介面同功能超簡單,得閒可以玩吓。 

ILIKE

無聊到盡

細個搭港鐵,最鍾意留意坐邊個車卡,落車嗰陣會最近扶手電梯,自我感覺快人一步,好有成功感,而家諗番真係「超低能,勁搞笑」。勢估唔到,最近有人無聊到寫咗個名為「企邊」嘅免費 iPhone app,只要輸入身處嘅港鐵站同目的地,個 app會自動搵出最適合坐嘅車卡,連轉車坐邊卡都詳細列明!研發者仲話,為咗保證資料百分百準確,仲親身去到每個站做「實地考察」,證明喺香港地,有人為咗無聊,可以去到好盡。

Ads by Google


林梓添 

 

一解七年之癢

唔經唔覺,用咗 facebook都有七年,自問唔算一個 heavy user,不過就 keep住 up-date。拜小兒所託,開咗一個美國 Apple ID,順理成章,上星期就 download咗 facebook Paper app。講到尾,其實「都係 facebook啫」,只不過個介面改晒,可以全單手操作(食飯搭車時用 facebook可以更加專心,隻右手可以扒飯同緊握扶手),啲相「飛嚟飛去」,可以自訂「 Sections」,而初初用嗰陣,有真人發聲教你點用!最正係少咗啲廣告 post(遲啲應該會有)。


劉定邦 

「新介面」係有啲陌生,不過用落又幾方便,啲相好大張,仲可以左右搖。 

當 1680遇見 6262

因為做緊 Rolex Daytona專題關係,要搵 hardcore錶迷睇靚錶。其實未做專題前,已經讀過唔少「天書」,但當見到錶迷嘅珍藏,都俾佢嚇咗一跳,因為有唔少古靈精怪嘅錶款,真係好難喺出面搵到。
不過,自己都係鍾情「最基本」嘅舊裝 Paul Newman,黑面、骰仔字、紅色 chapter ring嘅 6262,簡直係絕配,好靚,但睇吓價錢,盛惠一百萬……

Ads by Google

暫時都冇可能有咁多錢,唯有戴上手同自己隻 1680合照一張,得閒拎出嚟,睇咗當買咗。


林勇 

市值五萬蚊嘅 1680(左),同價值一百萬嘅 6262(右)「世紀合照」,一定要好好收藏,希望有生之年買得起啦。 

隔山買鞋

早幾年對 Jordan Melo M8出聖誕特別版嗰陣,已經好想擁有,趁住新年買新鞋,就搵個藉口上網 search一下;點知竟然喺日本網站搵到,仲要六折,加上日圓低水,計落有 so,價錢衝昏頭腦,即刻扑槌買。買完先後悔,事關等咗好耐都冇消息,網站又唔算出名, email查詢又淨係叫我等,愈等就愈驚。過咗三個禮拜,打定輸數蝕錢買教訓,又突然收到回覆話寄出咗對鞋;不過,收鞋嗰刻真係笑爆嘴,竟然寄咗對 LeBron 10嚟,雖然都係綠色,但係個款完全唔對辦,咁都可以搞錯,認真離譜!下次網購,都係幫襯番大型有信譽網店,老土都要講句:便宜莫貪!


潘健文 

用 tablet開番網站幅相對照一下,鞋款完全唔同,最明顯係橙色鞋帶同埋鞋舌,而家分別變咗紅色及黑色。 

text:科技組

全站熱搜

tvb4life 發表在 痞客邦 留言(0) 人氣()