南非鮑魚$488,侍應哥哥見我靚仔又和善,急不及待私底下明醒我 order呢隻餐牌無列出嚟嘅十六頭南非鮑魚,再講解咗一大堆南非鮑的優點,講埋大廚花費幾多功夫嚟烹調。食後評語是無浪費到隻靚鮑。 

試食王

澳門清靜地(直到目前)

如果,我當你朋友,我會強烈建議你每個週末也千萬不•要•去•澳•門!
點去呀?下晝去港澳碼頭,只見人頭,然後服務員用超級不耐煩的態度話你知打後幾班船已經爆滿,你買飛就快唔好阻住晒。千辛萬苦去得到的話,截架的士的難度直逼爭取到真普選,酒店房價像 0027股價不斷向上。我真係情願匿喺屋企煲全智賢。

 

你以為只有氹仔或葡京一帶塞死?我已經避到去內港碼頭舊區的十六蒲,嘩,賭場內每張枱至少有三層賭客圍住,你要買鋪大,要像上班繁忙時間用盡九牛二虎之力擠入地鐵車廂般好身手!中咗,其實點攞得番啲籌碼?
所以,當你去十六蒲索菲特酒店十八樓,新開張的中菜餐廳樂軒華,見到全場空無一人,確實呆若木雞。價格太貴?咪玩啦,在今日只有自己好窮而身邊個個好似好有錢的時代,賣得愈貴愈多人幫襯啦。「咁係因為我哋餐廳未正式開張,未谷行力做宣傳,所以未係有太多人客啫!」疑似經理操不算流利粵語的男侍應解釋,仲問我使唔使攞份報紙睇睇等人齊,有禮貌得令我感動。

Ads by Google

大玻璃無敵海景,古色古香裝修風格,當然是針對愛帶一喼現金的目標顧客,揭開餐牌,又唔算貴喎,百幾蚊碟小菜,好仁慈吖!雖然少少幾頁紙會出現十九幾次鮑魚乜乜鮑魚物物,至少有得揀唔食山珍海錯喎!正當我循例問問有乜推介,以為侍應會在餐牌中點一項之際,他立即毫無疑惑地果斷地介紹一味餐牌上沒有品提過的南非鮑魚,然後解釋唔落餐牌的原因係務求為貴賓提供更大價格優惠,再報上一個好像相識廿多年知心好友般的笑容。對,豪客吃飯不是吃味道,而是吃被尊重,這位相信母語是國語的侍應,前途無限。


和牛南瓜盅$128/一人份,碟長長,盅細細,因為要擺到似幅畫般優美。可憐我未欣賞已經忍唔住將和牛粒倒入生菜捲成包狀再放入口腔。藝術嘅嘢,我邊識欣賞吖! 

彩椒銀杏鱈魚$168,呢碟堅好食,估唔到鱈魚都有鮮味,今時今日,係出奇嘅。 

黑松露炒雜菌$168,比坊間的炒雜菌炒得乾身,味夠濃,黑松露香刺激食慾,不錯。 

這全海景,但不是面向鬧市,晚市去其實無乜嘢睇到。 

評分

食物:★★★★
服務:★★★★★
環境:★★★★
抵食:★★★★

樂軒華粵菜餐廳

地址:澳門十六蒲索菲特酒店 18樓
電話:+853 8861 1001

試食王

喜歡外出用膳,也喜歡誠實,不相信飲食網站的所謂評分,也怕了所謂食家獲得優待後的意見,情願隱姓埋名,真金白銀,測試飲食雜誌飲食網頁捕捉不到的真實一面。

$368食六頭鮑魚兼任食甜品


澳洲六頭鮑魚 

天氣反常,係時候滋潤一下。城景國際樂雅軒於 3月 1日至 5月 31日推出功夫湯鮑魚宴。七道菜套餐包括花腸熬製的功夫湯、澳洲六頭鮑魚、冰島長拑大蝦及海斑球等菜式,最驚喜,晚市惠顧更包甜品自助餐。原價每位$488,只須於城景國際 facebook下載優惠券,便可以每位$368享用功夫湯鮑魚宴。補身之餘,又唔怕荷包瘦身。

樂雅軒
地址:九龍窩打老道 23號城景國際 1樓
電話: 2783 3286
營業時間: 11:30am-3pm/6pm-11pm
甜品自助餐供應時間: 7:30pm-10:30pm
facebook專頁: http://www.facebook.com/thecityviewhk 

迪士尼蛋糕將經典重現


迷你情侶慕絲蛋糕套裝$138 

迪士尼到今年已經成立九十周年,為慶祝大壽,迪士尼在港的獨家蛋糕及甜品特許授權商——美心西餅,於今個星期推出米奇米尼系列。美心將二、三十年代的經典 Classic Mickey元素加入蛋糕和甜品之中, 3D造型迷你情侶慕絲蛋糕套裝,以米奇和米尼的大耳朵配上紅褲和波點裙作裝飾。尋找米奇牛油蛋糕內,更藏有米奇圖案。件件蛋糕甜品造型精緻可愛,迪士尼迷一定忍唔到手。
出售日期:現時至 4月 23日
查詢: 2743 3311


撰文、攝影:試食王

    全站熱搜

    tvb4life 發表在 痞客邦 留言(0) 人氣()