男主角由澳洲嘅蘇利凡斯坦普頓負責。佢以往撈開電視圈,今次佢飾演雅典國會議員,能文能武亦能露肉。 

歐洋風

戰狼 300 打不死

近排成日睇奧斯卡電影,喂,好沉重好 heavy啫……
唔怕噃,春季電影第一波《戰狼 300:帝國崛起》秉承上集傳統,以藝術手法拍出劈友情節, slo-mo地打,型到裂去劈,即使驅唔到蝗,都應該驅到一身潮濕悶氣。

 


女將軍想當年被希臘背叛,因而向波斯敵軍投誠,以圖報復希臘。 

個人利申:上集《戰狼 300》我睇咗兩次。真係咁好睇咩? OK啦,其實都係睇視覺效果。當時邊會諗到,揸把刀可以咁有美感!打場仗,都靚到似幅油畫咁!
《戰狼 300》開創視效新潮流,自此好多電影東施效顰,不過點整都唔及得原班人馬咁正。

Ads by Google

開創暴力新美學

事隔 7年,第二集《戰狼 300:帝國崛起》,大家終於有得睇嘞。其實 2007年第一集上映時,電影已經連續兩周成為票房冠軍,其 4億 5千萬美金國際票房,更高踞當年全球票房排行榜第 10位。難得係電影有口皆碑,所開創嘅暴力美學又帶領潮流。
電影公司本來想即刻開拍續集,但導演薩克薛達( Zack Snyder)中途轉拍《超人:鋼鐵英雄》等其他作品,擾擾攘攘,卒之等到 2012年先開拍到續集。今集薩克薛達升呢做咗監製,導演一職就由《畸才家族》嘅諾姆穆路( Noam Murro)擔任,為原班人馬帶嚟新意。


上一集導演薩克薛達(右)憑《戰狼 300》成名,佢唔想食老本,一度退出續集而轉拍《超人:鋼鐵英雄》。而今次《帝國崛起》,佢退位導演,只會做監製。 

希臘於公元前 492年遭波斯首次入侵,事隔 10年,波斯再度攻入,雅典首當其衝。 

戰狼 300首領、斯巴達國王喺溫泉關戰役身亡,其慷慨就義嘅精神振奮全希臘,令所有城市齊齊反抗入侵。

上一集大部分人死咗,所講嘅原班人馬,其實就係死剩種。上一集背叛希臘軍嘅畸型人(左圖)會出現,斯巴達國王遺孀(右圖),今次更會為大家做聲音導航㖭。 


另一死剩種就係相中呢位爆肌仁兄,佢上集奉命回斯巴達,說服國會出兵,今集亦參與戰事。

第一集出現過嘅波斯國王(左圖)未成魔之前,都有凡人一面。而佢同女下屬有一段微妙又互相牽制嘅關係(右圖)。 



無論日景或者夜景,全部都係電腦效果。 

就連海水亦係電腦效果,攝製隊從未去過海邊取景㗎。 

最緊要有肉

《戰狼 300:帝國崛起》(美國、香港 3月 6日上映)由第一集 300個勇士死守溫泉關之後 3日開始講,當時波斯大軍大舉入侵希臘,戰火更蔓延到雅典。古仔就講雅典點集合各地兵力抵抗惡勢力。另一方面,上一集搶鏡到暈嘅波斯國王,今集將會講佢嘅成魔之路。當然唔少得,就係一班勇士嘅爆肌戲服。有歷史有藝術有打鬥仲有肉睇,我好滿足咯!


新加入嘅法國女星伊娃格連飾演波斯國王麾下嘅將軍,雖然電影以打戲為主,但當中伊娃都有少少露肉㗎(右圖)。 


新導演諾姆穆路拍廣告出身,其後轉戰電影, 6年前曾拍過《畸才家族》,口碑都 OK㗎。

撰文:娛樂組

    全站熱搜

    tvb4life 發表在 痞客邦 留言(0) 人氣()