每次求婚前, Ann會親自到場地視察,並會測試道具,只希望求婚儀式萬無一失。 

Jobs Live

浪漫求婚 proposal planner(求婚策劃人)

不少女士都希望有個浪漫求婚故事,令不少男士為此費煞思量,而 Ann身為 proposal planner(求婚策劃人),專為一些有橋冇時間、甚至冇橋兼不浪漫的客人提供求婚情節,但不要以為這份工得把口就 ok, Ann在準備的細節上很多事都會親力親為,她愛上這份工作,除了是想滿足自己喜愛浪漫的性格外,更藉此為一對對有情人送上祝福。

 

在一個低於攝氏 10度的晚上,身為求婚策劃人的 Ann在沙灘上用 LED燈砌出心形圖案,「今次個客人想喺沙灘上求婚,希望到時女朋友企喺『 I LOVE U』同心形圖案上面,咁我過嚟視察環境先,睇吓咩位置會比較好,同埋測試道具出嚟嘅效果啱唔啱個客嘅要求。」
要成功辦好求婚儀式,並不是想好橋段就可以,「首先會用 email或者電話同客人溝通,要了解客人嘅愛情故事,睇番佢哋嘅要求再畀建議,我唔係咩要求都做到,好似想坐直升機降落到鋪滿花嘅地方求婚就做唔到。之後我會就客人揀選嘅場地、用到咩道具,去實地視察條求婚橋可唔可行;如果客人咩都未揀,我仲會幫佢揀戒指、訂花及餐廳等,一個求婚儀式係由好多細節位組合而成。」


Ann及其丈夫去到求婚場地,整理預先購買的道具。 

道具測試後,拍下效果讓客人作參考及自己作紀錄。 

求婚戒指在求婚環節中可算重要一環, Ann會應客人要求,先去相熟的 M2 Diamond珠寶店挑選適合客人求婚的戒指,再與客人一同選購。

Ann亦會為客人到花店挑選合適的花束。 

求婚當天的完成圖,因客人不願上鏡,但亦可見沙灘出現猶如拍電影般的浪漫布置。 

客人要諗對白

雖然看似整個求婚儀式都由 Ann一手包辦,但有樣東西一定要由客人去做,「求婚對白一定要客人自己諗,我覺得要講出真摰動人嘅話語,一定係出自真摰動人嘅感情基礎。我建議佢哋用過去、現在及將來 3個重點去諗,知道大概講咩就得,到時講到背書咁會好生硬,都感動唔到人。」
29歲的 Ann是廣告業出身,現時正職是廣告公司老闆,在 10年開始成為兼職求婚策劃師,「有次喺網上見到有個肥仔請樂隊 Rednoon幫手求婚嘅片段,個回響好大,咁自己又鍾意浪漫,好想搞啲難忘嘅求婚情節,不如試吓做求婚策劃,睇吓個市場係點。」要找 Ann幫手基本收費是$6,000,包策劃、影相、拍片及後期製作,如有特別需要,另加購買道具的費用。

感動不需鋪張


Ming Lee客人想喺遊艇上求婚,自己冇時間去搞,又唔知點搞好,於是上網搵到 Ann幫手, Ann畀到嘅建議都好啱我,最後成功求婚。 

已幫近百位男士成功求婚的 Ann,認為求婚要感動未必需要鋪張,「𠵱家好流行喺戲院求婚,播片之餘仲有個獨立空間,約$4,000就 book到。」 Ann表示有不少難忘經驗,「試過喺尖沙咀海傍搵咗位影夜景嘅攝影師幫手,我預先掛咗男方用動作做出 Marry Me嘅相喺攤位,當客人同女朋友行過時,檔主就叫佢哋過嚟幫襯,女朋友行到埋去見到啲相都呆咗呆,男仔未講嘢,女仔已經喊晒,呢個畫面係簡單但好窩心。」
Ann希望自己的工作可以為客人帶來祝福,「搵得我哋嘅客人,全部都係男士,而且都好肯定對方會嫁畀佢,佢哋只係想畀另一半一個美好嘅記憶,自己唔知門路,先搵我哋幫手,到目前為止可以話 100%求婚成功。我希望佢哋將來遇到有咩矛盾及爭吵都好,可以睇番求婚時嘅相及片段,記番起當初嗰份愛。」

 

查詢: http://www.proposal-planner.net 


撰文:曾志恒 
攝影:彭自維 
部分圖片由被訪者提供

Ads by Google

    全站熱搜

    tvb4life 發表在 痞客邦 留言(0) 人氣()