Charlene Choi粉藍色 Candy bag$5,190黃色綴金屬釦皮手帶$1,200黃色皮腰帶$1,200all Furla橙紅併粉橙色連身長裙$9,800 Sonia Rykiel 

cover face

蔡卓妍 未試過被拒絕

感情要慢火煲,時間正是關鍵。
早前,阿 Sa孖住 William(陳偉霆)歎完世界回來捱世界,即上微博呻自己患上「放假後失落症」,幸好,訪問是在她出遊前做的,心情認真好到加零一,講到拍拖,眉飛色舞。二人行,轉眼已三年;今日她說,自己跟男友乜都似,談情更順心,二合一材料炮製這煲湯,似乎愈嗒愈有味,講到骨節眼,終於自認愛情至上,現在是,以前也是,「講真,我未試過被拒絕。」即係情場老手,無往而不利!
抵得佢那一副天真的邪笑呀!

Ads by Google

Profile
 

Charlene Choi
出生日期: 1982年 11月 22日(天蠍座)
出生地:加拿大溫哥華
身高: 5呎 4吋
體重: 97磅
語言:廣東話、普通話及英語。
學歷:玫瑰崗中學中六畢業
簡歷: 00年,接拍港台《青春@Y2K》正式入行。 01年,跟鍾欣桐合組 Twins,逐漸走紅。 07年,分別憑《妄想》和《戲王之王》獲韓國富川國際電影節和香港電影金紫荊獎頒發「最佳女主角」獎。
主要作品:個人專輯《二缺一》( 09),《 Beauty Remains》( 10),《 Blooming》( 13)。電影《常在我心》( 01),《我老婆唔夠秤》( 02),《下一站…天后》( 03),《再說一次我愛你》( 05),《妄想》( 06),《戲王之王》( 07),《武俠梁祝》( 08),《白蛇傳說》( 11),《超級經理人》( 13)。
微博: http://weibo.com/choicharlene 


William給我初戀感覺
 

聽到這句,我震一震,千禧年代仲玩這一套?追逐初戀喎!「唔係特登想去追番呢個感覺,係人夾人;「大家一齊會做一啲好儍的事情……總之好儍啦!嘻嘻……
「都幾 sweet!」講完都唔明,咁至似「初戀」啩!
杜汶澤曾說,若果 William在港,唔使旨意搵到阿 Sa,直言她有異性沒人性云云,當事人聽到,不怒反甜笑,「係呀!沒人搵到我,一定黐住,最好啦!我會不眠不休陪佢打牌。」吓?!「佢以前唔打麻將,只玩啤牌,受我影響至打,等於佢鍾意做運動,我都做吓咁囉!」擁有六嚿腹肌的陳生,見到女友如此乖巧,確是飲得杯落。
近幾年,二人投入內地發展,走勻大江南北,見面時間寥寥可數,愛得癡纏也屬人之常情,我笑她黐身,「但我一啲都唔麻煩。
「想見㗎!但唔會嘈,亦唔會埋怨,男人一定要以事業為重,如果一個男人淨係識得跟你談情說愛,我會覺得呢個男人好廢;「我好欣賞佢,意志力、生命力都好強,好搏命,你睇佢跳舞就知,令我感覺到生命,好似勁量(電芯)。」概括而言,陳偉霆乜都好嘛!明啦!


雖說公開拍拖,但二人出入依然避忌,這又令我想起愈愛愈高調的吳千語和林峯,相映成趣。《壹週刊》圖片 

農曆年遊泰回港,馬上影張嘟嘴相放微博,並留言唔想返工云云,講中晒大家心聲啦! 

被助手拍下戴住「$」眼罩和頸部按摩機養神的搞笑圖片,偷得浮生,正好是當下寫照。《蘋果日報》圖片

 


Charlene Choi粉紅色皮 Mini bag$3,770金色心形吊墜長頸鏈(未定價)both Furla粉紅色茄士咩短身冷衫$6,000 Michael Kors淡粉紫色半透視長裙(未定價) Carven 

小別勝新婚,各有各忙之外,去年,男的更甚少回港,「七、八個月沒返過香港,連續喎!」今年,情況將會有增無減,小倆口想見面,真係唔易,「事業睇得重,佢比我更甚。」那麼,祖國佳麗繁花似錦,對他對自己的信心,又有幾大?!「真係不太擔心,第一,對方讓我有信心,第二,我哋好似,好怕煩,又好懶,懶得去自找麻煩。」
咁口響?「之前,幾個朋友傾開偈,大家互相打探各人的男友、老公會唔會收埋電話?電話校震機還是響機?我心諗,好彩 William電話周圍擺,又校響機,好搞笑!因為佢太懶,電話/電郵密碼都用埋我的密碼,咁 OK啩!」撈亂密碼跟撈亂錢使,殊途同歸,他都幾難走得出她的手指罅,「既然大家一齊,寧願花時間去開心好過啦!
「……始終沒寫包單……除非兜口兜面見到,就要馬上處理。」一句「沒寫包單」可圈可點啊!

Ads by Google

結唔結男方決定。
 

「真係沒所謂,都試過啦!」女人心,海底針,轉個頭,喃喃地說:「今次,我會搞婚禮,要堂堂正正搞一次,上次甚麼都沒有。」好呀!「我發現一間海底酒店,玻璃球設計仲有間小 chapel,佢鍾意養魚,屋企有好大個魚缸,啱晒喇!」咁幾時?「杜拜和斐濟都起緊,斐濟更快落實……」酒店落實話咁易,我係問,閣下婚禮幾時落實,呢個至係最重要嘛!
才 31歲的阿 Sa,事業有成,具經濟基礎,結過婚,亦離了,女人一生,差不多經歷了一大半,投注愛情,一方面要比以前更穩陣,另方面亦要更寬心,輸贏一線間,過得自己最重要。「我覺得自己唔同咗!

 


Charlene Choi白併杏色手袋$5,890金色綴心形釦手鈪$1,110金色手鈪$1,460橙色皮腰帶$1,110all Furla彩色印花背心裙$7,090 3.1 Phillip Lim 

「之前,有一個秘密(跟鄭中基結婚),為保護它,一定要講一些自己唔想講的說話,一個大話冚一個大話,好辛苦;「依家,忠於自己,已沒甚麼可以傷害到我;「收埋過(戀情),唔想再咁辛苦。」
數數手指,入行至今,大家知道她的男伴來去只得鄭、陳二人,年紀小小,算專一吧!「我唔知自己係咪叫專一;「我鍾意拍拖,又好驚拍好多次拖。每一次,雙方都要由出世開始講講講,識過第二個,又要從頭再講,生活模式又再適應,又再一次介紹給父母親戚朋友認識,好煩呀!」這說法又幾務實。
「我接受唔到跟一個人一齊,但又唔係好愛對方。」
愛與不愛,有些人會靠第一個感覺去判定,有些人則會放長線觀察,阿 Sa屬後者。「我沒試過一見鍾情,大部份(戀情)均由做朋友開始,沒試過 one night stand,亦沒試過今日相識第二日就拍拖,一定要傾過偈,要知對方係乜料嘛!」
愈傾愈鍾意,她亦樂於主動表白,「最唔鍾意曖昧感覺。」
「講真,我真係未試過被拒絕。」沉默過後,彈出這句,又叫心頭牽了一下。


後記
 


Charlene Choi黃併杏色皮手袋$7,490灰色膠鈪錶$1,350金色心形吊墜戒指(未定價)黑色高踭鞋$1,795all Furla粉藍色通花喱士恤衫$6,500粉綠色針織外套$24,000both Burberry Prorsum粉藍色皮裙$4,670Opening Ceremony from Lane Crawford 

我跟阿 Sa一樣,最憎曖曖昧昧,「大人至會玩 mind games。」不幸地,這個 game,風行全港。
政治,本就是一個立場對壘的遊戲,企邊一邊,可以有很多理由,而理由愈多,情況愈複雜,遊戲愈好玩啩!
我跟阿 Sa做過幾次訪問,感覺均不俗,好友說得奇,「你依家幫佢喇!」跟明星做個訪問,也要講立場?
好吧!桌面客觀證供,準時有禮爽朗健談……理據也很多,足叫我放膽直認,係咪係囉!
直截了當,何必顧左右而言他?!冇 mind的人至愛玩 game。


Shop List
 

3.1 Phillip Lim尖沙咀海港城港威商場 G310-311號鋪 2113 0311
Burberry金鐘太古廣場 101及 201號鋪 2918 4022
Carven中環置地廣場 213B號鋪 2801 4051
Furla中環國際金融中心 1055號鋪 2234 7148
Lane Crawford中環國際金融中心 3樓 2118 3376
Michael Kors尖沙咀半島酒店 W2及 4號鋪 2366 2301
Sonia Rykiel中環皇后大道中 9號地下 G04號鋪 2525 6048


撰文:伍淑嫻
形象: Karen Ling
攝影: Kenji Leung  
化妝: Natalie Soo.Ki@D-mop beauty by ND& Co. 
髮型: Sing Tam@Pi4.com.hk
鳴謝: Furla

tvb4life 發表在 痞客邦 留言(0) 人氣()