分成三大組後,就去唔同地點玩遊戲搶分。先嚟熱身砌 puzzle,落力砌之餘,記得要顧埋儀態,不然心儀對象都俾你嚇走。 

太爛玩

搶婚男女 144

上星期係 19年難得一遇「中西雙料情人節」,仲要係近十年來最凍,有情人攬到實梗係 warm,難為一眾單身男女睇到眼寃。與其喺屋企避節,不如走出嚟參加 speed dating,多個機會遇到 Mr. Right,好似楊崢遇上 Bosco咁,幾幸福呀。
海洋公園就趁情人節,連續三日舉行全港最大型 speed dating活動,專登去機場招募外國單身男女,報名人數多達二千幾人,最終選出男女各 144位,來自香港、中、台、日、韓、歐洲等地。今次 speed dating嘅形式以玩遊戲贏分數,唔使齋傾偈咁尷尬。來自台灣嘅參加者,冧盡全場,被封男神女神。唔通大家驚台灣收緊入籍條例,諗住快快手嫁個台灣人,搞移民?

Ads by Google

夠投入氣氛好

香港女多男少的現象已經存在多年,與海洋公園合作嘅 speed dating公司 FEVER負責人 Frankie話今次參加者中,有 8成女士,而上年同類活動就有 6成,「之前做過訪問,發覺香港男女都好樂意與外國人約會,覺得浪漫啲,所以今次就邀請世界各地單身男女來參加,等大家多啲選擇。由於太多人報名,挑選準則會以個人簡介、擇偶條件為先。」
當日 speed dating以遊戲活動為主,每位參加者都有機會和不同的對手合作完成遊戲,容易結識新朋友之餘,亦避免唔啱傾出現 dead air,有參加嘅女生覺得似大學 O camp,可與不同文化背景嘅人交流。
唔尷尬呢點最重要,起碼被問到點解參加,都可以答係貪可以免費去海洋公園!而有機動遊戲玩梗係比坐定定食飯易於投入,大家玩得夠放,唔會忸忸怩怩。 Speed dating只要包裝一下,邊有怕醜呢回事!


一朝早集合,先分組,不停有人大叫「有冇哺乳類?」「有冇雀仔?」,原來大家手持一張「飛禽走獸」分組咭。唔係鹹濕嘢。 

玩機動遊戲比坐低食飯氣氛輕鬆熱鬧得多,容易投入,勁驚時仲可以捉實隔籬嗰個。 

一齊玩碰碰車,一個軚盤兩份揸,掂到手仔都好正常啫。

去冰極館搵動物資料,咁凍,你睇吓男士壯闊嘅胸膛,再黐埋啲啦。 

全日最親密嘅遊戲係鬥快食 8吋長泡芙,由女士餵男士食,有細心嘅參加者就拎定紙巾出嚟幫對方抹嘴。 

參加者心聲

 


台灣女神 Tina覺得香港男士比較斯文,雖然當日結識唔到心儀對象,不過就收到隻毛公仔,贏晒! 

來自台灣的男神 Adon,覺得香港女仔夠大方,仲話冇聽過咩係「港女」。對女朋友無乜要求,最緊要啱傾。 

Alice話工作太忙,識唔到男仔,以前都參加過 speed dating,但唔會強求,當係嚟識多啲朋友同玩番日。

全日之「最」

玩咗成日,大家混熟不少,有啲健談嘅參加者一早就拎晒全組人嘅電話,有人就已經鎖定目標,笑住返屋企。總結全日,揀出幾個最難忘時刻,有 sweet有尷尬,都值得留念。


最 Sweet有男參加者一早準備好小禮物,送給同組女生,咁細心,應該加唔少分。 

最醒目有智能手機真係好方便,影完相,順手問埋電話號碼, send番俾人。 

最尷尬玩遊戲最高分嘅 2男 2女可以邀請心儀對象食飯,不過得獎者唔想領獎,又唔知邀請邊個好,被邀請嘅又唔想去。

最無奈中段突然有個開幕禮,參加者要上台熱烈歡迎嘉賓,仲要彩排兩次。企足兩個鐘,對住十幾間傳媒嘅鏡頭,參加者都話好尷尬兼好攰。 

最開心好彩最後都開開心心,搵夠 8個人共進情人節晚餐。餐廳每張枱都放了玫瑰花同蠟燭,大家飲住香檳幾浪漫。 

撰文:吳韻菁
攝影:陳偉傑、胡春輝、何韋程

    全站熱搜

    tvb4life 發表在 痞客邦 留言(0) 人氣()