韓國最近流出一張疑似今年入伍的男明星名單,金秀賢同朴有天都榜上有名。慘喇!如果佢哋去咗當兵,呢兩年仲有乜睇呀?

電視精

星星大結局 保鑣接棒

幾好睇的電視劇總有大結局一日。《來自星星的你》曲終人散,一眾 fans的心情,就正如《家有喜事》中的李香琴:「無電視睇點算呀?世界末日喇!」
接下來的課題就是如何收拾失落感。最好的辦法當然係盡快投入另一段新感情……係新劇至啱。
緊接《星星》推出的新劇,當然來頭不小。由 JYJ成員朴有天主演的《 Three Days》接棒,警匪片以硬橋硬馬真功夫取勝,唔講愛情唔玩超能力一樣吸客。
今期大家喜歡萬能外星人?睇埋下期隨時變心愛上保鑣!

Ads by Google

王世子變保鑣

近年有睇開韓劇的韓迷,對朴有天都唔會陌生。 2012年的《屋塔房王世子》爆紅,囊括當年所有電視大獎,一躍成為一線男星,上年年頭同尹恩惠拍完《想念你》之後,相隔一年至推出新作。未有食住個勢拍劇 keep人氣?原來朴有天轉戰電影,仲獲得《韓流怪嚇》大導演奉俊昊賞識,搵佢拍攝新戲《海霧》,擔正做男主角。本來佢都唔想接呢套劇,不過劇本好有挑戰性,所以就期拍攝。今次於《 Three Days》中,朴有天飾演精英保鑣,要於三日內搵返失蹤的總統,與五名嫌疑犯鬥智鬥力。聽落同佢之前的角色好唔同,難怪一日追幾組戲都要拍。


朴有天身高 180cm,夠高大,扮保鑣入形入格。 

劇中朴有天的角色心思細密,力求完美,有正義感,又係男神條件齊集,無得輸! 

2012年的《屋塔房王世子》大收,掀起時間穿越劇的熱潮,亦令朴有天再受注目。

荷李活規模大製作

除了男主角朴有天,《 Three Days》其他演員陣容一樣好有睇頭,飾演平民總統的是實力男演員孫賢周,地位猶如香港的黎耀祥,好戲加形象入屋;奸角有崔元英,即係《繼承者們》入面的尹室長,令人非常期待一班老戲骨的表現。《 Three Days》的另一個賣點是龐大製作費,超過 100億韓圜(約 7300萬港元)。 16集劇,即係平均每集製作費成四百幾萬港紙。咁貴嘅其中一個原因係劇組起用荷李活的特殊攝影機來拍攝,以求拍出逼真刺激的動作場面。朴有天身為男主角,特別於開拍前上堂習武,拍攝時親身上陣,仲搞到受傷要入醫院,名副其實打到飛起。劇集緊接《來自星星的你》的檔期,究竟可以再掀熱潮,定係雷聲大雨點小?


認得樣但講唔出名的韓國甘草,孫賢周一定係其中一個。 

劇集拍咗一半都無,朴有天已經扭傷膊頭,要忍痛開工,隨時拍唔切呀。 

崔元英的代表作除咗《繼承者們》,仲有《百年遺產》戲假情真娶埋女拍檔。

撰文:關錦雯

    全站熱搜

    tvb4life 發表在 痞客邦 留言(0) 人氣()