寵物家

半面野良犬

上星期,香港凍到應該申辦冬奧,一想到在街上流浪的小貓小狗,就替牠們擔心。不過有隻剛出院,被領養了的唐狗反而頻頻離家出走,似乎掛住昔日四海為家的生活。牠就是在 facebook人氣急升,只剩下半邊臉一隻眼,樣子傻更更的狗狗「阿良」。當日在屯門由義工以燒味引入籠,運往睇獸醫,點知其後在荃灣走失,轉頭更闖進鄰居花園逃脫。搵狗過程驚險,大家都密切追看阿良的動向,這隻「野良犬」頓時成為網絡主角。
其實阿良在新居不愁寂寞,除了有私家豪華大花園任跑外,還有一眾同伴,有被遺棄的金毛尋回犬嵐嵐、十隻領養的貓貓,有些更和阿良一樣,身體有殘疾。好心主人愛明的家有如小型動物收容所,專收老弱殘兵,「有能力就付出多一點,只希望小動物喺呢個屋企住得開心,其他人就算批評我都無所謂。」

Ads by Google

燒肉行動

話說阿良本來出沒在屯門良景邨一帶,所以義工才叫牠做阿良。有日有動物義工貼出牠的照片求助,當時阿良大半邊臉全毀,滲出血水,一隻眼睛不見了,再不接受治療可能會有生命危險。恰巧被住屯門的愛明見到,翌日一班人立即出動尋犬,有義工知道阿良每日黃昏會到良景邨一間燒臘檔搵食,於是愛明和義工們就去燒臘檔行動。「我哋叫燒臘檔姨姨照平日一樣餵阿良,我哋就睇準時機捉佢入籠。接近六點,阿良開開心心嚟到燒臘檔。不過佢似乎感覺到有啲唔尋常,咬住燒肉周圍望,未食完就想走。燒臘檔姨姨留住佢,我哋就趁機捉狗,佢當時好驚,吠抱住佢嘅義工,但我哋一喝佢,佢就靜落嚟唔再惡。」
阿良馬上被送到非牟利獸醫服務協會( NPV),主診醫生指阿良可能是跟其他狗打交時受傷,而傷口非常大,更有過千條蛆蟲,非常棘手。花了數天才徹底清除阿良的蛆蟲,再做手術縫針,阿良更要留醫近兩個月。幸好阿良都撐得過,而且常常笑笑口,不少市民更捐錢救助。「本來另一位義工打算收養阿良,但因居住環境問題而放棄。本身我有三隻狗,但剛巧有隻走了,衡量過自己還有能力照顧多一隻,於是就收養阿良。但我同佢本身無咩交流,只係靠每日探病嗰十五分鐘,同烚雞柳拎俾佢食建立感情。」愛明說。


知道阿良鍾意食燒味,特意買了瘦燒肉氹佢開心,佢都食得幾斯文。 

良景邨燒味檔姨姨話餵咗阿良九個月,同佢講唔好中午嚟搵食,阿良真係識轉時間黃昏先嚟。姨姨話佢初時大大隻,塊面受傷後瘦晒,以為佢過唔到呢關。 

近睇阿良面上不少傷疤,應是以往和其他狗打交的戰績。頸後一束毛在手術後還未長回。


昔日阿良院友華D(後),情況亦非常嚴重,但痊癒後仍未有家,愛明希望大家可以幫幫忙。 

單眼不宜再流浪

阿良出院第三日要覆診植入晶片,愛明朋友駕車接送,回家途中爆呔,阿良竟然乘機逃走。「我當日病咗,知道消息後馬上出去搵阿良,又喺網上叫人幫手留意。之後我不停收到電話,有啲通報消息,有啲就怪責我。由朝搵到晚,有人見到阿良就遠遠踩住單車跟佢尾,終於喺夜晚十一點,阿良坐咗喺小草坪上,差唔多三十個義工遠距離將佢重重包圍。最後由 NPV照顧開佢嘅護士,再次用燒肉引誘佢先成功捉番佢。」以為阿良從此乖乖聽話,誰知只是事隔十日,阿良趁主人外出食飯時又撞開道門出花園走佬,「我都諗住我哋緣盡喇。點知第二日看更話有人投訴花園被搗亂,我知一定係阿良!佢由我住嘅第 9座衝到去第 13座,仲企喺牆邊,無辦法,唯有搵消防員嚟救佢。」有十幾戶花園都被阿良「蹂躪」過,愛明結果賠了四位數字給鄰居。
走失兩次,不少在網上關注阿良的人,都質疑愛明是否懂得養狗。為何不考慮讓牠回到街上?「我哋同 NPV嘅醫生傾過,佢冇咗一隻眼,又有義工指曾經見過佢俾其他狗追咬,覺得佢未必適合再流浪。其實阿良依家都定咗落嚟,上個月佢剛來我屋企,成日都隔住窗望花園,不過依家我去到邊佢都會跟住,只係想去便便時會拍窗要求出花園屙。」愛明在門上加多幾把橫鎖,阿良出花園就戴上兩條狗繩,一定拖到實。「唯有將預防措施升級,有時我都會買啲燒肉、燒排骨佢食,我會先去油,等佢回味吓開心吓。有次幫佢抹完身,大家關係親密咗,希望佢知道自己已經有家,唔需要再流浪。」


阿良係跨欄好手,跳過幾十幅一米高的牆,衝了十個花園逃走。 

消防員救阿良時都相當「牙煙」,對峙 20分鐘後才終於捉到阿良。 

採訪時人太多,阿良又隔着玻璃望花園,似乎想匿埋。 

愛明到 NPV學做蛋糕,畫得阿良非常神似,阿良見到蛋糕開心到尾巴勁搖。 

動物收容所

除了有花園,燒味,雞柳外,阿良還有一班新的貓狗兄弟姊妹。連阿良在內,愛明養了 3隻狗、 10隻貓,差不多全部都是領養回來,如金毛嵐嵐就因前主人要搬上公屋而遭遺棄,也有和阿良一樣身患殘疾的寵物,其中一隻肥貓雞雞就被摘除了一個眼球,另一隻眼又有白內障,還有一隻有腦癱的貓貓朗朗,全無自理能力。愛明人如其名,充滿愛,「我本身有做開長者義工服務,想到動物都需要人幫助,於是就由捐錢做起,然後慢慢再領養。上街救狗,反而係第一次,因為養咗有腦癱的朗朗後,發覺好多動物都需要人幫助,於是就身體力行。」愛明在香港人網主持音樂節目,另外亦有做婚禮司儀,工作時間較彈性,方便照顧到小動物。「朗朗只可以瞓喺度,行唔到,連去廁所都要人抱着,按摩肚仔先可以大小二便,食飯都要人餵。工人姐姐好幫手,我每次領養小動物,都會問佢好唔好,因為佢都要幫手照顧嘛,佢都話好,要救。」愛明更為貓貓設了一家貓房,只有貓貓住,近來天氣凍更長開暖氣,又有兩米爬架、玩具。這個家的小動物,可謂苦盡甘來,天氣再凍都無有怕。


愛明為腦癱的朗朗用膠水喉通自製輪椅,讓牠感受四腳踏地的感覺。又每晚都幫牠點艾條紓緩病情。 


貓房差不多 100呎,又有暖爐、冷氣, 10隻貓喵住得好梳乎。

朗朗飲水會嗆到,愛明就在濕糧中加水,助牠吸收水分。 

雞雞天生痴肥,又有眼疾,但身手不錯,可以爬上貓架最高層。 

每晚都有放貓時間, 10隻貓 3隻狗好壯觀。

撰文:吳韻菁
攝影:陳偉傑

    全站熱搜

    tvb4life 發表在 痞客邦 留言(0) 人氣()