博出位

牀前無上妝

近日唔少藝人由禁忌多多嘅微博轉戰 instagram,唔少女藝人於是就地解決,齊齊展示真面目。

舒淇 動物伴侶

37歲嘅舒淇從不介意素顏示人,近日佢就喺 instagram放多張素顏牀照,唔少網友高呼 sexy。原來舒淇有種癖好,就係搵貓仔、馬騮等陪入睡,都幾 lonely下。

薛凱琪 機不離手

唱片市道不景氣,做歌手都未必一定有碟出。難得唱片公司投資製作,薛凱琪( Fiona)連拍三日唱片封套都制!不過完事後, Fiona就 post咗張攤喺牀上嘅 moody相,宣洩自己辛苦。既然咁攰,不如上牀瞓,何必機不離手呢!

許亦妮 走樣史力加

許亦妮( Whitney)雖然最近情場失意,俾娛樂公司高層撇,但樂觀嘅佢,依然有心情扮史力加同大家講 good night。不過素顏嘅佢略有油光,似去哈囉喂 party多啲!

龔嘉欣 抱枕睡

早前自爆遭人電話恐嚇搞到冇覺好瞓嘅龔嘉欣,近日就擺咗張素顏牀照上 instagram,冇化妝嘅佢皮膚滑溜。雖然事隔成個月,但要抱住枕頭先瞓得着,睇嚟佢仲有啲心理陰影喎!

傅穎 比卡超上身

傅穎( Theresa)近年主力喺內地發展,但亦 keep住放相上網同各位分享,而每次 Theresa都帶俾大家「新鮮感」,樣貌時時變。呢次佢就一身比卡超套裝坐喺牀度 V晒手賣萌,唔知一眾宅男覺得可愛定幼稚呢?

    全站熱搜

    tvb4life 發表在 痞客邦 留言(0) 人氣()