小寶多元智能發展中心的 playgroup很多元化,採訪當日,正播出一些音樂動畫,吸引一班只有 2歲的兒童跟着動作舞動,訓練肢體協調。 

創業通

小寶教育集團 轉型做兒童教育產品供應商

現今家長為令自己的小朋友「不要輸在起跑線上」,不惜大灑金錢,令小朋友教育市場成了一隻生金蛋的鵝。由 Kayman創辦的小寶教育集團,由 playgroup做起專攻幼兒教育,現時已發展成教育產品供應商,與 playgroup及幼稚園合作提供興趣班課程及導師培訓服務,另更推出幼兒 D.I.Y.產品、舉辦兒童比賽及成立兒童資訊網等,在兒童教育市場上成功突圍。

 


Playgroup的課程內容時有變化,令小朋友不會覺得沉悶,像圖中小朋友要攀過阻礙物去射籃。 

「 Toes、 knees、 shoulders、 nose……」記者去到小寶多元智能發展中心的荔枝角分校,看見小朋友在導師的陪伴下做體適能音樂操,跳了約 5分鐘後,導師帶着小朋友過障礙物把皮球投進籃框內,原來這些課程都是經小寶教育集團編排,加盟者吳小姐表示:「加盟之後,小寶提供課程畀我哋,內容多元化兼迎合到市場需要,好似訓練小朋友嘅平衡力、手眼協調、學到英文單字外,仲有模擬面試班,家長好 buy。」
現時小寶教育集團的業務除提供課程外,還有 playgroup導師培訓、出售 D.I.Y.產品及籌辦公開比賽等,老闆 Kayman說:「𠵱家我哋退居幕後做供應商,同幼稚園及 playgroup合作,編排課程及興趣班,會安排埋導師去任教。」業務不斷擴大的小寶教育集團,現時每月盈利約 10萬,其實起初只是由一間補習社開始。
小寶教育集團創辦人,讀媒體出身的 Kayman,本在電視台工作,在 04年看見幼兒教育有市場,決定投身下去,「當時覺得搞同教育有關嘅生意易賺錢,於是開咗間小學補習社及幼兒英文中心,喺荃灣租咗 2千幾呎嘅鋪位,請晒導師,收生都唔錯㗎。」

吳小姐 加盟者


Kayman不時會到加盟店巡視,了解業務及小朋友上堂的情況。 

本身想開 playgroup,但又冇咩經驗,見小寶嘅課程好完善,而且又有導師幫手,覺得好專業,於是決定加盟。

主攻幼兒教育


現時小寶教育集團會定期開辦一些 playgroup導師培訓班,歡迎有興趣人士報讀。 

在經營年多後, Kayman覺得補習社發展並不樂觀,反而幼兒英文中心大有市場潛力,於是立即轉型專攻 1至 3歲的兒童,「補習有分旺淡季,暑假、聖誕及新年等時段,家長好少畀小朋友嚟補習,同埋𠵱家小學轉行全日制,開少咗班,好難維皮,反而家長好肯使錢畀幼童嚟學英文,覺得幼兒教育先係發展方向。」
當時香港逐漸流行 playgroup,但未算普及, Kayman即想到發展這門生意,他本身在美國讀書,可找來一些外籍導師作招徠,同時課程符合家長口味,所以發展迅速,「啱啱開業,要畀家長試班, playgroup喺外國好流行,不過外國人著重感官發展,玩嘅元素較多。香港家長會現實啲,想小朋友學到嘢,要加入學習元素,好似學英文單字、數數目字等。」
隨着發展, 09年 Kayman開辦 playgroup導師班,現時更成為他主要的收入來源,「當時請人唔易,出面請返嚟嘅導師,未必達到我哋要求,唔係鍾意小朋友就做到,要有 technique,好似點維持秩序、點引起小朋友嘅興趣都係有經驗可循,於是自己開班培訓導師,嗰陣主要係提供番畀自己嘅 playgroup,𠵱家我哋舉辦課程主要畀有興趣入行嘅人士報讀。」導師課程共 6堂,每班收 15人,學費為$6,500,每年可舉辦約 12班。
在 10至 11年間,小寶教育在高峰期曾有 8間 playgroup,每月盈利三十多萬,但因無暇兼顧,經營困難, Kayman決定退出前線工作,「當時自己有 2間,特許經營嘅有 6間,但管理上有啲跟唔上,導師唔夠同時租金開始上升,對教學質素有影響,做得唔夠好不如唔做,於是逐漸轉型,專做培訓、課程編排,𠵱家小寶教育中心嘅 playgroup全部係加盟者投資,我只負責提供課程及導師。」

主力訓練導師

對於設計 playgroup課程內容, Kayman認為要多元化,「我哋課程有 phonics、學前普通話、數學認知遊戲、專注力培訓、感覺統合訓練、體適能音樂操、手工藝課程等,仲會有親子互動課程可以選擇。之所以會舉辦呢啲課程,係我做咗差不多 10年嘅經驗所得,對於新加盟者好有吸引力。」
為增加市場佔有率,近來 Kayman開始專攻 3歲至 12歲小朋友的市場,「自己都有細路,成日諗有咩可同小朋友一齊做,喺一次展覽見到 DIY handmade creative嘅產品,覺得呢類 D.I.Y.產品可訓練到手腦協調、創造力外,仲可以家長同小朋友一齊參與,促進親子關係。」


Kayman認為要管理店鋪及協助加盟者營運,很難兼顧,故放棄打理自己店鋪,主力發展兒童 D.I.Y.產品,及培訓導師的工作。現時他多了時間留在辦公室做管理和策劃的工作。 

現時小寶教育和各機構合辦兒童比賽,成績不俗。圖為今年 5月舉辦的成語故事演繹比賽。 

用 D.I.Y.攻市場

「我專程飛去美國傾個代理權,我建議用佢哋嘅產品配合課程出售,對方覺得呢個方法可行,就畀咗個代理權我。𠵱家我哋都有出咗自家嘅 D.I.Y.產品,好似自製手袋、錢包等,可畀小朋友發展多元智力。𠵱家我會搵唔同嘅幼稚園及小學合作,派導師去教 D.I.Y.手作嘅興趣班。」現時 Kayman代理及自家品牌產品,可在 Nobletime、天利行、千色店及網上購買。
在上年 Kayman更開始舉辦兒童比賽,建立公司形象,「好似繪畫、天才表演等,搞呢類比賽對公司宣傳幾有用,雖然搞比賽最煩係請評判、搵場地,但我有同其他幼稚園、 playgroup合作開,所以參加者好多,反響都唔錯。」
為了令更多人認識,今年 9月更開設了網上兒童資訊網( http://www.championkids.hk ),「 0至 3歲嘅網上資訊好多,反而 3至 12歲就比較少。香港邊個地方會有小朋友嘅活動及比賽,好似跳舞、話劇、彈琴等,參加多啲公開活動及比賽,對第時小學入學面試有幫助,網上對呢方面嘅資訊唔多而且冇咩整合,我哋有專人去整理,網站對家長有一定吸引力。」



Kayman認為 D.I.Y.套裝可以訓練到小朋友手腦協調及創造力,亦可和家長一起製成,促進親子關係。 DIY handmade creative趣致西瓜小手袋$39 


DIY handmade creative不織布青蛙拖鞋$39 


小寶教育集團亦有自家出品的 D.I.Y.產品。麋鹿小錢包$32

創業成本

租金( 2按+1上)︰約$60,000
裝修:約$140,000
器材:約$50,000
雜費:約$50,000
總投資︰約$300,000

每月收支

營業額︰約$310,000
租金︰約$60,000
人工( 20人)︰約$150,000
盈利︰約$100,000

DIY handmade creative

facebook: DIYtoyshk

小寶教育集團

http://www.siubo.com 


撰文:曾志恒
攝影:傅新發、彭自維
部分圖片由被訪者提供

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()