Geek友講場

手機築起電視台 魔童手機開台拆局

或者大家忙於看黃子華,或者香港人善於忘記,不過王維基依然喺專欄以「這裏就是天堂」為題回顧過去一年,寫道香港仍然是一個「可以不放棄的地方」。
冇錯,港視 HKTV冇放棄到,明年將會以流動電視同 Over-The-Top形式開台。美棋 BB同艾威等港視藝人都話感動流涕,同將軍澳港視地皮一齊重新動工等開台,之但係,屋企阿媽對成件事仍然唔係好理解,聽到頭都大埋,早排先話不獲發牌,𠵱家又無限復活,究竟未來我哋點先睇到 HKTV?手機免費電視同一般電視有乜唔同?
冇無限 plan可唔可以追《警界線》?等美棋 BB同威威為我哋拆解拆解!

艾威:喊出嚟

記者會時喺電台做緊嘢,揸車返屋企時突然感觸到熱淚盈眶,由申請電視牌照失敗到今次再話開台,真係經過兩次人生轉捩點,好似死過翻生咁,更堅定我哋做好節目嘅決心。如果畀我度 HKTV節目,我想做飲食節目,方便大家出街睇即時就去搵嚟食。

美棋 BB:緊要過結婚

我係俾朋友嘅 WhatsApp轟炸,話要恭喜我先知,仲誇張過結婚,睇得出幾多香港人想我哋成功,我都好慶幸可以參與其中。我就想做美容節目,等觀眾喺街度睇到邊隻化妝品減價都可以即刻飛去買。

HKTV三大解謎:

維基出招收購中移動附屬嘅 CMHKCL,取得其綜合傳送者牌照,推流動電視開台新方案。公司政策固然保密,威威同美棋都係睇新聞先知,兩人都對新開台方案有疑問,綜合佢哋意見同提問,以下係三大 HKTV開台之謎:

 


南韓係全球流動電視最成功嘅國家,唔少手機都內置 DMB制式接收器,圖為韓版 LG G Flex,所以未來港版手機唔使加接收器睇到電視,並非冇可能。 

1.冇無限上網 plan點煲 HKTV呀?
唔怕!流動電視唔係靠手機嘅流動數據播放節目,使用時需要配合專用接收器,直接接收大氣電波數碼頻道,所以就算部手機冇無限上網 plan都唔怕追劇追到超過用量限速。
而據王維基所講, HKTV收購 CMHKCL後能用到 678至 686MHz嘅大氣電波數碼頻道,全港覆蓋率達 95%,相信接收唔到嘅機會不大,不過大氣電波缺點在於頻譜不足,所以 HKTV由原本打算開 60條頻道,縮減至 3至 5個頻道直播節目。

 


可以手機上網睇,未來亦可能有內置接收器手機,睇 HKTV唔一定要用王維基手上呢種接收器。 

2.睇 HKTV係咪一定要用魔童接收器?
維基以插咗接收器嘅 iPad示範,搞到大家都以為接收器係必需品,其實韓國已經有唔少手機係內置呢種 DMB接收器,只要廣播成事,廠方必定會引進新手機應市。
另外, HKTV係用流動電視同互聯網平台 Over-The-Top雙線直播,就算去到收唔到大氣電波嘅位置,仍可轉用手機 app數據上網睇。

 


On-Demand服務畀你想睇邊集《警界線》就揀邊集睇。 

3.睇 HKTV收唔收費?
除咗購買接收器個成本,觀看 HKTV直播節目係免費嘅。
而直播以外, HKTV仲有 Video-On-Demand點播服務,揀節目嚟睇,而 On-Demand服務會以收費會員方式提供,暫時未有收費詳情。

教你做足準備睇 HKTV

HKTV預計 2014年 7月 1日正式開台啟播,唔少人見到魔童拎住個接收器示範,已經心急到即刻落鴨記搵貨買,殊不知魔童當日手拎嘅其實只係同類商品,唔代表 HKTV正式出街時用邊類接收器,廣播制式未有定案,亂買就出事㗎嘛!就等美棋 BB同威威同大家一齊做功課,為睇香港電視做足準備。

 

睇 HKTV三大方法示意圖

1.  HKTV除提供即時直播 channel,仲可以裝 app點播形式收睇自選節目,暫時預計需要付費。

2. 用智能手機、平板電腦、個人電腦、智能電視等能夠上網嘅裝置,用瀏覽器觀看直播節目,節目供應方面係費用全免,當然用家要自付互聯網連線及流動裝置數據費。

3. 使用接收器,以大氣電波觀看直播節目,毋須連上網及花費流動數據,接收器適用於手機智能手機、平板電腦、個人電腦、電視、顯示屏、汽車流動電視等不同裝置,售價約為$100至$800。

聽講魔童台冇高清喎!

魔童在記招展示嘅係 CMMB制式接收器,中移動香港未被收購前推出嘅 UTV就係用呢種制式,因解像度只得 240× 320仲衰過 VCD,結果乏人問津,深水埗高登、鴨記等電訊鋪都冇入貨。根據 HKTV公關解釋,其實當日只係象徵式示範,正式廣播制式仍然未定,而 HKTV收購嘅頻譜有能力支援 DVB-H呢種支援高清甚至 4K影像嘅廣播制式,所以當日有人因為個接收器而插 HKTV冇高清節目,完全信唔過。


HKTV投資咗好多高端拍攝器材,唔用高清一定浪費,王生冇理由咁嘥料,但要改制式就連訊號發射站都要大改,又係大投資嚟。 

艾威原本想快人一步買個接收器玩吓,但其實維基當日手拿嗰個 Tivizen品牌接收器係大陸用嘅,用嚟接收 CMMB廣播制式。 

各路觀眾感言:

1.著名 Youtuber Bomba 撐保育新血
網上拍片紅人 Bomba就覺得 HKTV能培養新血人才。「用電話、平板睇節目都已經係大勢所趨,好似我哋連師奶、叔叔 fans都有。要加接收器先睇到會有影響?科技嘅嘢發展得好快,遲啲唔使用接收器就睇到都唔出奇。希望王先生未來可以繼續培育多啲幕前藝人,好似美棋 BB咁,香港幕後人才好多,但好缺乏年青嘅男女藝人演員面孔。」

 

2.IT產業老闆 Keith Li 維基志在入屋
寫 app起家嘅 Innopage CEO Keith就覺得 HKTV志不在流動。「我認為王生投呢個牌,最大目標並不單只想人人拎手機睇電視,因為睇番全世界流動電視表現,就算南韓都唔算好賺錢。魔童呢招有啲似佢當年搞回撥 IDD,用一個聰明嘅方法扭橋跳過不獲發牌困局而達到目的,任何人買個幾百蚊接收器插落電視就睇到,唔使租解碼器、唔使畀錢上網,變相入屋,師奶客同廣告客戶至 buy。」

 

3.家庭主婦英姐 一定要簡單
已經退休嘅英姐平時其實喺屋企冇嘢做先迫住睇電視,佢話一定要易裝先睇。「近年我睇電視都係追大陸劇多過三線劇集,真係睇到悶,多個選擇緊係好,但我用手機都係玩吓 WhatsApp,上網睇劇都唔識,如果真係簡單一開電視用遙控就揀到台我先會支持㗎。」


撰文:司徒港燊
攝影:傅新發
化妝、造型: Waii Chan@M. MakeupWorkshop

Ads by Google

    全站熱搜

    tvb4life 發表在 痞客邦 留言(0) 人氣()