小報告

2013好多 like

2013年完結,回顧全年娛圈大事,排頭位一定係同狼英政府鬥智鬥力、號召到 10萬市民圍政總的香港電視(HKTV)創辦人王維基,雖然不獲發牌,仍然諗到橋以流動電視服務復活;另外,憑《狂舞派》由理工跳到台灣金馬獎的顏卓靈、長期佔據高登女神榜第一位的謝安琪,亦係今年娛圈 icon……
如果全民公投今年最 hit甘草男,唔使問肯定係「講呢啲」嘅劉江叔!今期就同大家講呢啲,大風雲小回顧。

 

要數 2013年風雲人物,相信唔會有人反對係王維基。投放過 5億搞香港電視,重金從 TVB挖角張可頤、蒙嘉慧等藝員,最近連視帝黃子華同 Chilam都話對港視非常有興趣!來勢洶洶的魔童又買埋地起電視城,一心打算製作免費高質電視節目畀觀眾多個選擇,點知政府寧願發牌畀有線奇妙電視同 now,都唔肯發畀港視,激到 10萬香港人圍政總!

「特首先係風雲人物」


講呢啲! 

當個個以為魔童一鋪清袋,點知佢竟然轉個頭公布新計劃—— OVER THE TOP,下年 7• 1開啟流動電視服務狙擊 TVB。回顧 2013年似足坐過山車,見慣風浪的王維基都認為今年確實好難捱,「今年係我人生中最多波折嘅一年,但亦係對我嚟講一個好好嘅磨練,估唔到我 51歲都要經歷呢啲咁嘅事,我諗上天真係對我好眷顧囉!我會形容發牌事件係柳暗花明又一村,對大部分香港人嚟講應該係件開心事,你開唔開心先?」
見招拆招明剃政府眼眉,魔童拍心口保證會搞好港視,除了不斷同一線藝人傾合作,又會掟多 3千萬提升頻道畫質至高清質素,「明年一定要好艱辛努力咁工作,因為觀眾對我哋嘅期望肯定係非常之高,佢哋實會拎塊放大鏡顯微鏡望住我哋嘅節目,一啲都唔可以馬虎!我出年最大願望,係希望香港嘅創意工業可以好似以前一樣,為香港帶來驕傲!」公司有轉機,安樂晒的王維基仍不忘寸爆 689,「大家話我係今年風雲人物,其實特首梁振英先生至係,因為香港所有嘢都係佢搞出嚟!」係喎!

發牌風波

政府於 10月 15日公布免費電視牌照,最令人期待的香港電視竟然落選,反而未開劇冇撬藝人過檔的奇妙電視同 now TV獲發牌,港視更因被迫裁 320名員工。 5日後,超過 10萬市民遊行去政總,又連續 7日在政總集會,其間港視員工自發演出港版《半澤直樹》,又搵到劉華拍片撐。可惜政府死不悔改,真係選劉華做特首好過!


日劇《半澤直樹》大熱,港視藝人喺集會期間都即席表演「港版半澤」,仲令人對呢班綠葉王興趣大增。 

當日政府公布 HKTV不獲發牌,港視旗下一班藝員都有去集會支持。 

王維基上週一( 23日)同員工開聖誕 party,更拎 10萬出嚟抽獎!呢啲老闆正呀!

電視  May姐、阿叻鬥負評

唔使問, 2013最多 like電視人非「 Cool魔」張智霖同「教主」黃子華莫屬,但要數最多負評就一定係「雞汁 May」同阿叻!「雞汁 May」做《 May姐有請》乜都哈哈哈,又狂落雞汁勁煩膠;阿叻就衰在太囂太寸,話台慶收視得 2點就跪返屋企,辣㷫網友搞「萬千熄機」杯葛台慶!



《蘋果日報》圖片 

電視 鄭俊弘《星夢》上位

TVB製作通常彈多過讚,不過《星夢傳奇》就例外,同時造就奀星鄭俊弘火速上位,由劇集二打六變歌手,有得唱主題曲、主持旅遊節目外更有機會出碟。難得有個真正唱得之人,真係要捧得紅先好呀!

《狂舞派》神話挑戰金馬 顏卓靈:我驚會泡沫爆破!

剛過 20歲生日的顏卓靈,肯定係 2013年最幸運女藝人。由《大追捕》做任達華個女得少少戲分,到今年中在《狂舞派》擔正做女一,而且套戲竟然爆紅,刀仔鋸大樹,埋單大收 1,450萬,紅到帶挈顏卓靈入圍第 50屆台灣金馬獎影后提名,越級挑戰章子怡同舒淇等重量級女星。
「今年經歷嘅嘢話我知凡事係冇絕對!《狂舞派》 casting咗好耐都冇聲氣,以為都係要 cast好多年先會有重戲啲角色,估唔到最後搵番我;到拍完我又擔心套戲唔會上,或者只係得跳舞界嘅人會留意,冇諗到咁多觀眾會鍾意!」

「唔想因為 hit而搵我」

失落金馬,但點都算係提名過「最佳女主角」,升呢後點都會心雄揀戲拍啩?「有時拍小製作或者港台劇都好 enjoy,冇話紅咗就一定要拍好勁嘅製作,我唔想人哋因為我呢期 hit就搵我,我覺得咁樣冇乜誠意,比較難觸動到我。其實《狂舞派》後多咗好多工作,以前可能半年先有一個廣告,甚至成年都冇一樣幕前工作,但𠵱家相對穩定,一個月起碼都有 5、 6單有錢騷,我都好耐冇放過假喇!」
人氣知名度大增,顏卓靈反而擔心只係一剎那光輝,「所有事嚟得太快,我仲未搞清呢個圈嘅運作已經發生咁多事,我有時會諗:『顏卓靈你配唔配呀?』呢個「顏卓靈現象」已經去到頂點,再好落去可能會好似樓市咁泡沫爆破!嚟緊我會拍一套懸疑片,做一個精神分裂角色,希望觀眾唔會將我定型係阿花,可以見到我另一面!」



擔正《狂舞派》, Cherry更升呢挑戰金馬,有得行紅地氈已經算贏! 

電影 張家輝騷肌完勝

為拍《激戰》,地獄式苦練多月的張家輝,雖然失落金馬獎「最佳男主角」,但已經憑一身完美朱古力肌迷暈全港;而電影亦令 MMA格鬥在港大熱,唔少 OL都趁熱鬧玩埋一份!


電影 港產片 Top3

 


1.《激戰》約$4,400萬 

2.《西遊•降魔篇》約$2,840萬 

3.《掃毒》約$2,723萬

高登女神兩年霸 謝安琪:多謝高登先!


《蘋果日報》圖片 

已為人妻兼生了囝囝張瞻的謝安琪,竟然連續兩年擊敗黃翠如、鍾嘉欣等成為高登女神 No.1,無端端變女神,一向樸素唔多行性感的 Kay都𢱑爆頭,「我知有邊幾個女神上榜,所以先奇怪我有咩可能會贏到 Ella同嘉欣 BB,𠵱家連內地傳媒都叫我女神,我真係受寵若驚!我冇諗過下年仲係唔係我排第一,不過都好多謝高登一班朋友畀呢個榮譽我!」

「仲怕唔怕輸?」

女神之名傳到中國,除了朵夠響,亦因為 Kay早前到內地參加了《金鐘獎中國音超》比賽,知名度大增,「今年我有兩件事係好值得開心,第一係國語碟成績好好,對我嘅注目度同回響都多咗;第二樣係參加內地歌唱比賽。我好想借呢個比賽去突破自己,同時都想知道自己究竟仲有冇鬥心、怕唔怕輸,好彩最後成績都唔錯!」
專注大陸市場,好在 Kay講明嚟緊會多放時間喺香港,「下年我最想快啲完成埋隻廣東碟!我今年出 trip太密影響進度,希望嚟緊有多啲時間開會、錄音,最理想喺第一季出到!另外想拍到一部特別啲嘅電影,要我練大隻都冇問題!」



Kay參加內地歌唱比賽獲得好成績(右),新國語碟(左)又受歡迎,今年對 Kay嚟講都算大豐收! 

網絡 捱麥記女網爆

網友創意無限, YouTube「十大熱門非音樂影片」中,最 hit係「一生只想尋找一個肯捱麥記的女人」;而「 14巴港女」則穩佔第 2;另外司徒夾帶的短片亦極受歡迎,其中「乜姐有請」同「啤牌超人」都入十大!司徒夾帶話好快又有新搞作,「我打算推出『$388恭喜發財廣告套餐』,只要畀錢,我就會幫手拍段賀年片畀你指定嘅對象!」※截至 12月 27日


「一生只想尋找一個 肯捱麥記的女人」 ※ 1,839,016 

「 14巴港女」 ※ 1,858,235 

司徒夾帶「乜姐有請」 ※ 692,565

音樂 永遠懷念 Sita

原名陳皓儀的 Sita(陳僖儀),於今年 4月 17日不幸撞車離世,享年 26歲。事後 Paco幫 Sita出了紀念專輯《 All the Best...》,而 9月的華語音樂傳媒大獎頒獎典禮,大會更追頒《最佳粵語女新人》給 Sita。好歌有好報, Sita, Rest In Peace!

音樂  Dear Jane真係咁 hit?

YouTube早前公布今年的「華語歌曲影片排行榜」,同上年一樣又係連詩雅第一,佢首〈說一句〉以 256萬點擊率佔據榜首;更意外係 Dear Jane有兩首歌打入十大! Band仔霸 2首十大歌,證明條街都真係 hit緊佢哋嘅!話時話, Mr.去咗邊呢?




採訪、撰文:湯勵貞
攝影:賴穎雋

Ads by Google

    全站熱搜

    tvb4life 發表在 痞客邦 留言(0) 人氣()