛苦為乜啊?』
「記得有次我反問佢點解唔呵護備至?佢先答:『我都想啊!你知唔知我忍得幾辛苦啊!』當時先知,其實佢哋係刻意放手。」
如此家教,練成比同齡人成熟的個性唔奇。不過真正的機會,卻唔係靠搭路,而係再一次的膽粗粗。
「見 facebook《狂舞派》招募演員,當然我又去試。不過人家問我有冇留意街舞電影,我真係答唔出,因為真係冇。」
或者是看中她老實,最終破格錄用,正是養兵千日用在一朝。雖然電影四年後才上畫,但一下子打入金馬、金像獎入圍名單,可說是吐氣揚眉。攞獎與否不說,已經成功大半。我真係要對心口掛「勇」字的她寫個「服」字!

 

 


一身運動服同死黨玩自拍。《蘋果日報》圖片 

Olympus廣告的鄰家少女形象深入民心。 

參加韓國經理人公司選秀會,又一博到盡最佳例證。 

《狂舞派》中與同為新人的蔡瀚億做一對。今屆齊齊入圍金像獎。《蘋果日報》圖片 

珍惜僅有時間


Cherry Ngan藍色印花牛仔恤衫$1,580藍色西褲$1,480藍灰色腰帶$980all KOOKAI藍色絨帽白色煲呔both stylist's own 

廿歲女既是學生又是演員,身兼兩職,平日上課時間同拍戲檔期都是精心左拼右湊得來,我好奇佢點平衡和兼顧。
「可能時間有限,令我更珍惜僅有嘅時間,忙嘅時候,我嘅成績、工作反而表現得更好!」
反常理行事,背後可能犧牲很多,尤其好多九十後視之最重要的行街唱 K上網時間。
「我想好好享受大學生涯,所以有『上莊』。在大學類似公益少年團嘅組織入面做幹事,之前去過尼泊爾交流生活,係好有意義嘅體驗。放學後又幫個女仔補英文,由唔合格變全班第一,我覺得自己仲開心過佢!」
後生女善心滿瀉,有意義的生活過後,或者多少有人認為佢「攞苦嚟辛」。我忍唔住問,時間夠唔夠使?
「每學期分科時,我會將上堂時間逼埋三、四日,放學幫人補習、做搞莊啲嘢,其他時間工作。幫到人自己又有成長,其實值得!」
好一個時間用到盡的例子,我好奇精打細算如她,一心要築電影夢,何不集中投資,乾脆揀電影相關學科,大可學以致用。
「當初都考慮過,但玩劇社多年來明白做戲其實係生活感受,你讀甚麼學科出身,其實沒太大關係。或者江郎才盡,難有進步時再去讀,吸收一下養份。」
好好好,又當你講得通。但英國語言文學偏偏係象牙塔尖,真係有咁愛?
「都係受劇社影響,好多電影都係由文學劇本改編,而睇電影又會令人想睇番文學,我就俾呢種關係吸引住。」
如此說來,唔單止社工、老師,連編劇、導演可能都可以考慮吓。「係啊,所以我都有考慮讀燈光、音樂咁……(下刪二百字)」
後生女想法多多,天馬行空的年紀,幾乎人人都經歷過,但係最終決定,就影響一生。只要你想,努力終究會變成想像中的人。九十後有的是時間,有的是機會, impossible is nothing,青春就是最大本錢,熱血得我火都來了!

後記


Cherry Ngan黃色針織背心裙$1,580白色通花紳士鞋$1,980both KOOKAI黑併金色頸鏈彩色手鈪all stylist's own 

拍攝期間隨音樂就起舞,手腳不停,眼前這位少女到底有幾熱血,我真係離遠都感覺到。
好多人話佢有野心,但有野心又有何不妥?社會上太多九十後,人云亦云不知所以,更多的是磋跎歲月。眼前的她年紀輕輕就盡用時間為自己鋪路,好多人會以為佢博盡全因家境清貧,要賺錢養家,打聽下先知,她父母都做生意,家境小康,甚至稱得上「富二代」,然而 Cherry不願多提。
「屋企經濟嘅嘢,自己好少理。反正我中三已經冇問家人要零用錢,盡量用自己賺嘅錢。
「大家只留意其他花邊新聞,注意力不在我身上,又有甚麼意思?」
自食其力,抗拒被人以富家女眼光打量,單就呢種成熟, Cherry已經跑贏同齡成條街。

 

KOOKAI 金鐘太古廣場 122號鋪  2722 9659


撰文: Nicola Lai
形象: Annie Hung
攝影: Kenji Leung
化妝: Man@Touch Up Production
髮型: Linfa@IL COLPO
鳴謝: KOOKAI

全站熱搜

tvb4life 發表在 痞客邦 留言(0) 人氣()