本月初,荷里活大片《變形金剛 4》來港取景,正正於政府總部的這位置拍攝爆炸場面,令負責場務一職的 Samuel留下深刻印象。 

青雲路

《變形金剛 4》拍攝背後 電影場務

一部電影的拍攝,除了前期的工夫要做得妥當,現場的場面控制、膳食安排、場地清理等都得配合才可令拍攝順利,而這些工作都有賴一班勞苦功高的場務。荷里活大製作的拍攝,你我也未必有機會親眼體驗!今年 24歲的 Samuel有幸參與《變形金剛 4》的拍攝工作,辛勞之餘,亦體會到本地製作與荷里活式大製作的分別,令他眼界大開!

 


在政府總部前的添馬公園,所拍攝的爆炸場面十分震撼!不少人親眼體會到荷里活的大製作,而震撼眼球後,便全靠一班清潔組的場務。 

早前《變形金剛 4》來港取景,大黃蜂跑車現身於中環街頭,惹來不少市民圍觀。另外,在政府總部的爆炸場面更是令人印象深刻,訪問當天,身為該片場務其中一員的 Samuel細說拍攝時,炸彈設置在哪些位置及其結構,以及如何清理爆炸後的碎屑,「我係清潔組嘅組長,雖然爆炸場面真係好震撼,但一爆完就成地都係灰同木碎,真係掃死我哋呀!」
18歲時, Samuel曾參與幕前拍攝,當過平面廣告及電視廣告的模特兒,十分熱衷於拍攝工作,並於大學時期修讀創意寫作與電影藝術系,發現幕後工作更有趣及適合自己,「我對機械唔太熟悉,反而比較擅長用文字及畫面去表達自己諗法,所以喺學校我好多時都係做編劇或導演,拍到自己想要嘅畫面會好開心。」
在學時期,他曾試過多種形式的拍攝,如紀錄片、廣告及劇情片等,因而了解不同的拍攝程序,以及與演員和工作人員溝通的重要性,亦認清自己的定位。

打雜一腳踢


拍攝《變形金剛 4》期間, Samuel的其中一個職責是阻止途人圍觀拍照,但畢竟機會難逢,他禁不住與大黃蜂戰車合照留念。 

12年 10月, Samuel加入多媒體製作公司,擔任副導演一職,「公司主要負責 MV拍攝及搞演唱會,但公司本身規模唔大,只有老闆(導演)、製片、製片助理、財政同埋我,我雖然係副導演,但其實咩都要理,好似搵場地、演員、傾價錢、器材管理、拍攝時用單反定大機都要諗埋,完全一腳踢,都幾辛苦,仲成日俾老闆鬧手腳慢,但自己抱住學嘢心態,覺得都係唔錯嘅經驗。」
Samuel自言對數字及機器都不敏感,在與演員商討價錢及器材管理方面都需迫自己學習,記熟每一個細節及各機器的名稱與特性,減少出錯的機會。
「我試過負責『上海軒尼詩炫音之樂』演唱會,演唱會為期 6日,平均每日瞓得一粒鐘,如果歌手要改曲目,或者由唱全首改到唱半首,我就要重新打歌詞集、整字幕,我仲要買飯畀工作人員,每日由朝早 7點做到凌晨 6點。到真正 on show嗰日,我㩒㩒吓字幕,成個人攰到暈低幾秒,眼前一黑完回復意識又即刻再㩒字幕。」

轉工做場務

其後,當 Samuel了解到公司發展以接演唱會工作為主要業務後,鍾情拍攝的他,於 13年 2月轉去一間電影製作公司的廣告部擔任助理製片,雖然工作比以前更辛苦,需與更多的演員接觸及溝通,牽涉的人脈層面更廣,卻能磨練他刻苦耐勞的意志。
「同年 8月,有朋友介紹我做中港劇《風雲天地》的場務,其實人工好低,通常一組戲 9個鐘約收$900,超時有 OT,但我一日得$500,有時仲要做成十幾個鐘,但見可以全程參與拍攝製作,所以我都走去做。當時有好多人怕辛苦嫌人工低而捱唔住,做咗一兩日就唔做;亦有啲人覺得自己能力不只如此,放棄唔做。」
Samuel卻覺得態度比能力重要,不介意由低做起,深信只要肯捱肯做,機會一定會有,事實上,他的信念令他獲得更多的工作機會。「劇務見我做嘢勤奮同認真,所以問我有冇興趣參與《變形金剛 4》嘅拍攝工作!」

場務 3百人


除了疏導人群、清潔場地及攔截車輛外,有時場務亦需協助「 mark位」,記下道具的位置或讓演員知道自己的企位及走位。 

Samuel感言,《變形金剛 4》的拍攝真的令他大開眼界,「荷里活大製作果然係唔同啲,分工分得好仔細,一套港產片嘅場務可能得 3至 4個,負責晒所有雜務;《變形金剛 4》嘅場務有成 3百幾人,仲分為唔同嘅部門,好似攔車組、飲食組、場地組,而我就屬於清潔組。」
因 Samuel肯捱肯搏,更被指派為清潔組的組長,「我帶住 9個人,主要負責場地清理,試諗吓,放一次飯都有成 500人,工作人員食完飯飲完嘢一定周圍掉,所以我哋要準備好多垃圾袋,再一次過搬去垃圾站。平時大約朝早 7點開工,夜晚 6點收工。同埋,大家都覺得拍爆炸一幕好震撼,但拍攝用嘅炸彈係用好多飛機木去整,一爆完就成地灰燼同木碎,最慘要掃走散落草皮上嘅灰!又多灰又多泥,真係好難掃。」

炒組員魷魚

同劇場務多為年輕人,同樣身為 80、 90後的 Samuel並不認同現今年輕人工作的散漫態度,「維持場地清潔好重要,因為唔知導演幾時會 pan個鏡頭埋嚟,會唔會拍到啲垃圾入鏡,所以我哋做嘢要快手。試過幾次,我交帶其中兩位組員清理場地,換吓垃圾袋,大家分工會更有效率,點知幾次轉過頭返嚟,佢哋乜都冇做,喺度行行企企,最後我都要自己做番晒,佢哋開咗一日工,我就叫佢哋之後唔使返工。」
然而,是次拍攝亦帶給 Samuel很多體驗,「雖然辛苦,但好開心,見識到真正大場面之餘,亦同過好多人合作,大家就算唔同組別,都會互相照顧。希望日後可以從事全職嘅拍攝工作,嘗識更多唔同規模同類型嘅拍攝。」


以當編劇及導演為目標的 Samuel,平日喜歡逛影碟店,他最欣賞王家衞導演的作品。 

Samuel除了當幕後工作,工餘時亦會義務擔當演員,幫助師弟妹拍攝學生作品,圖為學生作品《 Curse》, Samuel在片中飾演一名偷洋娃娃的失業爸爸。 

點入行?


Samuel因機緣巧合,由朋友介紹入行,但若想加入電影行業,當然需要對拍攝流程及攝影器材有一定的熟悉程度,所以可以先報讀一些短片製作課程,了解前期製作、拍攝、後期製作,各個崗位的工作範疇與內容。

課程資料:

課程:數碼短片製作專業
證書課程(第一屆)
機構:聖雅各福群會
堂數:逢星期三,共 8堂
時間: 7:00 pm- 10:00 pm
費用:$3,500/$3,700(會員/非會員)
內容:課程中會教授劇本編寫、畫面構圖與鏡頭運用等前期工作;亦會教授使用數碼單反相機拍攝、剪接、混音、配樂等後期製作的技巧。修畢課程之學員將有機會安排工作實習,累積更多實務經驗。
查詢: 2835 4394

晉升階梯

場地管理
$16,000至$20,000
3年至 5年經驗

助理製片
$13,000至$16,000
3年至 4年經驗

劇務
每組戲(9小時)$1,100至$1,300
1年至 2年經驗

場務
每組戲(9小時)$900至$1,100
無需經驗

後記:挑戰


在學時, Samuel亦嘗試過不同崗位的工作,圖中為 Samuel與同學拍攝廣告習作,並擔當收音師。 

聽過 Samuel訴說着辛酸史,曾試過因工作每日只睡得 1、 2個小時,非常辛苦。現實中不少人為了屠龍轉珠也到了不眠不休的地步,其實只要對着自己喜歡的事,將自己的小宇宙發揮到極至,也不足為奇。不過,年輕人在工作上辛苦點已怨天怨地,真的要不得,不如視工作如屠龍般挑戰吧!在工作上過關斬將,應該更有成功感,是嗎?

Michael Bay被打之謎


在港拍攝《變形金剛 4》時,導演 Michael Bay(中間白衫者)疑被收陀地人士打傷,轟動一時。《蘋果日報》圖片 

大家都很好奇,《變形金剛 4》在鰂魚涌英皇道及土瓜灣道拍攝時曾兩度遭勒索,電影導演 Michael Bay更疑因此受傷, Samuel說:「鰂魚涌嗰次,人話 Michael Bay俾人打中一拳,有啲人就話俾部攝影機撞倒。嗰日我在場㗎,但睇唔清楚,淨係見到保鑣將兩個收陀地嘅人撻低。當警察捉走兩個搞事人之後,就叫導演去驗傷,但導演冇去到。喺警察走咗之後,連導演都唔見埋,我聽其他工作人員講,話佢去咗隔籬街診所睇醫生。」


撰文:霍芷晴 
攝影:傅新發 
部分圖片由被訪者提供

創作者介紹
創作者 tvb4life 的頭像
tvb4life

明星八掛大分享★☆

tvb4life 發表在 痞客邦 留言(0) 人氣()