紅菜頭鮮果慕絲$68原來係紅菜頭蛋糕,味道唔甜,紅菜頭味偏淡,底層的杏仁蛋糕較濕潤,算幾好食。 

試食王

健康很難

近年成日講綠色生活,知易行難,貴兩三倍的有機食物,唔係人人食得起呀。位於粉嶺的 IPC Foodlab,提倡 farm to table概念,用自家種植的香草、小麥草及菇菌等,加上本地農民出產的有機蔬菜,自設餐廳推出菜式。最近更進駐半山區,一半餐廳一半商店,裝修幾靚。與蘇豪相隔一條堅道,立即靜咗好多,食飯時間都只有半滿,侍應本來唔俾我哋兩人坐四人枱,但成晚都冇人,何必咁吝嗇?

 

餐牌的食物相影得精美,介紹詳盡,蔬菜由邊個農場來,咩食材係自家種植,連營養價值都寫埋出來,仲分埋生機食物( raw food)、無麩質( gluten-free)、防三高及防癌,詳細到似教科書。菜式算多,前菜分沙律、冷盤及熱盤,仲有主菜、素菜、甜品及飲品,睇咗咁耐,都冇人介紹吓招牌菜。當我終於研究完本餐牌,點菜時,侍應先話呢樣冇、嗰樣冇,念在你開業初期未準備好,但至少點菜前可以講聲,唔使等我撞手神!

Ads by Google

第一道菜姬松茸清湯,侍應先上碟,再用熱水壺將湯倒出來,原本好細心,點知侍應倒極都倒唔出,結果一碗接近一百蚊嘅湯,一人分量都唔知有冇。問侍應拎碗 share,佢拎隻咖啡杯俾我,話因為啱啱開張,未有碗!明嘅,日日都計租,梗要即刻開門做生意啦。味道其實唔錯,湯底清而菌味濃,兩啖已經飲晒。有機沙律菜細心地切成碎,入口新鮮,但無花果得一兩粒、番茄又得幾粒,大部分都係生菜,孤寒咗啲。主菜有白朱古力汁煎帶子,配搭創新,帶子煎得剛好,可惜分量似前菜,二百蚊得三粒,另一款三文魚味道普通,餐牌明明寫上「配炒田園蔬菜及蕃茜麥餅」,我只見到一堆藜麥同幾條生嘅菜苗,違反《商品說明條例》噃。


白朱古力汁煎帶子配肉桂及青豆燴野米$228唔覺有白朱古力味,似薯蓉多啲,說好的青豆燴野米冇影,換上燴雜菜,侍應完全冇交代過。 

慢煮煙三文魚扒配炒田園蔬菜及蕃茜麥餅$208三文魚唔夠嫩滑,煙熏味亦淡,藜麥分量係多,但唔飽肚,味道相當一般。 

IPC Foodlab時令有機菜沙律$98可選五種醬汁,店員推介芒果蜂蜜汁,微咁,冇乜芒果味。

香草配姬松茸野菌清湯$98姬松茸係自家種植,入口菌味濃,一層薄薄的清湯,竟然收呢個價錢,拍得住米芝蓮餐廳。 

餐牌用心製作,列明蔬菜由錦田、馬屎埔、坪輋等農場運來,當然相片同真實有段距離啦。 

 

健康食品永遠唔飽肚,食埋個紅菜頭蛋糕,個肚仍然感覺空虛,我諗鬼佬要食兩個主菜先夠飽。埋單八百幾,在蘇豪已經可以食得好豐富,要我健康?唔好意思原來我真係做唔到!

評分

食物:★★
服務:★★★
環境:★★★
抵食:★

 


商店售賣意粉、沙律、飲品、有機及健康食品,餐廳約有三十多個位,但枱與枱之間都幾逼。 

IPC Foodlab
地址:中環堅道 38號 A
電話: 2810 6083

試食王

喜歡外出用膳,也喜歡誠實,不相信飲食網站的所謂評分,也怕了所謂食家獲得優待後的意見,情願隱姓埋名,真金白銀,測試飲食雜誌飲食網頁捕捉不到的真實一面。


撰文、攝影:試食王

    全站熱搜

    tvb4life 發表在 痞客邦 留言(0) 人氣()