沙嗲牛肉蟹王麵$23 

尋澄味

失傳蟹王麵再現 永順食店 地址:元朗安寧路 2號冠煌樓地下 電話: 2474 7074

平安夜連走幾場的聖誕舞會,焗住要去的畀面派對,地點不是酒店 ballroom就是私人會所。這類衣香鬢影盛會,必定出現大批達官貴人,還有逢請必到的幾個「外表斯文、內裏 open」的賣剩 Lady;更當然少不了被冷風吹到乾硬化的西洋火腿,還有大堆有造型,不過冇溫度兼難啃的鹹甜小食。

 

為免空肚容易飲醉酒,所以每次出發之前,我都會提前「打定底」食飽才出現。
相約「飲遍港九、食盡全球」的元朗鄉紳一齊出發,知道我熱愛本土茶記文化的他,約我到元朗大榮華後面的小食店嘆熱奶茶。
三十年歷史的永順,香濃醇厚的咖啡奶茶遠近馳名,是新界區食早餐的熱門 checkpoint。祖籍潮州普寧的偉仔謹遵老父教誨,每日從天光到黃昏,在半開放式的廚房密密耕耘,加上樓面一班士氣高昂的靚姐,風雨不改為街坊提供溫暖和營養。
必叫的招牌炸豬扒肥大肉厚,每一件都由偉仔的媽咪親自悉心處理。即叫即炸的現場實況香噴噴,肉香四射的盛況,連重感冒的人都聞得到,絕對是靚女們特赦自己食「熱氣嘢」的好時機。與炸豬扒同樣熱賣的生炸雞翼,皮脆肉滑的程度,更勝富豪酒家的炸子雞級數。難怪記性一流的幾位靚姐,就算全日不停捧住豬扒和雞翼出入穿梭,排隊等位的人卻愈來愈多。
除了即拆袋即煮的出前一丁,永順還賣我以為失傳了的蟹王麵。日本直送的蟹王麵,煮熟之後,麵條比出前一丁更香軟綿滑;原裝的海鮮味噌湯底,伴沙嗲牛肉最夾。香濃的沙嗲牛肉勁多汁,好味源於即叫即炒,鬆軟牛肉經過秒速油爆之後,再用來自汕頭的粗粒沙茶醬加蒜茸快手爆炒,開胃滋味的程度,力逼潮州酒樓的沙茶牛河質素。女士最愛用來伴米粉的雪菜,經過悉心的「洗、切、浸、醃」炮製,配爆炒過的豬肉絲,惹味程度更勝大牌檔的小炒皇。紅腸、魚片和火腿,全部都是大家由細食到大的基本食材,估不到切條之後經過快手爆炒,啖啖彈牙有咬口,撈米粉食一流。



雪菜肉絲米粉$16 

炒紅腸魚片火腿$12

炸雞翼$16 

炸豬扒$16 

 

永順食店
地址:元朗安寧路 2號冠煌樓地下
電話: 2474 7074

 

少年食神 林澄光( Michael)
致力用金錢換無限快樂。 TVB、 Now TV飲食及旅遊節目主持人


撰文:林澄光
攝影:李日進

Ads by Google

    全站熱搜

    tvb4life 發表在 痞客邦 留言(0) 人氣()