Sommer 19歲城市大學工商管理系副學士 Yr.1 

U撈

U界 大娛樂家 搞 party 或 搞 event

臨近年尾喜慶節日特別多,不少院校的學會都會舉辦校內 party好讓同學們試後鬆一鬆。於城市大學就讀工商管理系副學士 Yr.1的 Sommer,懂得在節日中尋找商機,上星期她在聖誕前夕於蘭桂坊大搞聯校 party,結果反應非常熱烈,果然有潛質做大娛樂家喎!

 

「聖誕快樂!有買飛嘅麻煩出示身份證,然後去後面上 2樓入場,希望你哋玩得開心啲!」訪問當日 Sommer在蘭桂坊的一所 club house舉辦聖誕 party,當時她正在安排客人入場,「呢個 party係由我同另一位同學一齊搞,今晚入場人數比預期多,約有 4、 5百人,我成晚都要安排客人分流入場,另一位拍檔就負責場內大小事務。」
Sommer是蘭桂坊的常客,眼見近年愈來愈多人落 club玩,今年 11月她決定小試牛刀自已搞 party,「我身邊好多同學閒時都會落酒吧及夜場玩㗎,見聖誕及除夕就到,覺得 party有得搞,所以同另一位同學夾份喺聖誕前夕及除夕晚搞大專聯校 party,希望賺錢之餘,亦試吓創業嘅滋味。」

出現磨擦


.Sommer當晚會為入場人士的手背蓋印以作入場識別。 

初次舉辦大型活動,同伴之間難免會出現磨擦, Sommer也不例外,「我同拍檔喺入場費上曾經出現分歧,我哋個 party係打學生市場,收費會比市價平 2至 3成,原先計劃預售門票男仔收$250,過咗預售期就要收$350,女仔就收$100,但拍檔話想男仔收費再平多$50至$80,吸引多啲人嚟,但我企硬唔減,怕個場容納唔到咁多人,到時反而賺少咗,我哋為呢件事嘈過好多次,最終拍檔都肯讓步。見到今晚咁多人,證明最終嘅決定係冇錯。」
由設計 poster、宣傳以至租場, Sommer要全程一腳踢,在人手不足的情況下,在活動開始前的 1個星期,才發現宣傳用的海報有錯漏,「我哋發現 poster底部多咗一個冇意思嘅字,估計係我整 poster時,唔小心打多咗冇 delete到,結果我要改番正之餘,仲要即時搵朋友幫手撕番晒已張貼嘅 poster落嚟,好彩我哋發現得早,冇乜人知。」

要靠關係


當晚門口人潮洶湧, Sommer主力負責控制入場的客人,當時她正在派發門票給已預售的客人。 

扣除所有成本,單計是次 party已為 Sommer帶來$20,000的收入,成績非常理想,她未來打算舉辦 party以外的活動,畢業後做一名大娛樂家,「搞活動最緊要係靠人脈,好似呢次咁,我都係靠 friend搭 friend嘅方式嚟宣傳,最後成效比靠用宣傳單張及 facebook強,我打算在學期間搞多啲活動,建立更廣闊嘅人際網絡,畢業後繼續喺呢行發展。嚟緊我打算同𠵱家流行嘅密室逃脫公司合作,舉辦類似韓國《 Running Man》嘅活動畀人參加,不過仍然係構思階段,估計下年年頭先會着手傾。」

想學搞 event?

想學搞 party或 event可以先由低做起,了解其運作,而且工作過程中能擴闊人際網絡,日後搞 event自然會事半功倍。現時 Manpower每年都會為各大小型的 event找 helper,當中包括 Global sourses展覽會、珠寶展及 Art Fair等。 Helper時薪約$40起,每次工作約由 4小時到 10小時不等。有興趣入行,可瀏覽 http://jobs.manpower.com.hk/user/about.cfm 


撰文:何倬然
攝影:彭自維

Ads by Google

    全站熱搜

    tvb4life 發表在 痞客邦 留言(0) 人氣()