馬雲○七年來港為阿里巴巴上市時,意氣風發,首日掛牌狂升兩倍,教人難忘,誰料一二年佢以私有化跣低小股東?(于港民攝) 

中環人語

馬雲心死 謀美國上市

踏入馬年,馬雲同馬化騰呢 pair「雙馬」,鬥得愈來愈瘋狂;吹雞、燒錢、補貼,在所不惜。其中喺香港上市嘅騰訊( 700),市值因而極速膨脹。本週一,騰訊升咗成三十一蚊,收市報五百八十元,雖然本週二股價回軟,但市值已超過一萬億港元。睇住對手嘅股價升到嘭嘭聲,咁又點到馬雲唔恨得牙癢癢?

Ads by Google

據接近馬雲嘅消息透露,馬雲對於能否喺香港上市已步入心死,並已經籌組喺美國上市。馬雲一直構思推行合夥人制度,推舉九個董事中嘅其中四個,佢解釋並非想全控董事局,而係想維持公司嘅獨特文化。不過證監會一直反對,雖然港交所李小加放晒聲氣要改制,但馬雲身邊人衡量過香港政府民生氣候,認為阻力極大,希望相當渺茫;轉地方上市,條路暢順好多。
不過咁,香港股市之暢旺與炒風,美國差得遠矣,亦方便唔到國內之同胞。想當初○七年時,馬雲將部分業務分拆為阿里巴巴集團來港上市。招股價十三元五角,佢夠膽死喺一二年以股價被低估為由,竟同樣以招股價將公司私有化,害到高追嘅一班小股東輸到一頸血。如果佢無將間公司除牌,而家要唧嘢入去壯大並非難事。此又是否做人不能短視的明證?

本週再現身


(梁佩均攝) 

金融界神秘大鱷肖建華,自從俾本刊起咗佢身世後,一直潛水。有傳佢又返唔到大陸,兼且一身蟻。不過小宗老友喺過年期間,再撞到佢現身四季酒店。當日佢一如既往,不斷踱步沉思;睇佢頭戴紅帽加上紅外套,相當應節,會否佢希望能藉此「邪一邪」呢又?

本週吞 pop


(張國慶攝) 

Ads by Google

而家興講香港仔精神。此種精神,可以係獅子山下的傳奇,亦可以係走精面、搏上位的故事。不過在九龍城呢間雜貨鋪嘅職員,應該同普遍香港人一樣,認為呢種精神係:「香港仔精神,吞 pop唔覺暈,醒番希望係有錢人!」

職場秘笈 因病得福

港大建築系畢業,由一個小小的項目經理,扶搖直上,升任至富豪國際( 78)、百利保( 617)及世紀城市( 355)的董事。
他每期分享不同的職場經驗及秘笈;要上位,無往不利。

上次提到開刀一事,今次再想當年,講另一個故事。當一九九七年香港機場由啟德遷往赤鱲角後,機場管理局要在新機場地段興建酒店,因此邀請發展商公開入標競投,當時我們公司有幸中標。但中標後還有很多細節及條件要與機管局談判,因為涉及雙方的利益衝突,故談判過程既漫長又艱辛,當時對方談判團隊有七至八人,由兩名外籍合約人士率領,而我方則只有我及另一位同事,對方見我方人丁單薄,有意無意拉長談判時間來打心理及「身」理消耗戰!
由於當時我還有其他項目要兼顧,在壓力及身心疲乏下,一不留神,中招患上肺炎要住院治療,但談判卻不能停止,入院後第三天,由於談判死線逼上眉睫,加上不想我同事孤軍作戰,唯有硬着頭皮,換上西裝離開醫院,到對方陣地繼續談判。還記得當天頭昏腦脹,面青唇白,四肢無力,氣若游絲,而對方亦知道我有病在身,不知是否怕傳染(肺炎是可以傳染)或佩服我方的拼搏精神,以致當天談判時間比以往短及爽快很多,很多細節都在互讓下達成共識。談判完成後,對方還扶我到電梯大堂,而我亦馬上趕返醫院繼續廠修。
回看現在部分八十後、九十後的打工仔(慶幸不是全部),不能承受壓力之餘,身體稍有抱恙,打過乞嚏就請假一天、 M到感冒又請假兩、三天,工作積壓着影響團隊進度,亦好像視而不見,我這一代,真是看不慣,請問各老闆有什麼好方法,提升新一代的責任心及作戰能力?

潮州人唔使注意身世


停車場水漬處處,一塊塊擋水漬帆布成為另類「假天花」。(陳浩樂攝) 

和黃旗下黃埔商場停車場掛滿帆布,入到去,一個唔覺意,仲以為去咗露營。現場見,俾咗錢入嚟泊車嘅司機,見咁嘅情況都避之則吉,泊去第二度,免得有滴水滴花自己架愛車喇。司機咁懊惱,唔係無原因,本刊一一年十月就報導過,有位黃埔業主以每月三千六百蚊租用屋苑停車場泊車,但愛車俾上方水渠漏出的銹水滴中車頂留痕。而管理處竟搬出《免責條款》拒絕賠償,只係於漏水位封番口就算數……隔咗三年,相信因為度度都漏,而家索性拉塊帆布就當遮醜!
睇番黃埔花園官網,介紹屋苑「設施齊全,管理完善」喎。喂,和黃假假哋都係市值超過四千三百億元嘅跨國企業,使唔使搞到咁肉酸吖!唔通潮州人就唔使注意自己乜嘢身世?冇可能嘅。

金牙大狀講嘢 周一嶽要做嘢


689嘅支持者用「雞」同「妓女」辱罵李慧玲、岑依蘭,擺明歧視性工作者。周一嶽仲唔郁手又更待何時? 

李慧玲被「即時死亡」、私人物品打包,引發震盪。佢去《城市論壇》講其經歷感受,俾 689支持者喝罵︰「你做雞!你收美金!」佢哋連同場出席嘅記協主席岑依蘭亦唔放過,一樣為之辱罵係「妓女」。若果 689嘅支持者只係如斯貨色,咁搵勻全香港可能真係唔到 689人也。
除咗人數係有限公司,更大鑊者係佢哋嘅見識水平。須知港元同美金掛鈎,港紙即係美金、美金即係港紙。香港地,請問邊個唔使港紙(即是美金)先?咁嘅常識都冇就學人走去踩場,咪盞映衰 689,等人知道只得咁嘅貨色嘅人至會蠢到支持佢。
呢班人常識貧乏之處,當然又唔止於連自己使緊乜嘢銀紙都未知。呢班盲毛更顯然唔知道今時今日,雞同妓女嘅正式稱號係「性工作者」,係受到法律保障嘅正當職業;試吓去收受性服務唔俾肉金,睇吓俾唔俾差人拉吖嗱。
班盲毛試圖用咁嘅字眼嚟侮辱李、岑兩位,實則歧視「性工作者」,咁周一嶽仲唔去拉人又更待何時?咪淨係識得𢭃人工至得㗎,做吓嘢啦!

中環人語迷你版

“推進利率市場化是人行的工作”

估中邊個中環人講呢句說話,送你 JWATCH J-37水晶版藍寶石鏡面限量版手錶一隻有意參加者,請於二月十九日(星期三)下午一時後,將答案、姓名及聯絡電話電郵至 mailto:centralman@nextmedia.com小宗只接受電郵,郵寄免問。

本刊員工及直系親屬不得參加。
為求公平及杜絕偷步搶答起見,請於每個星期三下午一時後
來電郵競猜答案;在此之前發出之電郵作廢。
超過一位讀者估中,先到先得,恕不接受上訴。
答案及中獎者姓名將於下期本欄揭曉。

上週人語揭曉答案

“將逐步取消一次性紓困措施”

曾俊華
得獎者: CYL
中獎時間: 1:00pm 12/2/14

廣告時間

你有某財團嘅黑幕想爆?你知邊間上市公司造假?
你仲想舉報地產霸權嘅不公?
歡迎你將財金界嘅寃屈或過癮八卦事,爆俾《壹仔》財經組知,一切報料,均會保密!

爆料熱線/whatsapp: 6829 5929

    全站熱搜

    tvb4life 發表在 痞客邦 留言(0) 人氣()