Geek友講場

MWC 2014從平機出發

廠商等錢使,手機機王老是常出現,隔幾個月又話有一部,內容都是新 U靚芒不停回帶,是故剛結束嘅巴塞羅拿「 MWC手機通訊展 2014」,雖有兩大機王 Samsung Galaxy S5同 Sony Xperia Z2壓陣,但大家最期待嘅畫面反而屬於行 Android嘅 Nokia X發布一刻。
Nokia被微軟收購,當人人以為佢只會為 Windows Phone服務,誰知曾經做過軍火商嘅 Nokia,竟然在 MWC發射三粒彈丸 X,一門三傑 X、 X+、 XL全部行 Android,最平款式一張金牛有找,𠵱家就由 Nokia呢部平機出發,回顧即將推出嘅 MWC新手機。

Nokia X

系統: Nokia X Software Platform 1.0
處理器: ARM Cortex-A5雙核 1GHz
記憶體: 512MB
制式: 4G、 GSM、 WCDMA
屏幕: 4” 800× 400
鏡頭: 300萬像素(後置)
儲存:內置 4GB、對應 micro SD
體積: 115.5× 63× 10.4mm
重量: 128g
售價: 89歐元

《 FACE》 Gadget版監修人 903 DJ Donald

真心期待 Nokia X,機靚、通話順,打字爽亦係強項,早排佢用個系統唔啱我玩,𠵱家終於肯用 Android,相信可以打破過去問題,買買買!

Ads by Google

行 Android的 Nokia

Nokia X機能同一年前嘅 Lumia 520相若,同樣用 4吋芒、雙核 1GHz處理器; X+係加 RAM版,由 512MB加到 768MB(但行 3.5G); XL則係 5吋版。講到明玩入門級主打新興市場,機能冇驚喜,內涵卻惹爭議。原來 Nokia X運行嘅自家製 Nokia X Software Platform 1.0系統,雖以 Android為基礎,實質經大幅調整,表面睇仍然係 WP方塊磚 OS,更飛走多個 Google服務,以微軟自家 OneDrive、 Outlook取代 Google Drive、 Gmail,更意外係連 Google Play都踢走,用家要上 Nokia Store買 app,好在開發商未來能輕易將 75%舊有 Android apps無縫轉平台到 Nokia Store發售,特派試玩員試過用到其他第三方 market, apps兼容問題應該不大,加上進取售價,最平 Nokia X只需 89歐元(HK$949),成績如何有待觀察,但起碼贏在夠話題。


唔係吹水, Nokia Booth係現場人流眾多,可見 Nokia出 Android機,大家都期待。 

除咗 Nokia Store,仲可以用到 Mobile01 Market呢啲第三方 market,𠵱家落咗架嘅《 Flappy Bird》都玩得番。至於能否直接安裝 Android APK檔則未清楚,如果可以用 Nokia轉珠就冇得頂! 

MWC現場有一個放大版 Nokia X介面,睇到 Outlook、 XBox、 Office,望落真係似 WP多啲。 

機背有 300萬像素鏡頭,根據資料提供,應該得 Nokia X+有自動對焦功能,機身塑膠物料亦頗為啜手,充滿入門機感覺。 

Nokia X+


系統: Nokia X Software Platform 1.0
處理器: ARM Cortex-A5雙核 1GHz
記憶體: 768MB
制式: 3G、 GSM、 WCDMA
屏幕: 4" 800× 400
鏡頭: 300萬像素(後置)
儲存:內置 4GB、對應 micro SD
體積: 115.5× 63× 10.4mm
重量: 129g
售價: 99歐元

Nokia XL


系統: Nokia X Software Platform 1.0
處理器: ARM Cortex-A5雙核 1GHz
記憶體: 768MB
制式: 4G、 GSM、 WCDMA
屏幕: 5"
鏡頭: 500萬像素(後置)
儲存:內置 4GB、對應 micro SD
體積: 141.4× 77.7× 10.9mm
重量: 190g
售價: 109歐元

Android x Windows Phone兩溝未必夾得埋?

Nokia X呢部有如披着 Window Phone皮的 Android手機,本港 App公司 Innopage創辦人 Keith Li就覺得兩溝未必溝得埋。「 Windows Phone其實有優點,𠵱家好流行嘅扁平化 Flat Design都係 WP玩先,對硬件要求唔高,行得順又有型。但 Android架構比較複雜,例如 Widget咁,出嚟變咗個首頁好簡陋但按入去變番 Android咁,用落會覺得唔夾唔好用。 Nokia似係想用 Android帶人用 Microsoft服務,但其實用家係想佢出一部完整而且係旗艦級嘅 Android電話,鬥平堂堂 Nokia冇得同國產機鬥,呢部 Nokia X似乎會步 Symbian Bella後塵,最終雷聲大雨點小。」

Innopage Ltd. Founder  Keith Li

「始終係 Android機扮 Windows介面,我要用過睇吓係咪仍然咁慳 RAM、用落係咪仍然咁順先可以再深入評價!」

Nokia超級粉絲+知名 gamer 張卡妮

「用 Nokia係因為覺得佢啲機夠 sharp, WP7一直支持至今, WP介面又夠型,不過有時朋友傾開偈,好似最近一款賣寵物用品嘅 apps我好想要,但往往冇 WP份,都幾落寞。 Nokia X玩到 Android apps但又有番 Nokia風格我會 buy,加上佢咁平,買嚟做後備都抵。」

MWC平絕之選

小米同 Moto G有咁多網友熱捧,平機上位已成趨勢。除咗 Nokia X之外, MWC2014亦有不少 100至 200歐元價位嘅激平入門機。

Acer Liquid Z4

Acer Z4配備 4吋 WVGA屏幕, 1.3GHz雙核處理器,比 Nokia叻嘅係有 500萬像素鏡頭。僅售 99歐元(約 HK$1,038),機背有類似 LG G2嘅觸控鍵 Acer RAPID Key,售價: 99歐元,約 HK$1,054

ZTE Open C

Firefox手機上年開始上市,今次 ZTE公布呢度 Open C雖未有定價,但 Mozilla話 Firefox手機最終目標係 25歐元(約 HK$266),真係分分鐘平過你食餐飯。

Lenovo S660

S660配備 4.7吋芒、 1.3GHz四核處理器、 1GB RAM、 8GB ROM、前後鏡頭分別為 30萬像及 800萬像連燈。點睇都係中價機,係差在無 4G,售價只需 160歐元,約 HK$1,800。

來看星星星的新機  Samsung Galaxy S5

呢排網民講星星多過三星,好在 MWC仲有部矚目機王 Samsung Galaxy S5公布,網上流傳 2K芒、 4GB RAM全部唔中,機背亦有網民笑似膠布。不過睇真啲, S5今次唔再堆數字鬥高機能,反而力推各項特殊功能,防塵防水、指紋辨識、先影相後對焦、心跳偵測等等,集各家之大成有如外星人都敏俊般 sell萬能,韓迷實 like。


Samsung Galaxy S5

系統: Android 4.4.2
處理器: Qualcomm Snapdragon 801 2.5GHz四核
記憶體: 2GB
制式: 4G、 GSM、 WCDMA
屏幕: 5.1” 1,920× 1,080
鏡頭: 1,600萬像素(後置)、 200萬前置
儲存:內置 16或 32GB、對應 micro SD
體積: 142× 72.5× 8.1mm
重量: 145g
售價:未定
發售日期: 4月 11日

四大新功能 相機有驚喜

S5主要升級喺處理器上,而屏幕尺寸由 4.99吋微升至 5.1吋,機背一樣用膠但改用點點 dot紋防滑。拋 spec.冇以前咁霸氣, 4大新功能睇落似炒雜錦,但特派記者實試過又覺有驚喜。認指紋要掃掣係蠢過 iPhone一按到位好多,但個相機用上單反都用嘅相位對焦技術的確神速,利用連拍嘅再對焦功能用落同一 take過分別不大, S5今次用落比外表更有驚喜。

指紋解鎖

S5嘅指模鎖係要由芒底向 home掣捽落去解鎖,實試其反應同成功辨識率都未係好掂,或者因為仲係試版機啩。

測心跳

S5機背鏡頭下方嘅 LED補光燈旁加入心跳監測感應器。只手指掂住畀感應器用紅光照照,就可以測量到用家心跳率。

防水防塵

挑戰 Sony防水機地位,可浸於 1米水深下達 30分鐘,達 IP67級別,比 Z2多一級防塵、弱一級防水。

最強後對焦

喺感光元件加入相位對焦模組常見於無反換鏡機, S5最快對焦可達 0.3秒,使用 Refocus功能時連拍照片都唔覺有窒機、唔易手震,亂影都中焦。


同場加演曲面智能表 Gear Fit

智能手表亦係 MWC重點產品, Galaxy Gear亦推出一系列新產品,當中 Gear Fit用上 1.8吋曲面 Super AMOLED屏幕,修長靚樣當堂醒目晒。加埋 IP67防塵防水認證,帶住佢同 S5做運動落雨流汗也不怕。

網民點睇 S5?


有讚! 

來自巴黎嘅潮模 Sophie用開 Note嘅佢話 Android多嘢自訂啱 fashion友玩,而 Samsung機向來都係 An機最順,喺歐洲都勁多 fans。 S5仲諗緊買唔買,對佢個影相再對焦功能好有興趣, snapshot機會一閃即逝,有得改正幾好。
blog: http://sophietraverse.com 

 


有彈! 

有網民對於 s5繼續用膠有啲失望,仲覺得隻金色瘀瘀黃黃,加埋 dot紋似藥水膠布。另外亦有評論覺得 Note3有 3GB Ram, S5得 2GB似乎未算機王。

Hi-End先決 首創手機降噪

去年初 Sony以 Xperia Z打響頭炮,叫好叫座,其「 Omni Balance全方位平衡」設計風格亦一直繼承到及後的 Z1、 Z Ultra等機款成為招牌。今年要同 S5、 G PRO 2兩部機王睇齊,新旗艦機 Xperia Z2自然唔可以齋靠個樣,而係要打造出人冇我有的個性!
講規格,除 4K拍片、防水防塵、 5.2吋 1080p IPS Mon及 Snapdragon 801 2.3GHz四核心 CPU外,最亮眼必數佢個「 Digital Noise Cancelling( DNC)」功能,可通過手機為耳機自動降噪,想隔噪音唔使額外買降噪耳機。 Sony仲為 Z2推出一款外接高端收音咪,看似想跟同廠高瑞音樂系列 High-Resolution Audio接軌,望能以 Hi-End音樂體驗突圍,重拾 Sony Ericsson時代 Walkman手機嘅強勢。


Z2的機內降噪需配合附送的專用耳機 MDR-NC31EM使用,多數降噪耳機都要用電池,但 NC31EM直情電都慳番,插手機用就有效果,兩邊耳塞各有一支收音咪,接收環境噪音畀 Z2個 DNC迴路補償,可以做到 98%消噪效果。 


Z2支援超清 4K拍片,不比其他機王拋離之餘,更推出外置式立體聲收音咪 STM10手機配件(需另購),令拍片、錄音都可更加專業。

同場仲有呢部 Tablet Z2, 10.1吋芒、 4核心 CPU、 800萬像素鏡頭,基本都係上代平板的升級版。 

唔止耳機降噪夠威, Z2亦有類似 HTC ONE嘅前置雙喇叭,配合廣域 S-Force環繞音場( S-Force Front Surround)設計,喇叭音效會更加逼真。 

MWC現場仲展出緊一套車內音響,將 Z2放入車頭 NFC手機架內就會自動連線播歌,介面亦會同時簡化,只顯示聽歌、地圖、上網等大 icon。如果有埋充電功能同車頭 cam,可以 save相入手機就真係一條龍服務!

自然顯色 主動降噪

Z2外形睇落同 Z1相似,可能係同樣以 Omni Balance設計,機形四四方方,機側招牌圓形開機掣都冇少,雖新鮮感不大,但鍾意 Z系外形嘅舊機主升級應會較少考慮。規格方面,除前文所講多項頂級規格外,值得留意 Z2有內置 3GB RAM,可充分應付大食嘅 Android系統,「掃 mon」唔怕窒住窒住,亦更能發揮多工優勢。另一肉眼見到嘅升級,必數其 5.2吋 IPS芒,編輯話唔建議 AV仁買,因為 Sony採用了 Triluminos技術及新技術「 New Live Colour LED」,唔止強化顏色細節及表現,更將可視角度加到 178度,隔籬左右更易發現你在上網睇寫真。
講番 Z2音樂功能嘅提升,其賣點之一 DNC功能,可令 Z2跟機耳機減少 98%環境噪音,擁有可媲美坊間動輒過千的降噪耳機的隔音效果,身處鬧市亦可安靜享受音樂。近排 Sony部高解析度 walkman ZX1都採用了 Android介面,令人不其然期待未來 Xperia會否推 Hi-Res規格的聽歌手機。

Sony Xperia Z2

螢幕: 5.2吋 1,920× 1,080 IPS LCD( 423 PPI)
鏡頭: 2,070萬像素 Exmor RS鏡頭(前鏡頭: 200萬像素)
影片: 4K( 3,840× 2,160/30p)錄影
處理器: Qualcomm Snapdragon 800四核心 2.3GHz
記憶: 16GB(支援 microSD最多 64GB)
其他: IP58防水防塵設計
體積: 146.8× 73.3× 8.2 mm
重量: 158g
發售:預計 2014年 3月

MJ「唱」主題曲夠 gimmickr 攝影師 Brett Sun

「呢部 Z2未有實物唔知如何,但佢用 Michael Jackson首冇出過碟嘅歌《 Slave To The Rhythm》做廣告歌就吸引到我留意。暫時睇規格都啱用,最有興趣係佢個 4K拍片同 DNC技術, Sony出品,音色、鏡頭等都應該唔會點失望。其實硬件都冇乜好挑剔,之後都係睇軟件啦!」

入門機拍高清片

話 Z2係迄今為止最強 Sony機應該冇反對,但 MWC上其實亦有公布新一代 M系入門機 Xperia M2,硬件有 4.8吋芒、 S400四核心處理器及與 Z2一樣的設計,更驚喜地可拍攝真正高清 1,920× 1,080影片及可 2秒鐘內捕捉 31格相片的高速鏡頭。

Spec.
4GLTE/4.8吋 TTF/800萬像素 Exmor RS鏡頭/高清錄影/Snapdragon 400四核心 1.2GHz/139.6× 71.1× 8.6 mm/148g/預計 2014年 3月

LG G PRO 2 大芒機王搶閘到港

LG G Pro 2呢頭响 MWC有實機試玩,轉頭韓版水貨已出現响旺角先達。 LG G Pro 2同樣有齊旗艦機規格,繼承上一代 G2設計特色,包括獨家 Rear Key單手機背操作及改良自 KnockON嘅 Knock Code輕敲感應,亦有更強嘅 5.9吋 1920× 1080 IPS靚芒,加上可換電插咭,內外規格都可謂無法挑剔,近期香港人人沉迷韓劇中晒「韓毒」,難怪開價六千仍成為先達本週機王,但小心個芒太靚,邊行邊煲劇行咗出馬路,菜街已經有車行㗎啦!
G Pro 2外形似足 G2加大版,機面可見巨大熒幕幾乎用盡兩邊機側,且上下邊框同樣窄,唔浪費任何空間。上代機有嘅 KnockON功能,嚟到新一代機改名變成 Knock Code,除咗可同樣輕敲兩下熒幕啟動或關閉手機外,亦能設定以敲屏順序解鎖。整體上 G Pro 2唔算有特色, Knock Code功能比較雞肋,但同時亦冇明顯缺點,四平八穩,加上 LG芒向來有高評價,想買大芒睇片,揀佢一定啱 feel。


LG芒靚是常識吧?勁到好似 G Pro 2咁幾乎可用盡四邊機側,可見工藝同樣有番咁上下。 

Knock Code開機試玩後覺得唔太實用,相信只有擅長節奏強勁「敲擊樂」嘅唐伯虎會啱使。 

保留上代好評之 Rear Key,將開關機掣及音量鍵放到機背,可有限度地單手操作,但試玩發現使用時較易阻到鏡頭,要同按「開關+音量下」 cap screen亦有一定難度。

近睇可更清楚見到凹凸坑紋,另外機背下方亦有喇叭位。 

只有半個一毫子咁厚,機身非常薄。 

LG G PRO 2

螢幕: 5.9吋 1920× 1080 IPS FHD( 373 PPI)
鏡頭: 1,300萬像素(前鏡頭: 210萬像素)
影片: 4K( 3840× 2160)錄影
處理器: Qualcomm Snapdragon 800四核心 2.3GHz
記憶: 16GB(支援 microSD最多 64GB)
體積: 157.9× 81.9× 8.3 mm
重量: 172g
售價:$6,280
查詢:三禾電氣( 2374 0618)

相機實試 魔術對焦實用

 


响內置嘅影相模式下就會搵到魔術對焦功能,拍攝完後即可揀選對焦點,前清後濛或前濛後清一樣得。 

第一張先將對焦點放到後面,前景自然因此變得唔清晰。 

同一張相,亦可以將對焦點改為最前面圓形位置,令全張相只 sharp一個部分。

後記 新機拼個性 鬥跑分最 out

今屆 MWC比較注目的仍然係一眾智能手機大戰,但由 GS5及 Z2可見,兩大廠商宣傳重點已不再係幾多核心、跑分幾快,响硬件類似的情況下,再鬥硬件明顯已不合時宜,更多的配套及更佳的整合服務似乎先係未來能否跑出嘅關鍵, Nokia僅推出入門機亦夠手機迷講足一星期已是例子。
以往從不著重「整合性」嘅廠商應會感到愈來愈不着邊際,繼續加入未知是否有用嘅功能維持新鮮感顯然不是上策。另外,各家廠商雖急急推出智能手帶/手表,但仍未有廠商能真正講得出「點解消費者要每日都戴?」,沒有致命誘因下,暫時未見此類產品有其必買性,唔通又要寄望 Apple可以率先交出答案?


撰文:司徒港燊、熊俊彥
攝影:健(現場攝影)、彭自維

    全站熱搜

    tvb4life 發表在 痞客邦 留言(0) 人氣()