羅宋湯$20 

尋澄味

食上癮 聯華茶餐廳 地址:西營盤正街 28號 電話: 2540 1563(林澄光)

掙爆一架七人車的幾個肥仔,相約到觀瀾打波。上路之前循例要先醫肚,收集了各人意見,謝絕集團式的 ABC快餐,又不想求其亂去一間。這次就由做海味起家的西環 Tiger Woods揸主意,比郵差更熟悉西區的他,帶我去一直從未試過的聯華。

 

受地產霸權和黐線租金影響,歷史悠久的港土茶記買少見少。接近五十年歷史的聯華茶餐廳,和隔幾個鋪的源記糖水一樣,以開心價陪伴街坊一起成長。
保持得乾淨的裝修,仍然停留在大家都懷念的那些年歲月。鏡面牆身和微黃壁燈,《阿飛正傳》 style的通花扶手樓梯,還有 Keep得乾淨的紙皮石地板。玻璃枱「責住」接近失傳的大餐牌,雖然用紅綠二色細分了各式各樣的食物種類;不過,花款之多可能要翻轉隻豉油碟,再齊齊伸出手指搵碟仙指導。
笑口常開的事頭婆,由收銀忙到去樓面,親自率領幾位禮貌周到的老友記為大家服務。廚房和水吧的無間合作,出品包羅萬有,人人有份的老火例湯,歡迎大家飲完一裝再裝。十一點打後的二擇一快餐, A和 B的選擇通常都是以咖喱做膽,腳拖粟米汁的碟頭飯。容易消化的粟米火腿雞絲飯,最啱一心多用的「餓底」,火腿和雞粒都切到細細粒,令大家可以完全無後顧之憂放心自我 multi task,一邊「扒」飯,一邊睇電視、一邊玩手機。


乾炒牛肉意$34 

公司三文治$29 

 

全日供應的公司三文治,陣容鼎盛過台慶的藝員大合照,從水吧出現的一刻,即時引來全場歡呼聲。必然出現的番茄和芝士,還有厚到蝕本的火腿和午餐肉扒,不過最攞命的始終是厚過砧板的鹹牛肉炒蛋,分量足夠一家四口齊分享。
快手爆炒的乾炒牛肉意粉抵食夾大碟,配料雖然只有韭黃、葱段和牛肉。不過,牛肉油爆得軟滑,每條意粉都炒得「上色掛味」,冒熱大啖食,香氣連隔籬枱的熟客仔都即時跟風要了一碟。
愈夜愈濃味的羅宋湯,開胃之外還有滑腸的巨大作用,在大量蔬菜纖維的幫助和心理上的副作用下,便秘多時的老友,湯未飲完已經要即時衝入廁所排毒,比通便的甘油條更有效。賣到街知巷聞的焗豬扒飯,即叫即炸的豬扒肥大肉厚,鮮茄製造的醬汁顏色美麗,酸酸甜甜愈食愈好味。打算趁天氣涼行山減磅的朋友,我勸你還是不要來,因為這個焗豬扒飯超正,好容易令你一食上癮!


焗豬扒飯$46 

粟米火腿雞絲飯$34 

 

聯華茶餐廳
地址:西營盤正街 28號
電話: 2540 1563

 

少年食神林澄光( Michael)
致力用金錢換無限快樂。 TVB、 Now TV飲食及旅遊節目主持人


攝影:林招宙

    全站熱搜

    tvb4life 發表在 痞客邦 留言(0) 人氣()