Brian對踩板熱愛非常,作為組合廿四味成員之一,拍照時,他正示範動作「 Manual」,並擺出搞笑表情,寓工作於娛樂。 

創業通

踩板就 OK!室內滑板場

一提到組合廿四味,大家總會記起當年的一首《 Respect就 OK》吧?廿四味成員之一的 Brian,不單身為 rapper,更是一名踩板狂迷!從小到大,他都離不開滑板,他於 99年成立品牌 85ive2,引入並代理美國滑板品牌 Alphanumeric,並於 11年與滑板品牌 Vans合作,成立 Vans SK85ive之餘,更開設全港第一間室內滑板場,希望可以在香港推動踩板文化,做到有板踩就 ok!

 

採訪當日,正值滑板品牌 Vans在室內滑板場開派對,聚集了約 30名板友,不少客人更熱情地跟 Brian打招呼,場面十分熱鬧!
室內滑板場分為商店區及滑板練習區,商店區約佔 1,000平方呎,售賣各滑板品牌的貨品;滑板練習區則約佔 3,000平方呎,場內更設有不少障礙物、梯級及斜道,可讓各板仔練習做出各種花式,現時收費$80可玩 2小時。「全港暫時仲未有其他室內滑板場,我希望室內嘅設計好似喺室外一樣,即使落雨嘅日子都可以嚟練習。」
今年 39歲的印尼華僑 Brian,自 88年起開始在香港踩板,至今踩板已 25年,「我好鍾意運動,踢波、打籃球、游水都有玩。當時啱啱由印尼嚟香港冇耐,喺國際學校讀書,有次運動日有人介紹踩板活動,我一試就上咗癮!覺得踩板好有挑戰性,行街見到樓梯、斜路、欄杆等,我淨係諗點樣可以用滑板跨過去或者做花式。」


室內滑板場佔地 3,000呎,設有障礙物、梯級及斜道,猶如街場一樣。 

板仔 Jordan正利用場內的斜坡,示範動作 Wall Ride。 

同是滑板愛好者的 Jeff,一躍而上,在台上示範動作 Manual。

成立品牌

Brian滿腦子離不開滑板,成立品牌 85ive2前曾做過幾份工作,做過餐廳及印尼外傭經紀,「做經紀好辛苦,因為唔係咁多人識印尼話,大小事務都要我周圍去翻譯,我冇晒時間去踩板,所以最後冇做。我轉咗去牛津出版社做 marketing,多咗空閒時間,就想試吓自己創業,想有自己嘅滑板鋪,所以我喺 99年成立品牌 85ive2。」
當時 Brian經常流連灣仔的移民局大樓外的空地,與其他板仔交流,「一次偶然機會,美國著名滑板品牌 Alphanumeric嘅負責人 Aly嚟香港工幹,我喺板場識到佢,我見呢個品牌仲未喺香港興起,就問佢哋可唔可以畀我做香港嘅獨家代理!」
因志趣相投,加上 Brian做事認真且要求高, Alphanumeric答應 Brian成為香港的品牌代理。「我用一直儲落嘅 22萬嚟入貨,以滑板衫及褲為主,用 600呎嘅屋企做鋪,靠人傳人介紹, 10日就清晒啲貨,賺咗 20萬!」


小明客人 29歲踩板年資: 10年踩咗板都有 10年,覺得呢度好舒服,有冷氣又係室內,完全唔使擔心天氣問題,我𠵱家每星期都會嚟兩次,我仲會買吓滑板、衫同帽。 

Nikola客人 16歲踩板年資: 5年我喺紐約搬嚟香港,朋友介紹我嚟玩滑板。我夏天會嚟多啲,一個星期嚟 2、 3次,尤其是落雨時,呢度完全冇影響,好方便! 

俊仔 rider 26歲踩板年資: 13年我係被贊助嘅其中一個 rider,𠵱家係全職滑板運動員,最近贏咗亞洲極限運動錦標賽金牌。我每逢星期一、三、五都嚟練習,仲參加過 Nike、 Vans等嘅比賽及巡迴賽。

成為代理

00年, Brian成功批貨予本地 12間公司,其後被 Alphanumeric總公司委任為亞洲營銷總監,更邀請他設計一系列的帽及袋等。然而 Brian以開設自己的滑板鋪為目標,所以做了年多便請辭。
01年,對 Brian來說是一個新開始,他於旺區銅鑼灣開設了 85ive2專門店,售賣滑板用品、衫及褲為主,「開店頭幾年,面對好多困難,因為撞正 911同 SARS,間鋪真係試過成日一個人都冇!但幸運嘅係我做落嘅口碑都唔差,好多鍾意滑板嘅朋友都唔理 SARS,會嚟搵我買嘢,之後間鋪都營運得幾順利。」
11年,喜歡創新的 Brian一直想擁有一個室內滑板場,將夢想化成事實。「可以 24小時踩板,我相信係每一個板仔嘅夢想,而且唔使怕落雨,夏天又唔怕熱,當時香港仲未有,所以我決定開一個室內滑板場! 04年起開始入滑板品牌 Vans嘅產品, Vans嘅負責人知我想開滑板場,我覺得大家嘅理念一致, Vans又可以多一個宣傳途徑,就合組成為 Vans SK85ive2及開室內滑板場。」


店中有售各不同顏色及花紋的滑板, Brian對每塊滑板的特性都十分熟悉。 

這為店鋪部分,售賣各品牌的滑板、波鞋、衫褲及各種滑板配件。 

翻新地磚


室內滑板場地亦會用來舉行大型活動,圖為團體 FOB(Fresh Off The Boat) x Sessions HK在滑板場舉辦的 Secret Warehouse Party,場面熱鬧! 

Brian參考了很多美國滑板場的設計,並加以改良,「地磚本來用番石屎地,但好易爛,用咗 1年已經損耗得好快!我想整到好似灣仔移民局大樓出面嘅地[!FEE7]一樣咁好踩,我專登要喺內地嘅地磚公司訂返嚟。 12年,我哋翻新所有地[!FEE7],足足整咗 3個月!」
Brian與 Vans合作開辦的室內滑板場位於觀塘,一邊為店鋪,一邊為滑板場,「本來想離銅鑼灣店近啲,有考慮過鰂魚涌、柴灣等地區嘅工廈,但租金貴之餘,樓底又唔夠高;但觀塘嘅工廈樓底高及租金平啲,最後決定租呢度。」
雖然滑板場離地鐵站的路程約 15分鐘,但因宣傳效應,不少人慕名而來,「我哋主要靠網站、 facebook宣傳,仲有電視台、雜誌報道過,其實最重要係人傳人嘅口碑。」

夏天旺季

現時室內滑板場的客人以 12至 25歲為主,連外籍客都有,逢星期六及日客人最多。另這裏更設有一對一的私人班,收費$350兩小時,「好多家長專程帶小朋友嚟上堂。我哋亦有淡旺季,夏天會多人啲,因為天氣熱及成日落雨,會多啲人嚟室內場玩。」
此外, Brian亦藉着舉辦一些活動來提高學員的技術水平,「我哋贊助咗 7個 rider,佢哋都係有資質嘅年輕人,我哋會隨時提供場地及滑板畀佢哋用,仲會舉辦一啲公開活動,好似 Game of Skate,類似 battle嘅形式,等大家技術交流,提高大家嘅水準,希望可以推動香港嘅滑板文化!」


豹紋滑板,售$1,300。 

人物造型滑板,售$1,500。 

Vans的 Syndicate系列,墨綠色限量版波鞋,售$990。 

這是 Vans跟滑板品牌 Alien workshop的 crossover限量版波鞋,鞋上有外星人的公仔,售$690。 

開業成本

租金(3按+1上):$172,800
裝修:$800,000
入貨:$150,000
總投資:$1,122,800

每月收支

租金:$43200
人工:$65,000(3名員工+ 1老闆)
入貨及雜貨:$50,000
營業額:$220,000
盈利:$61,800


撰文:霍芷晴 
攝影:傅新發、彭自維
部分圖片由被訪者提供

Ads by Google

    全站熱搜

    tvb4life 發表在 痞客邦 留言(0) 人氣()