專題 Log In

柴油新紀元  Mazda6 SKYACTIV-DIESEL 2.2& BMW 320d& Audi Q7 3.0 TDI

本地柴油私家車市場唔似得免費電視牌照咁黑暗,只要你款車可以過得到嚴苛嘅廢排規定,就可以喺香港出牌,唔會有黑箱作業。或者因為轉款周期未配合,自 3年前 Audi引入柴油版 Q7之後,其他代理都冇乜反應,直至上月 BMW終推出首款柴油私家車 320d,今日又有 Mazda為日本車打響頭炮,推出柴油版 Mazda6,更加係現時最平柴油私家車,車價 33萬有找!吸引度極高!柴油車擁躉 Peter,買完柴油 Q7及 320d後,都仲好有興趣想試埋柴油 Mazda6,睇吓日本柴油車有冇德國嘢咁正。

Mazda6 SKYACTIV-DIESEL 2.2 Spec.


320d及 Q7車主 Peter係柴油車擁躉, 30幾年前已用柴油私家車。 

引擎: 2,191c.c.直四柴油 turbo
馬力: 175ps/4,500rpm
扭力: 42.8kgm/2,000rpm
傳動: 6前速自動、附+/-模式
懸掛:前麥花臣支柱、後多連桿
制動:前透氣碟、後實心碟
車身: 4,865× 1,840× 1,450(mm)
售價:$329,900
查詢:宏益香港( 3768 4888)

SKYACTIV-DIESEL早被力推

或者仍然有好多人死牛一面頸認為柴油車就係空氣污染根源,其實只係香港政府喺十幾廿年前將柴油私家車嘅廢排收緊,令到當年冇車可以 pass到,多年來更大肆宣傳柴油車好污糟等傳言。廿年前嘅柴油車當然比現時嘅廢排高,但車廠就一直擁開明態度,廿年來努力改善柴油引擎嘅表現,歐洲車喺幾年前已經成功「闖關」喺香港出牌。而今次柴油 Mazda6更勁!唔使入尿素淨化排氣都可以過關,成為多年嚟首部日本柴油私家車。其實早喺去年底成為 Japan Car of the Year嘅 Mazda CX-5,大部分評審都話最正係佢副柴油引擎,而同一副引擎正正就用喺今次柴油 Mazda6上,所以大有來頭。「莫講柴油日本私家車,我連普通日本電油車都好多年冇揸過,今次見呢部 Mazda6發覺佢個款唔錯,好似大部過我部 320d,但喺外面就聽到引擎聲幾大,希望唔會影響到車內啦!」


只喺車尾加上 Diesel字樣,都算低調。 

柴油版車頭造型同電油版冇分別。 

2.2公升 SKYACTIV-DIESEL引擎係 Mazda今年重頭作, CX-5都係靠佢攞獎。

房車愛玩另類動力

新世代自然要有新思維、新科技,其實除咗 Mazda6首用柴油外,其他同佢差唔多大小嘅房車,好多時都會成為廠方嘅試金石。而新世代最 in嘅動力,點可以唔提混能及電動?

高科技代表 Toyota Camry Hybrid

唔好以為柴油車好高科技,其實混能( Hybrid)更勁。發展混能最成功一定係 Toyota,有 7成車系都有混能版本, Camry貴為重要嘅中型房車,點可以冇混能版。 Camry Hybrid採用 2.5公升直四引擎配摩打,最大馬力有 205匹,車價$429,450,比柴油 Mazda6貴足 10萬。

電動力世家 Renault Fluence Z.E.

電動車其實仲未普及,車款亦唔多,不過 Renault係歐洲車廠中最出力開發電動車嘅一間,亦都有將旗下中型房車 Fluence改為電動車 Fluence Z.E.。 Fluence Z.E.有 95匹馬力,講快講舒適都唔及柴油 Mazda6,不過佢達到真正零排放,混能同柴油動力都可以企埋一邊,連政府都入咗好多部,車價$388,000。

車廂夠靜設備齊

Peter其實喺三十幾年前已經用緊柴油私家車,最鍾意係 M-Benz W123 300D。「以前買 300D係因為佢夠晒舒服,𠵱家我部 Q7同 320d都唔錯,車廂同電油版根本冇分別。而且值得一讚係隔音做得好好,車內聽到嘅引擎聲細到同電油車一樣。部 Mazda6喺車外聽到幾大聲,估唔到車內隔音都唔錯,唔係刻意去踩高轉根本聽唔到引擎聲。」
現時 320d賣$459,900,而柴油 Q7更賣成$851,000,絕對非一般歐洲房車價錢, Mazda6車款同 320d一樣係三廂式房車,車身甚至長 241mm,但車價只係$329,900,足足平 13萬!係現時最易入手柴油車,不過車內設備比 320d更豪!「我最估唔到佢有埋原廠泊車鏡頭,我部 320d只有泊車 sensor,而且 Mazda6設備豐富,軚盤又有+/-波,以咁嘅價錢又真係好抵。」



Mazda6車廂一樣設備豐富,中控台上有原廠泊車顯示屏幕。 

Mazda後座地台造得較平,腿部空間唔錯。

320d冇得揀版本,所以車內設計較平淡。 

320d後座中間座位會坐得較辛苦。 

Q7推出都有一段日子,所以車廂設計同新 Audi有啲唔同。 

Q7中排當然係最豪,有天幕頂之餘,仲有活動餐枱。 

媲美歐洲車舒適

 


柴油 Mazda6係目前最便宜柴油私家車,比 320d平足 13萬。 

Mazda 6電動前座都有兩組記憶,而且布滿透氣孔,唔會好焗身。 

320d前座承托表現係 3部車中最好。 

Q7座姿較高,但受惠天幕,空間感最強。 

低轉扭力夠驚人

其實 Peter之所以咁著重舒適性,係因為平時會用部車載吓家人之外,更重要係一個日日用車嘅用家。差不多每日都揸車由元朗到港島,再喺九龍區遊大半日,柴油車油費平,對佢嚟講更抵用。「我每日用量高之餘,其實都有好多時間係喺市內行車,開車又停車,又可能成日要 cut線爬頭,柴油車低轉扭力好過電油,起圍快啲。」冇錯,柴油 Mazda6嘅馬力一啲都唔大,但都有 172匹,不過扭力就好驚人,達到 42.8kgm,等如 4公升電油 V8!比 Peter部 320d多 4kgm扭力。「我覺得 Mazda6好夠力, cut線起圍夠爽快,同部 320d好接近。不過可能係頭轆車原因,大油起步時會有少少搶軚感覺,柔住起步會好啲。而且我覺得副偈唔夠 320d嗰副順滑,但以呢個價錢,同埋係日本車,已經好好嘢!」
筆者試車時都發覺 Mazda6起步表現比 V6更有力, turbo lag基本上感覺好微,唯一美中不足係柴油車天生唔利高轉,低、中轉速表現頂瓜瓜,轉數及速度一高,引擎聲就好明顯。然而,筆者仍覺得佢好啱香港地用,正如 Peter所講,市內成日都開車又停車,夠力又慳油就掂。


由於扭力大,大油起步容易出現推頭式搶軚感覺。 

Peter認為 Mazda6引擎表現未及 320d幼滑,但呢個價錢就好抵買。 

320d扭力表現雖然唔及 Mazda6,但由於採用尾轆驅動,平衡性更好。 

Q7用 V6引擎,震盪感覺係 3部車中最小。 

Mazda6

 


Peter仲認為試車嘅胎氣較脹,如少一啲胎氣,可望改善起步搶軚反應。 

6速+/-波除可以喺軚環操作,亦可以喺波棍操作。 

i-stop停車自動熄匙系統(紅圈),可幫助 Mazda6進一步慳油,現時可達 20.0km/L,即約$0.53/km!

撰文:袁國基
攝影:葉偉豪

全站熱搜

tvb4life 發表在 痞客邦 留言(0) 人氣()