熱到爆

2014丟路姆西潮點

2014年又就快到,要日日對住狼英政府的確悶爆,想明年過得更加精采,綜合方方面面的意見,以下十個是我們提議 2014年必去的旅遊景點,重中之重就是帶埋一丟爆紅的神獸路姆西(又名路福西)暢遊世界各地,勢要將代表香港精神的路姆西,丟得更加遠。

路姆西成名之路


公仔附有一個嫲嫲公仔,「 Lufsig」可將「嫲嫲」吞下,只要將狼肚翻開,便可救出「嫲嫲」,嫲嫲被網民喻為林鄭。 

路姆西其實是 IKEA一隻豺狼毛公仔,原名「 Lufsig」,是「毛公仔助學行動」一員,公仔靈感來自《小紅帽》童話,將嫲嫲及小紅帽吃掉的豺狼。
大陸的 IKEA將 Lufsig音譯「路姆西」,似粵語粗口。 12月 7日,社民連成員曾浚瑛及陳德章把「路姆西」掉向出席地區論壇的梁振英,結果公仔一擲成名,在全港更被搶購一空。及後大陸 IKEA急急補鑊,將路姆西改名為路福西。

1.帶路姆西上太空


機身設計特點是母機和火箭合一,可循環兩用。 

路姆西一係唔去,一去就要衝出地球,在太空無重狀態下,唔使掟已經識飛。
路姆西最好由香港人帶上太空。唔係講笑,明年真有咱們香港人上太空,他就是「鞋王」鄧劍群幼子鄧偉賢喇!「我都會帶樣嘢上太空,拎返香港做慈善拍賣。(考唔考慮帶路姆西去?)帶佢去會好難做生意!你不如問下黎智英,有無興趣帶《壹週刊》同《蘋果日報》上太空啦!」
原本幫 Daddy打理家族生意的 Alex(鄧的洋名),今年中識了在荷蘭搞太空旅遊的 SXC( Space Expedition Corporation)行政總裁 Michiel Mol,決定唔做鞋,轉做太空旅遊生意,投資 8位數字,做 SXC亞洲區代理,自己更行先死先上太空,暫定明年第三季試航。「年輕人(他 38歲,已婚,育兩子兩女)要勇往直前,最緊要行先,死唔死唔重要,最緊要榮耀地死。」
為了上太空,他已經去了荷蘭 SXC模擬駕駛艙,感受上落太空時的 4G引力( G Force)。「就好似賽車壓背的感覺,有 3、 4個人壓住你頭頂和膊頭咁。」

太空 5分鐘

Alex話,整個太空旅程由香港來往委內瑞拉的庫拉索島太空站基地要 6日,乘太空船 5分鐘就可由地面上升到 103公里,到達地球和太空的分界卡門線,停留 5至 6分鐘,感受無重狀態,慢慢返回地面。成個行程約 1小時,睇到三分一個地球(中南美洲)。
無聽錯呀得 5分鐘!「上多幾分鐘對體格要求又高好多,就算上去一個鐘,睇到的都是一樣,左邊黑漆漆右邊是地球,又唔係太空人要上去搞人造衞星!」
Alex隻太空船只載一個客人和機師,所以客人會做埋副機師。「好似 Cool魔咁幫手望下掣。現在已有一男一女的 CEO報名,因為私隱不能透露太多。」


SXC和維珍航空的維珍銀河都舉辦太空旅遊,大家都在未來一兩年出發。 Alex說他們的太空船比較環保,像飛機注滿油就可再飛,不會用完即棄。而且得一個乘客,坐在機師旁,客人面前是 4米大窗,真係以為揸緊太空船。 

鄧偉賢愛錶愛車,更是法拉利車主會幹事,今日升呢上太空,到荷蘭試模擬艙的 4G引力。「我希望 60歲回望自己有做過一件事,而不是靠家族。」被訪者提供圖片 

 

始終是新,好多客人擔心安全問題。「驚好似電影《引力邊緣》咁返唔到地球,但放心我們會有太空衣保護,有咩事都有氧氣提供!」
歷年好多太空騙案,今年初「火星一號」的移民計劃有 8萬人報名,註冊公司地址竟是民居; 90年代也有 3間公司搞太空旅遊都失敗,怎說服客人不是另一個騙案?「我們的太空船已經 ready,又請咗全球第二位上月球的太空人 Buzz Aldrin助陣,無呃你。」
他希望首航還有更多中國人參與,參加者只要年滿 18歲以上,無心臟病無懷孕或幽閉恐懼症,而最最最緊要係要有錢,因為成個太空套餐盛惠$168萬(註一)。
Alex唔會帶路姆西,建議各方籌旗俾《忽周》記者,集腋成裘,本人定當帶神獸衝出地球,為各位完成任務。


今年 7月,他與 SXC行政總裁 Michiel Mol(右)開記招宣傳太空計劃。《蘋果日報》圖片 

我如果可以黐埋富豪上去,絕對是神的表現啦! 

 

註一:超豪$168萬太空體驗包括:
1.入住一晚香港半島酒店,然後坐勞斯萊斯來往香港機場;
2.乘私人飛機往返香港及加勒比海庫拉索島太空站, 4晚當地 5星酒店;
3.乘太空船太空漫遊,成個行程約 1小時。
(另有平民價$78萬套餐,要自行去當地)

2.齊齊追蹤北極熊

成日俾人掟,路姆西跟同樣面對生活困境的北極熊,可謂同病相憐,好應該互相問候下。
據年中去過北極的旅遊達人曾劍華說,北極熊因地球暖化,冰川融化,依家企都無碇企,要游水去好遠地方覓食。
除了去搵北極熊,美國太空總署亦指,現在是太陽活動循環的高峰期,從現在到明年四月,將是近半世紀觀賞北極光的最佳時機,咁有紀念價值的時刻,又點可以無路姆西份呢?


雖說至明年 4月北極光最靚,但睇唔睇到又是命。北極光非整夜都有,多在凌晨 3、 4點現身,青 BB劃破長空,咪以為見鬼。(互聯網圖片) 

冰川融化,北極熊無地方企;香港人又何嘗唔係俾 689迫到唞唔到氣?(互聯網圖片) 

曾劍華今年中脫衣躺在斯瓦巴群島( Spitsbergen)上的冰山 Lilliehook Fjord。(被訪者提供圖片)

項明生今年聖誕也出發睇北極光,他還在 FB呼籲網民俾 like夠 2千,就帶埋路姆西去旅行。(被訪者提供圖片) 

北極好近我家鄉(瑞典),我可以公器私用,做嘢之餘帶埋茅台去探親。 

3.巴西丟盡路姆西

《 Lonely Planet》剛選了巴西是 2014年最佳旅遊國家,因為世界盃明年 6月 12日就在巴西揭幕,帶路姆西去睇波,定必 high爆!不過,上屆有辦世界盃旅行團的康泰都話未知攞到幾多張門票,暫時未有出團資料,其他旅行社亦未必搞世界盃團,弊!
《忽周》建議各位提早 2月中出發,踢路姆西去巴西,在一年一度的巴西嘉年華「舉西」起舞,又或留待世界盃時,球迷睇得激動,都可以丟出去洩憤!


巴西嘉年華咁熱鬧,又點可以無路姆西份!( AFP圖片) 

每年 3月是巴西嘉年華,全民載歌載舞,不過唔會有菠蘿在頭頂。( Reuters圖片) 

我最想送個波餅俾 689!

4.去馬拉大戰 Angry Birds


圖為芬蘭的憤怒鳥主題樂園。(互聯網圖片) 

以前香港是四小龍之首,依家馬來西亞都爬過我哋頭,成為全亞洲唯一入選《 Lonely Planet》 2014年十大最佳旅遊國家,馬來西亞新景點如全東南亞最大雀鳥園, Legoland和 Hello Kitty Land等相繼落成。明年 5月還有個室內 Angry Birds主題樂園,約佔地 26,000平方呎,香港都唔知幾時先有路姆西主題樂園,輸晒!

5.到荷蘭賀國王節

荷蘭每年 4月 30日就是女王節,但以後歷史要改寫!唔係有人搞革命,係去年女王 Queen Beatrix退位俾長子亞歷山大後,女王節以後將變成國王節,日子就訂在國王生日 4月 27日。
每年女王節,荷蘭都變成橙海,人民會着橙色衫出街慶祝,當日在跳蚤市場擺賣更唔使申請和交稅,大家在街上賣路姆西都唔怕俾差人圍!


去年女王節,全城變橙。由於荷蘭節日不能設在星期日,所以明年會提前一日即 4月 26日慶祝國王節。( Reuters圖片) 

萬一 689下屆又當選特首,我哋都是橙,不過是杏加橙個橙。 

6.坐港鐵去中聯辦

你未必有錢帶路姆西出埠,但做人最緊要係有心,在香港丟亦得。
像明年港鐵的西港島線將會通車,由上環貫通西營盤,大學至堅尼地城,最正是西營盤站的奇靈里出口,行幾分鐘就可以到我們最愛的中聯辦,以後到那裏 BBQ就唔使由維園行去咁辛苦!
除了中聯辦,據港鐵土木工程師靚仔 Joe(黃覺明)所講,今次三個站各有特色,好似西營盤站會好有藝術氣質,因為擺放好多本地藝術家的作品;而大學站深 70米,由 12部𨋢接駁山頂到山腳,最高有 35層樓高,是全港最深的洞穴式車站,做埋防空洞都得;堅尼地城站則重視環境保護,像科士街那幅樹牆會保留唔拆,他日帶西西來玩亦不錯。


西港島線阿 Joe有份負責,因要做爆破,但堅尼地城站學校林立,為免阻住學生哥考試,他們要攞附近學校的考試時間表,再計劃爆破時間。 

要起幾十層樓深的地鐵站,一定要先爆個樹洞出來,再慢慢左右挖。都好深下…… 

如果有個出入口在中聯辦地庫,可以避開門口的粉絲,咁就最好喇!

7.當路姆西遇上樹熊


維多利亞省樹熊有 71至 78厘米長,體重有 8至 12公斤,多見樹木少見人,所以海洋公園唔會安排抱抱樹熊環節,有得睇無得摸。開館日期明年底,正確時間有待公布。( AFP圖片) 

講開熊,大家定會懷念路姆西的舊友 Dream Bear。 Dream Bear呢年少露面,不過明年想探 Bear,你可以去海洋公園。
此 Bear不同彼 Bear,是 cute好多的 Koala Bear樹熊。南澳洲政府明後年會送 8隻維多利亞省樹熊來香港,由南半球移民來北半球唔係講笑,海洋公園當然要起間豪宅招呼貴賓啦!
不過,海洋公園話樹熊館還在建設中,現階段可提供的資料唔多。只知樹熊最鍾意夾住棵尤加利樹,所以樹熊館內會種滿尤加利樹,還在廣州設立種植場,以滿足一隻樹熊一生要食一千棵尤加利樹的需要。

8,9,10.全球高潮在中環

你無睇錯,最後三個景點都在中環。
政改若傾唔掂數,佔中行動明年 7月就揭幕,解放軍會否解放中環,都是未知之數,唯一肯定是呢單新聞一定蜚聲國際!作為香港人,無理由唔掉路姆西賀一賀!
與此同時,中環新海濱明年會建維港摩天輪,佔中佔得累可以坐下,又或行上荷李活道的三級歷史建築物——已婚警察宿舍,事關那裏改為創意中心,新名叫「 PMQ元創方」,明年初免費開放,中心設有地下展示廊,重現前中央書院地基遺蹟,俾路姆西提升文化素質都好。


維港 06年都搞過環球嘉年華,除幸福摩天輪外,還有旋轉木馬和其他機動遊戲。《蘋果日報》圖片 

PMQ元創方的前身是警察宿舍。( PMQ網頁) 

7月中環見!

撰文:阮淑賢
攝影:周義安
插圖:王紹堅

Ads by Google

    全站熱搜

    tvb4life 發表在 痞客邦 留言(0) 人氣()