同場加映,就係因為掛住玩羅拉,遲咗兩分鐘就買唔到紅米喇!唯有等 23號再預約過。 

ILIKE

八蚊玩羅拉

本來呢個禮拜應該掛住玩 PS4,尤其係可以將遊戲畫面 stream去 PS Vita繼續玩,真係唔使開電視都玩得。之不過,出到街要搵 Wi-Fi hotspot企定定先玩到,始終都唔係咁方便,都係玩番手機 game好啲。

 


@周群雄 

上個禮拜三,第一集《 Tomb Raider》喺 App Store發售,仲記得 96年喺第一代 PS推出嗰陣,真係打到廢寢忘餐,有「老金」都冇用,因為跌咗落陷阱就算不死都爬唔番上嚟。雖然唔知點解當年會覺得起角多邊形身材好 sexy,但作為羅拉嘅「死忠」,梗係即刻用$8買嚟玩啦!不過,觸芒操控真係難以應付複雜跳躍動作,都係用番實體 gamepad玩易好多。

籃球都充電

每次上 Apple Store,九成九時間睇 iPhone、 iPad或 MacBook,好少會去睇配件(尤其香港人,點都要落鋪頭玩過摸過先買),其實 Apple Store有好多古靈精怪配件,例如由 InfoMotion出嘅 94Fifty籃球,外表係一個籃球(實則都係一個籃球),之不過球內藏有九個感應器,再用藍牙駁埋 iPhone,每次射完波,自動分析力度同角度,就連控球時間同弧度都睇埋,每次充電,可以射八個鐘。


充電籃球只限美國 Apple Store有售,賣 300美元(約$2,340)。 

@劉耀祥 

健健康康

唔係十八廿二,打波已經唔係求入波咁簡單,反而係求健健康康,因為一整親就有排都好唔番,分分鐘坐成年冷板凳冇得落場。唔好以為呢個只係普羅大眾嘅憂慮,偉大如高比拜仁都要驚個「傷」字,畢竟已經 35歲,上季季尾整傷阿基里斯腱,都要抖足八個月,早兩星期先復出到,你話傷患幾咁緊要。既然復出到, Nike梗係乘機推新鞋,下年二月先推出嘅 Kobe 9 Elite,唔知係唔係因為驚再傷(雖然高比死口否認),所以第一次用高筒設計,保護住隻腳,以往憎買低筒鞋以致一直冇揀 Kobe鞋款,今次終於唔使焗揀 LBJ同埋 KD。


新戰鞋顏色有啲怪,希望遲啲會有其他色。 

@潘健文 

潛呀潛 卡記首潛

一個月後又有每年一度錶界大日子 SIHH,呢個時候,各大品牌都會開始出 pre-SIHH嘅料,龍頭大哥卡地亞先嚟一隻 Calibre de Cartier Diver, 42mm直徑錶殼配自家 1904 MC機芯, 48小時 power reserve, 3點位有 3日日期窗, 6點位有小秒針,特大特光羅馬字( XII),錶盤布局都算平衡而有力,再加上一個經 ADLC處理嘅單向針時圈、針釦膠錶帶,簡單嚟講,即係有齊潛水錶應有嘅元素,初步印象良好。不過,都係嗰句,官方相片經過 PS,要幾靚有幾靚,點都要睇睇實物戴吓上手先知虛實。


一個 ADLC計時圈,令人眼前一亮,好嘢好嘢。 

以 8粒螺絲封密錶背,既可提高防水度,又方便擺正 Cartier logo。 

@劉定邦

text:科技組

Ads by Google

    全站熱搜

    tvb4life 發表在 痞客邦 留言(0) 人氣()