就算唔用 SeatFinder訂位,都可以睇到邊間餐廳有位,唔使逐間逐間打電話去問,慳番啲時間,同口水。 

ILIKE

唔使等位

出街食飯最怕等位,就算唔係出名食肆,都鬼咁多人等,等足半個鐘甚至一個鐘先有得食。元氣壽司呢方面叫做得好啲,可以用 app攞定籌排隊,差唔多有位再打電話嚟提醒你,但係唔通次次都食壽司咩!最近有個叫 SeatFinder嘅 app,㩒個掣就可以即刻訂到唔同餐廳嘅位,再喺 15至 30分鐘內去到就有得食。雖然而家個 app仲係發展階段,得銅鑼灣、尖沙咀、旺角同佐敦四個地方嘅食肆揀,但我覺得喺香港嘅潛力拍得住 OpenRice!

 


勞耀全 

Ads by Google

當重腳王遇上混能車

同事 Lawrence稱小弟為「重腳王」,意思係無時無刻都向住油門施壓,仲要係好大腳嗰種,而我嘅理由係:「唔踩,部車又點識行呢?」的而且確,自己一直冇參加過任何慳油比賽,因為知道一定包尾。放大假,飛美國,借咗一部 Hybrid Lexus( RX450h)代步, 3.5 V6,加埋電摩打,總輸出有成 299匹,所以喺 highway趕路,分外舒暢,亦因為咁,所以錶板支動力針,八成以上時間都企定喺「 POWER」範圍,與此同時,油針同「 CRUISING RANGE」都跌得好快!不過無可否認,當油電齊發之時,喺 highway又真係幾爽!


劉定邦 

唔出力,又點可以喺 highway保持一定車速,事關揸得慢,好危險。 

360度

每年必睇 NBA入樽賽,見到球星挖盡心思,勁刁鑽咁入樽,仲要不斷將難度提高,坦白講,有時仲好睇過比賽……點解講「有時」?因為搞咗咁多年,乜嘢入樽方式都有人試過,好難再變出新橋。
好在今年大會有新意,裝咗以色列 Replay Technologies嘅 FreeD系統,呢套嘢前年倫奧用過,重播時可以用 Matrix式特效凝住運動員喺半空,等你可以多角度翻睇動作,而且今次總共出動咗廿二支 5K攝錄機,令影像更清晰。合成過程只需 30至 45秒,呢頭睇完 John Wall入樽,轉頭已經可以 360度 playback,科技真偉大!


潘健文 

唔只入樽賽,東西岸明星賽都有用 FreeD,可以 360度睇占士大風車入樽。 

福利筍工

上星期香港雅虎搞春茗,詳細公布佢哋手機版 Yahoo!個新介面有幾好用,我用得最多嘅團購服務,又真係簡單咗同 load得快咗,抵讚。上到位於利園二期嘅新 office,梗係順便參觀吓環境有幾正啦,除咗有遊戲室同每個位都有張 Herman Miller櫈之外,原來公司仲包早午兩餐 buffet同大量零食,而且每個禮拜都會轉供應商,咁就唔怕日日都係嗰幾款菜式咁悶,真係愈睇愈葡萄。更羨慕死人嘅係,唔單只女員工有 16個禮拜產假,就連男員工都有 8個禮拜侍產假!再加埋其他好似一年六千幾蚊健身津貼之類嘅福利,好多行家都即刻想攞張求職 form填呀。


周群雄 

有咁靚嘅 canteen開飯, Yahoo香港副總裁兼總經理陳啟滔話員工攞完嘢食都唔會返埋位,比起舊 office派飯盒,關係更密切。 

text:科技組

    全站熱搜

    tvb4life 發表在 痞客邦 留言(0) 人氣()