Webber

Jade& Minnie蒙眼化妝超 Crazy!

女生化妝除咗貪靚,喺現今社會更成基本禮儀,唔化妝點見得人?今期 Webber主角 Jade同 Minnie兩位好友卻一反「女為悅己者容」嘅傳統,响網絡拍化妝片以自 high瘋癲兼冇底線見稱。今次癲到接受記者挑機玩「蒙眼化妝」,未開始前先以包剪揼決定邊個俾人化,點知明明輸咗嘅阿 Jade出術反勝,焗住 Minnie做犧牲品,難怪 Minnie事後係咁鬧阿 Jade係 cheater!經常以為女人嘅友情要建立响互 like之上,其實你寸我、我窒你,咁樣嘅友情先容易 keep一世。 Minnie,妳要好好記住今期阿 Jade點出茅招羸妳,食住花生等睇妳下次報仇!

profile

AmourBeauty JM
成員: Jade、 Minnie
YouTube名稱: AmourBeauty JM
拍片資歷:約 1年
訂閱人數:超過 2萬 7千
觀看次數:超過 120萬

爆笑自 high實錄

拍攝時為咗收音正常,記者、攝記同攝影助手等都要忍住笑,除咗化緊妝之外,最尾 Minnie欣賞阿 Jade「傑作」都好爆笑㗎!





Q1  Minnie妳喪鬧 Jade出術,係咪真嬲呀?你哋平時鬧交又點解決?

Minnie:化到咁,你話嬲唔嬲先!( Jade:其實都幾靚呀!哈哈!)鬧交一定有,不過我哋都會互相遷就,但唔係因為我哋特別好脾氣,只係唔知點解,對住對方就易話為啲,即使乜嘢事都好易解決;而且我哋關係又係好 close,點會真係計較!

Q2 通常化妝 Webber都係一個人做,點解你哋會選擇兩個人做呢?


Jade同 Minnie兩個人無論外形、樣貌同感覺都完全唔同,但仍然超 friend,去到邊都形影不離,化妝可能都係大家感情咁好嘅原因之一。 

Jade:因為我哋本身已經好 friend、亦好鍾意買嘢同埋試新產品,就諗何不分享吓我哋將買過嘅嘢畀大家睇呢?拍片又可多個藉口經常一齊研究美容嘅嘢,所以就係咁開始咗!其實初初 post上網嗰陣都只係 have fun,直到𠵱家都覺得幾好玩!

Q3 咁會唔會其中一個 fans會多啲?妳哋本身又係點識?


佢哋咁多片之中最搞笑肯定係呢條《吸引異性索爆自然約會妝容教學》,睇完就知「蒙眼化妝」對佢哋嚟講只係小兒科!好心妳哋唔好咁癡線啦,笑死人咩! 

Minnie:你問呢啲問題,叫我哋點答呀!我諗啲網絡朋友會睇我哋,都係支持緊我哋呢一個組合,所以邊有話邊個支持者多啲呢?我哋兩個本身係同學,所以係讀書認識, Jade仲有做 part time model,但因為佢唔識 edit啲片,後期都係我做,但拍嘅地方就多數喺 Jade屋企。

Q4 除咗今次幫《 FACE》拍嘅「蒙眼化妝」咁 crazy之外,仲有冇乜嘢想試?

Jade:其實我哋都係想透過兩個完全唔同嘅人,再用搞笑、輕鬆嘅方式,話畀大家知世界上真係冇醜嘅女人,只有懶嘅女人,而且化妝本身都應該係好開心嘅事!可能會試吓唔對住塊鏡化妝,睇吓完全憑空想像會點,仲要限時兩三分鐘內化完,哈哈。

 

〈 Webber〉,每星期專訪一位網絡紅人,每星期展示一種網絡力量。


撰文:熊俊彥
攝影:傅新發

Ads by Google

    全站熱搜

    tvb4life 發表在 痞客邦 留言(0) 人氣()