渣馬尖沙咀起點嘅巨型拱門喺倒數起跑時突然漏氣,仲要前排跑手同職員幫手托住,認真失禮。(羅國輝攝) 

八卦陣

亞運銀牌 渣打馬拉松失威

近年渣打馬拉松嘅負面新聞愈嚟愈多,包括網上難以報名、歧視輪椅選手、跑道太多斜路等等;再推高啲層次,有人話渣馬本土特色同人情味欠奉。今年開跑時又發生咗蝦碌嘢,事緣喺尖沙咀起點嘅巨型吹氣拱門喺倒數起跑時突然漏氣「跪低」,前排嘅跑手仲要幫手托起個拱門,全場噓爆,賽事要延遲五分鐘先再開跑,大會主持都好尷尬,唯有叫跑手繼續做吓熱身,嗌吓新年快樂等嚟緩和氣氛,相當突兀。

 


負責渣馬嘅動力國際,老闆係九四年亞運游泳銀牌得主李穎詩。 O八年北京舉辦奧運,佢有份參加香港區火炬傳遞,當時已懷孕七個月。 

Ads by Google

前年開始渣馬改由動力國際( ActionHouse International)負責,呢間體育商業顧問公司嘅董事李穎詩係九四年廣島亞運四乘一百自由泳接力賽銀牌得主,○八年北京奧運做過香港站聖火火炬手。動力國際主要負責運動賽事,包括香港七人欖球賽同埋渡海泳,今次咁失威,大家都好關心呢間公司喺呢項賽事嘅前景。
不過,動力國際嘅人員解釋,起點拱門「唔係我哋嘅管轄範圍」,而係主辦機構業餘田徑總會嘅馬拉松秘書處。之不過記者問田總,田總又老點記者搵番動力國際,但截稿前都冇覆本刊。雙方都唔想孭鑊,果然貫徹「發展」體育嘅官僚態度。

TVB小花 大躍進


無綫新聞小花鄭萃雯(左)喺微博上載同趙燕婷(右)跑完渣馬十公里賽事嘅合照,冇化妝嘅萃雯 BB一樣咁可愛,唔少宅男睇到流晒口水。 

無綫新聞小花鄭萃雯做咗人妻,令唔少宅男粉絲心碎,唯有繼續緊貼萃雯 BB嘅微博安撫吓心靈。萃雯 BB星期日跑完渣馬十公里賽事後,上載咗一張同小花趙燕婷嘅合照,寫住「又一年,向着目標,挑戰自己」。兩位小花唔化妝都見得吓人,仲有宅男話早知報名跑 10K添!
據了解,佢兩個舊年第一次參加渣馬,平時亦不時一齊練跑,好健康㗎!萃雯 BB舊年成績係一小時廿二分,今年一小時十三分完成,足足快咗九分鐘,宅男要陪跑,睇嚟都要花時間練跑喇!

林大輝龐愛蘭 唔跟葉劉

新民黨同公民力量上星期宣布結盟,區議員人數一下子由十二人跳升至三十一人,足以提名兩個立法會「超級區議員」,相比另外兩個中產建制黨派呢?經濟民生聯盟有廿五名區議員,自由黨有十一名,睇牌面,今次新民黨反超前。
有咗公民力量呢班新界東地區樁腳加盟,新民黨牌面上有力爭取立法會新界東議席,但喺立法會選舉期間代表公民力量出選新界東嘅龐愛蘭,同埋上年年頭先加入公民力量嘅林大輝,雙雙拒絕入黨,前者話唔想加入政黨,後者就想自由啲。樁腳有齊,但缺乏具全港知名度嘅人馬,想搵人出選新東,似乎仲要加把勁。


結盟當日,新民黨主席葉劉淑儀(前排左四)、常務副主席田北辰(前排左二)同埋新任副主席潘國山(前排右三)都有出席。(王偉洪攝) 

曾代表公民力量參選新東立會直選嘅龐愛蘭,拒入新民黨。(郭永強攝) 

盛傳下屆想喺新界東出選嘅林大輝,依然享受無黨無派嘅身份,同樣唔入新民黨。(王偉洪攝)

蘇錦樑負傷碌齡


插圖:祝健中 

務及經濟發展局局長蘇錦樑上星期出席中聯辦新春酒會,有報導話佢最近同教練學打保齡球嘅旋轉球,因為太用力,扭傷手指。佢一位波友同本刊講,蘇局長周圍撩人碌齡,都有搵佢打波,仲揀咗最近政府總部的香港會( Hong Kong Club)。香港會位於中環遮打道黃金地帶,乃係最高級會所之一,寸金尺土,所以保齡球場十分迷你,只得三條球道。據佢波友話,保齡球場設於地牢,一年前曾經裝修,但人流唔多。蘇局長就係鍾意個場夠靜,所以成為長期擁躉,一個人單打都好享受。
近月蘇局長諸事繁忙,港視發牌問題搞出大頭佛,要勞煩中移動放出流動電視牌照擺平;港台新大樓興建撥款問題未解決,呢排仲加多個商台名嘴李慧玲被辭職,引發商台為續牌自我滅聲嘅疑團。蘇局長碌齡減壓,整傷手指都繼續打。睇嚟港隊下次參加保齡球賽,不妨搵佢帶隊,應該比冬奧領軍嘅王敏超更加投入。


    全站熱搜

    tvb4life 發表在 痞客邦 留言(0) 人氣()