政府即將發出3個免費電視新牌照,TVB難再一台獨大;最近從無綫手中搶走唔少藝人同幕後大腦的「電訊魔童」王維基,已落實3月起開拍電視劇,更肯定會起用張可頤做女主角。
王維基來勢洶洶,最慘仲有個如狼似虎嘅李澤楷,他旗下的now TV亦將開免費台。據知無綫叛將王喜和林保怡已落實埋李澤楷堆拍劇外,謝安琪和梁思浩亦將加入戰陣。反觀TVB則內憂外患,呢鋪被兩大財團夾擊認真難搞!


今年幾個免費電視新牌照雖然未發出,不過王維基的新電視台已如箭在弦,本週五(24日)更在將軍澳工業邨舉行電視大樓動土儀式,擺明在無綫地頭動土。去年已招兵買馬的王維基,據知3月便會開拍多齣題材新穎的電視劇,繼黃日華主演的港版《鬼眼》外,亦會有歌舞劇,極可能由Soler和關楚耀孭飛。

林保怡埋位
無綫花旦張可頤亦已決定轉投王維基撼娘家,現正在橫店拍攝內地劇《女相》的她,週一(20日)在電話中對本刊回應說:「正度期返港出席動土儀式,肯定會拍王生嘅劇,但暫時唔方便講太多,(拍劇打TVB?)喺一個地方做耐咗,都要試新嘢啦,我想要啲新制度。」

齊開新劇夾擊
除王維基鐵定3月會正式開新劇外,其實now亦已經密鑼緊鼓準備,先有金牌監製劉家豪和梅小青齊過檔,再搭上林保怡、王喜等棄將前後夾攻,無綫呢鋪唔易打,無綫《天與地》金牌監製戚其義和編審周旭明完成手頭的《金枝2》劇本後就會離巢。

林保怡撐now


魔童靠黃日華


無綫60編劇走剩20
王維基自踩入電視圈搞免費電視台後,四出掟錢挖人,搞到TVB台前幕後都人手緊絀,連原來有六十幾人的編劇部都挖剩得廿幾個編劇,惟有搵啲編劇初哥,未夠料的頂硬上,好似之前有指TVB搵王祖藍加入做編劇寫故仔,不過就惹嚟編劇們不滿,更寫匿名信投訴。祖藍被轟冇料做編劇,而拍緊的《名媛望族》就因唔夠編劇,除要每日「飛紙仔」即興拍、外景場口未度掂外,連主角劉松仁都幫手兼職做編劇,TVB真係善用人才嘞!

撈埋編審
王祖藍初次做編劇,進度算唔錯:「個故仔就快寫完,自己有收番編劇份人工,但人工得萬零、二萬蚊,好抵㗎!」


拍緊《名》的馬國明亦呻無綫唔夠人:「係日日都『飛紙仔』,外景停咗一個星期,有好多會搬去車墩拍,想拍得仔細啲,唔想被網友話穿崩嘛!」

離巢
無綫《天與地》金牌監製戚其義(左)和編審周旭明(右)完成手頭的《金枝2》劇本後便會離巢。


而李澤楷旗下的now TV亦殺到埋身,在無綫監製過如《宮心計》的梅小青和《溏心風暴》系列的劉家豪,兩夫婦約滿後將轉投now TV,據知now已有多部劇本在手等待4月開鏡。而最近簽約的林保怡,將為now開拍類似《壹號皇庭》的劇集,食番老本。

王喜:now演員高質
除林保怡和張可頤外,另一無綫叛將、陳志雲親密戰友王喜亦已落實為now免費電視主打綜藝節目和拍溫情劇,王喜更說:「我做主持,係一個好新嘅話題性節目,3月中開鏡,但唔透露得太多住。至於拍劇係必然嘅,4月會開工,我嘅經理人公司叫大國豐臣,now係其中一個股東嘛,好理所當然啫;我可以講now會有好多高質素嘅演員,一定會做得好。」即係無謂留戀TVB咁解囉!

now全面狙擊何麗全:當然勁過TVB!
now 3月將有連串攻勢迎戰TVB及王維基,如早前邀請到大班紅歌星如謝安琪、林憶蓮、張敬軒、TVB契仔李克勤等為「now芒果台」開音樂會,由無綫過檔到now榮升首席副總裁的何麗全,當日對本刊記者說:「我哋今年仲會搞大型選秀活動,類似《超女》同《超級巨聲》咁,而且我哋同內地合作發展內地市場,自然吸引到好多歌星嚟幫手。」被問到是否要同TVB鬥過,何麗全用不屑的口吻答:「當然勁過TVB,你見有咁多歌星畀面就知啦!」唔放舊公司在眼內。

無綫綜藝悶死
TVB綜藝節目經常一向被評有欠新意,尤其近年的綜藝節目更經常出現炒冷飯的情況。為迎戰,無綫搵咗曾效力無綫收費台和為黎智英台灣電視台開荒、有「女橋王」之稱的余詠珊(Sandy)回巢,入主TVB綜藝。Sandy稱:「首先會推出一條全新十點半橫線,其次我會顛覆所有無綫大騷!」講明玩革新,又睇吓到時有乜改變?

《五覺大戰》勁拋胸
由金剛、錢嘉樂和洪天明做主持的《五覺大戰》,週日(19日)播出首集時,一眾「神獸天使」已被評性感似AV及意識不良,其中錢嘉樂玩飄移時,更有天使葉慧欣玩至走光露奶。

《千奇百趣高B班》食老本
以森美、小儀做主持的資訊遊戲節目,由09年開始至今輯已為第六輯,形式未變過,就算森美、小儀主持孭飛都悶死。

《三個女人一個墟》主持弱雞
由卓韻芝、蒙嘉慧、呂慧儀主持的《三個女人一個墟》,每集請嚟唔同嘉賓探討一些城中話題,節目近似J2台的《姊妹淘》及《芝人口面不芝心》又係一雞兩味格局。 ####

 
要試新嘢!真實對白
張可頤與無綫結束20年賓主關係,轉投王維基的新電視台,揚言希望在新制度下繼續拍劇。


王維基同李澤楷未攞到免費電視牌照,已出招夾擊無綫,呢次無綫有TV Buddy呢隻吉祥物都未必頂得住!


一定會做得好!真實對白
王喜將會為now拍劇兼主持新節目,對於娘家TVB,他冷淡地說:「唔評論呢間公司囉!」《忽然1周》圖片


六嬸方逸華已辭去TVB副主席及董事職銜,將於下月25日正式離開,亦代表無綫正式改朝換代;由殼王陳國強揸旗的TVB能否有以前咁威係未知之數。


保怡簽實去年12月,林保怡正式簽約由now及電影人張家振合組之新經理人公司「大國豐臣」,主要為now免費台拍劇,據知部分劇集將與湖南衞視合作。能夠打開內地市場,當然吸引。


監製走佬劉家豪及梅小青是無綫金牌劇集監製,今次兩公婆齊齊過檔now,明剃無綫眼眉。


王喜給力王喜正在哈爾濱跟方力申(右)和惠英紅等拍劇,不時喺微博報道近況,2月尾將回港落實為now主持節目的細節。


王維基開劇要搞新意思,如黃日華更出動寶貝女黃芷晴,父女檔拍鬼劇。


廖碧兒離開無綫後不久即被王維基睇中,據知將會夥拍黃日華一齊拍鬼劇做女主角。


張可頤最後一齣無綫劇是《法證先鋒III》,去年11月她仍出席宣傳活動撐無綫;而離巢前拍攝的《天梯》則尚未播映。


王祖藍編劇、監製、主角我做晒!真實對白


馬國明係日日飛紙仔。真實對白


《蘋果日報》圖片


王喜做埋主持陳志雲涉貪案去年被裁定罪名不成立,審訊期間王喜曾瞓身護主,如今陳總更辭職往美國進修,王喜亦離開跟無綫打對台。


城城造勢前TVB綜藝科重臣何麗全(左)轉投李澤楷後,帶走無綫廿多名綜藝科同事,有意大搞音樂及綜藝節目,「觀星台」開始時更請來郭富城造勢。


謝安琪拍特輯本月11日「now芒果台」在博覽館舉行大型音樂會,撐場的有謝安琪、林憶蓮、李克勤等,吸引力勁過TVB近期的音樂節目多多聲,據知謝安琪更會在4月為now拍攝音樂節目,何麗全幫得手囉!


梁思浩加盟梁思浩曾屬TVB棄將,今年3月亦決定為now主持新節目,並將在節目中大爆娛圈秘聞,到時離唔開又鬧TVB。


19/2


25/2


26/2

tvb4life 發表在 痞客邦 留言(0) 人氣()