小生命 大生命 陳茵媺

身為女性的,會否視陳茵為目標?先不談她的身材,○六年當選三料港姐冠軍,卸任後順理成章當上無綫親生女。當好些港姐冠軍都發展平平時,陳茵媺在○九年得過飛躍進步女藝員獎後,在《情越海岸線》和現正播映的《單戀雙城》中皆獲重用。

Ads by Google

最重要的當然是,與筍盤典範陳豪拍拖後異常地獲得觀眾受落,在一年內由陳小姐成為陳太太,再繼而升級為陳媽媽。別論客觀環境為何,我身為男性,已覺得她的生活很不賴。

她現在的生活由湊仔填滿,連筍盤豪也許要暫且擱在一邊。兒子Aiden Joshua是很大的存在,正如陳茵在生下他那一瞬間衝口而出的一句話:「How did that BIG thing come out of me? It's impossible ! 真係好大!點解會發生到o架?」

新的小生命來臨,讓陳茵媺剛開始了新生活。這是她的big life,一家三口的bigger life。

 

我是媽咪

兒子才出世一個多月,陳茵媺已急不及待露面為劇集宣傳。這天她拋個身出來由十二時直踩至晚上九時,在九小時內應付十個訪問,即使身體完全健康的人也會被這地獄日程嚇怕,遑論這位坐月中的靚媽。猶幸能在她未感到疲累時與她詳談,她的連番笑聲,讓人輕易感到這位新紮媽咪的喜悅,也貫徹她的竹升妹性格,所以訪問難免有一半時間以英語進行。

Ads by Google

「我生咗BB出嚟嗰一刻,我以為會好似啲電影咁樣喊晒,其實係好relieve,因為我痛咗六個幾鐘,雖然算快。噢,佢出咗嚟喇,好健康呀,所有嘢健康就OK。不過佢so big!How ? How did that happen ? 人人都喺度笑,醫生都估唔到我咁講!真係我第一反應!

「我仲坐緊月,如果今日唔係出嚟做訪問,我都匿喺屋企照顧BB。我今日出嚟幾個鐘,好多嘢要做定。BB需要我,我一定要喺佢身邊,如果唔係宣傳,我都未出過街呀!我覺得我身體未夠好、未康復晒,唔可以吹風,唔食得生冷嘢。」

 

拍《烈火雄心3》時扮大肚婆,五年後真正做了大肚婆。

大家都看到,陳茵媺的體態,好像不曾生過孩子。

「都係靠Aiden,哈哈哈哈!Workout Aiden,照顧Aiden就係做運動!喺屋企湊小朋友時真係冇時間理自己,佢要食嘢、瞓覺、沖涼,佢又醒瞓,每兩個半鐘就要餵佢。我同Aiden嘅連繫係每一日累積,愈嚟愈強,我好感覺到我係媽咪,你係我小朋友,好似推個波出去,有人彈番返嚟,有互動。」

生於現代香港,湊大小朋友是項艱巨任務,搶奶粉霸學位固然是當務之急,陳茵媺就明白,甚麼外在物質也不及父母以身作則,以免製造另一港孩。

「身教好重要,比專登整一樣嘢出嚟畀佢更重要,好似基金嗰啲。小朋友真係照抄你,譬如我有一個目標,好勤力好努力去追求,小朋友會見到媽咪爹哋try really hard。好似我冇乜天份,又唔係好聰明,我知道我一定要勤力演戲,我可以畀我個仔睇到,因為努力而去到以前達唔到嘅地方。

「我幾時都想做到一個正面嘅模範,(尤其是你係香港小姐冠軍嘛!)我唔記得咗呢樣嘢!哼哈哈哈!我淨係諗緊我依家係演員!我愛演戲!」

 

一年內完成結婚生仔兩個女性任務,不過兒子中文名還未確定,她也不急於拿出世紙。「唔使趕o架,可以補錢嘅!中文名仲諗緊, 有幾個選擇,但未confirm。」

競選港姐時曾被冠以「湯碗胸」。「係一種態度,唔係露啲嘢出嚟,由內心散發嘅感覺,隱隱若若有幻想咁。」相信陳豪十分同意。

提前幸福

陳茵媺向兒子送上所有愛,但同一時間來自陳豪的愛,她又不想被分薄。

「我初初想生仔多啲先嘅,有人成日都話我想做阿Mo心目中嘅唯一女性,嘻嘻嘻!生仔生女阿Mo冇乜所謂嘅,係我有少少偏好男仔。認真咁講真係冇乜所謂,就算係女會一樣咁開心,佢仍然係我小朋友。」

現在有個美滿家庭,陳茵媺再也不介意細訴她和陳豪這一年多以來的歷程。

「講真呀,佢喺超過一年前求咗婚,我哋亦冇真正話畀任何人知!哈哈哈!但我哋係為結婚進行緊,不嬲都計劃喺巴黎,亦應該喺一三年十二月結婚嘅,因為我太鍾意聖誕!巴黎聖誕真係好浪漫!咁後尾發現有咗BB,就提前晒去六月。我哋係搵咗人幫我哋做成件事,但都要再諗過,好似攝影師已經要再搵,枱布都要自己揀,好多嘢搞,不過好開心!婚紗都係着番我一早個選擇,冇轉到!

「本來Christmas係wedding day,依家係Aiden day,baby day ! Yeah !

「我哋plan咗婚禮先,但神總有special plan,我覺得結婚係要做嘅嘢嚟,時間係啱嘅,阿Mo都大我十年,我覺得都係有小朋友嘅完美時機!有時你想要,又未必會嚟o架嘛。BB係計劃之內,但唔係咁早嘅,本來應該係婚禮之後o架,嘻嘻嘻!

「好多謝大家嘅祝福,公開咗拍拖之後係舒服啲,其實我哋兩個都鍾意低調嘅,之後都想繼續保持低調咁生活。」

 

掌握平衡

計劃歸計劃,沒有人知道計劃了的,是否最好。大住肚拍的《單戀雙城》是她入行以來戲份最重的劇集,本來應該繼續起飛的事業,要讓路予人生大事。

「又唔係可惜嘅,好肯定結婚生仔係重要,timing都好重要,我覺得喺兩個人最相愛時結婚係一件好幸福嘅事,好過等咗十年先結,大家都習慣咗大家啦!你以為條路應該咁行咩?偏偏life throws you a curveball,幾時都要做足準備,跌低咗要企番起身。你唔知會發生乜事,但你以天上星星做目標,中間有轉變,希望起碼去到天空都幾好啦,哈哈哈!

「當你遇上適合嘅人,呢啲真係冇得plan。好似劇中羅式適咁,佢冇得plan遇到陸恭梓(陳展鵬飾),仲要鍾意呢個咁唔認真嘅人!」

 

身為港姐冠軍兼演員兼老婆兼媽咪,陳茵媺慨歎做人責任多籮籮,然而我相信,陳豪會繼續把添丁責任置於她肩上。

「我覺得睇個天點安排囉,事業、家庭,兩樣一定要一齊進行,演戲上我希望更上一層樓,畀觀眾睇到我進步緊,我要學識點樣去balance,唔想淨係所有焦點放晒喺工作而放棄私人生活,但我又唔想唔做嘢。向自己嘅交代就係自己向目標發展,向私人生活交代就係做媽咪、好好嘅太太,我希望我有好成功嘅家庭、愛情關係、事業,希望我做得到,我唔會放棄其中任何一樣嘢去得到另一樣嘢!更大嘅責任係嘗試平衡所有嘢,確保對我生命有好處!That doesn't make sense? I don't know ! 哈哈哈哈哈……」

生命何時取得balance,是活到老,也是未必能參透道理的課題。正如,大家也最好不要怪責本專訪只側重談Aiden與陳豪,不太balance。

與陳茵媺同屆的三甲人馬皆已為人妻,亞軍兼最上鏡小姐周家蔚,更一馬當先做媽咪,呂慧儀則尚未有計劃。

「我未試過拍一套劇同時有三個男仔(楊明、洪永城、陳展鵬)追嘅,現實生活就唔講啦,哈哈哈哈!」

在《法證先鋒III》中的性感cap圖已成為高登經典。「好多謝大家啦!演戲係唔可以驚,睇劇情需要。」

    全站熱搜

    tvb4life 發表在 痞客邦 留言(0) 人氣()