20分鐘賣晒啦!(真實對白)麥玲玲話經營淘寶成本低過開鋪頭:「我負責諗product,杭州有人負責營運,不過淘寶客好多嘢問,所以我請咗4個客戶服務員負責答問題,叫如、意、吉、祥,2千蚊人工一個,日後會再請多啲人添。」

淘寶熱爆,識喺淘寶買平嘢當然叻,但識得靠淘寶發達就更醒!出名預測股市準過分析員的麥玲玲,原來兩個月前已睇中淘寶吸財的潛力,利用自己名氣,於淘寶開設了「吉慶堂」商店專賣風水飾物。瞄準強國客仔,結果早前農曆年間,短短3日已大賺過百萬人仔,靜靜雞發咗新年財!


藝人要北上,原來連風水師都回歸,麥玲玲近年不斷北上搵人仔,每逢週末週日都往內地為大型樓盤睇風水、出席銀行和美容店等講座等,早已睇通內地客財雄勢大,大把搵錢商機。

桃花繩斷貨
不過內地人最愛掃貨,麥玲玲亦睇準市場需求,去年12月跟杭州一位朋友在淘寶開設了網上商店「吉慶堂」,專賣「化太歲手繩」、催旺桃花電話繩等,每條賣128至168人民幣(約$160-$210),結果在農曆年初一至初三短短3天,總共大賣數萬條,大賺過百萬。麥玲玲都話估唔到咁好賣:「初初我唔知個市點,只係造咗500條,點知唔夠廿分鐘賣晒,嗱嗱聲叫廠趕工,又賣晒,家冇得賣㗎喇,嚟緊我會賣新產品啦!好多客話內地就快高考,叫我出啲旺讀書嘅嘢,我叫個廠造緊㗎喇。」

「個名響有着數」
在內地甚至淘寶賺大錢,麥玲玲話全因自己知名度高,除主持電視節目外,近年客串電影如《抱抱俏佳人》和近期的《八星抱喜》等,拍住林峯、甄子丹更加提升知名度。麥玲玲亦承認:「內地人信唔過內地嘅玄學家,香港玄學家最吃香,我拍多啲電視、電影,個名響啲一定有着數!」咁多瓣數,遲啲分拆再上市都仲得呀!

JJ拆爐嫁唔出
麥玲玲百足咁多爪,為人亦好大方,喜歡贈人兩句,所以出名係萬人friend。近日麥玲玲見賈曉晨(JJ)換了屋企爐頭,將明火爐改成了電磁爐,就連忙提醒她:「唔用明火爐,獨身女仔好難嫁得出㗎!」又指JJ不應該拆掉廚房門,會對感情不利。 JJ接受本刊訪問時好無奈說:「好多謝師傅指點,但個爐頭係剛剛換,換番明火爐會俾阿媽鬧,我極其量裝番道廚房門囉。如果佢話我會嫁唔出,我寧願選擇唔信算喇,哈哈!」嫁唔出都唔理?過多幾年你就知。

網上搵大錢
好似麥玲玲咁識得利用網上平台賣產品的玄學家並不多,連紅遍中西的蘇民峰都冇搞網上店;而除麥玲玲之外,較多人幫襯的只得捉鬼怕「出事」的司徒法正和李居明,但都只在自家網頁上賣玄學物品,沒有在淘寶開店。

司徒法正 勁賣符
司徒法正主要賣各種符咒,農曆年間最好賣是招財符,司徒法正:「招財個個都喜歡,我有幾種招財符,賣$180至$380,上個月賣得最好,賺咗30萬咁上下啦!」

李居明 淨賣書
李居明網上商店雖然設有風水物和飾物等欄目,但全部沒有產品可賣,只得他多年來的玄學著作供出售,聽聞甚得內地客歡心。 ####


北上搵食麥玲玲近年忙於開拓內地市場,每星期都北上為內地各類公司開講座和睇風水,大賺人仔。


派大利是每年農曆新年,麥玲玲出席活動時都大派利是給傳媒朋友,今年賺到錢更加碼,每封最少500大元。


麥玲玲在淘寶開設的「吉慶堂」,因為自己有知名度,毋須歸納於「淘寶商城」,只須開個普通account,即一毫子費用都唔使,麥玲玲更在首頁放上自己的靚相做生招牌。


首飾沽清 3日沽清的「化太歲手繩」(每條168人仔),4個犯太歲生肖龍、狗、兔、牛佩帶不同的款式,麥玲玲說手繩是用絹來製造,不會手又襟戴,認真有心思。


電話繩斷市催旺桃花的「開花結果」電話繩(每條128人仔),最高峰廿分鐘內賣出500條,麥說:「所謂花開蝶仙至、蘋果有開花結果嘅意思;掛喺手機,啲靚仔全部WhatsApp你呀!」


長期冇貨由於太熱賣,「吉慶堂」經常全部貨品售罄要張貼告示,麥玲玲說:「賣幾日就要停幾日,所以我會生產多啲貨,遲啲仲會喺內地開鋪添。」


麥玲玲經常為電影客串,如《抱抱俏佳人》就不惜破壞形象飾演林峯的惡媽咪。


JJ於09年以192萬買入將軍澳怡心園一3房單位,入伙時她身後的廚房門已拆掉,但最近才知對感情運有不良影響。


麥玲玲指賈曉晨(JJ)家宅風水會令她嫁唔出,JJ叫慘:「我最驚係嫁唔出,我家只係同阿媽住咋,連拖都冇得拍。」


換爐前 JJ的廚房本來用原樓安裝的明火爐頭,最近怕火的她換上電磁爐,卻被麥玲玲批算會令她嫁唔出。


stacylife 發表在 痞客邦 留言(0) 人氣()